Газрын тос боловсруулах үйлдвэр барих техник эдийн засгийн үндэслэл, төслийн нэгжийн үйл ажиллагаа, гадна дэд бүтцийн бүтээн байгуулалтын үйл явцад хийх гүйцэтгэлийн аудитын нээлт боллоо


УИХ-ын Төсвийн байнгын хорооны 2019 оны 4 дугаар сарын 23-ны өдрийн “Аудитын сэдэв батлах тухай” 2018 оны 01 дүгээр тогтоолд нэмэлт, өөрчлөлт оруулах тухай 04 дүгээр тогтоол, Монгол Улсын Ерөнхий аудиторын 2019 оны 5 дугаар сарын 15-ны өдрийн “Аудитын төлөвлөгөө шинэчлэн батлах тухай” А/45 дугаар тушаалаар батлагдсан 2019 онд гүйцэтгэх аудитын төлөвлөгөөг үндэслэн Газрын тос боловсруулах үйлдвэр барих техник эдийн засгийн үндэслэл, төслийн нэгжийн үйл ажиллагаа, гадна дэд бүтцийн бүтээн байгуулалтын үйл явцад хийх гүйцэтгэлийн аудитыг Төрийн аудитын тухай хуулийн 15.1-д заасан Үндэсний аудитын газрын бүрэн эрхийн хүрээнд гүйцэтгэнэ.Төрийн аудитын тухай хуулийн 15.1.20-д заасны дагуу төсөл, хөтөлбөрийн явцад хийх урьдчилсан аудитыг анх удаа хийж байгаагаараа энэхүү аудит онцлог юм.

Газрын тос боловсруулах үйлдвэр барих техник эдийн засгийн үндэслэлд гүйцэтгэлийн аудит хийж дүн, дүгнэлт гаргаж зөвлөмж боловсруулан холбогдох байгууллага, албан тушаалтан, УИХ-д танилцуулж, олон нийтэд мэдээлэхэд аудитын зорилго чиглэгдэх юм.

Тус аудитыг

  • Газрын тос боловсруулах үйлдвэр барих техник эдийн засгийн үндэслэл оновчтой хийгдсэн эсэх
  • Газрын тос боловсруулах үйлдвэр болон дамжуулах хоолой барих төслийн нэгжийн үйл ажиллагаа, бэлтгэл ажлын дэд бүтэц, бүтээн байгуулалтын хэрэгжилт үр дүнтэй явагдаж байгаа эсэх гэсэн хоёр үндсэн зорилтын хүрээнд гүйцэтгэнэ.

Аудитын нээлт 2019 оны 6 дугаар сарын 03-ны өдөр Үндэсний аудитын газрын байранд болж хамрах хүрээний байгууллагуудын төлөөлөл оролцлоо.

Нээлтэнд  УУХҮЯ-ны Хүнд үйлдвэр, газрын тосны бодлогын хэрэгжилтийг зохицуулах газрын Газрын тосны хэлтсийн дарга Ч.Хишигдалай, Сангийн яамны Хөгжлийн санхүүжилтийн газрын  Зээл тусламжийн бодлогын хэлтсийн мэргэжилтэн Б.Энх-Амар, “Монгол газрын тос боловсруулах үйлдвэр” ТӨХХК-ийн Гүйцэтгэх захирал Д.Алтанцэцэг, “Монгол газрын тос боловсруулах үйлдвэр” ТӨХХК-ийн дотоод хяналтын албаны дарга О.Энхбаяр, ТӨБЗГ-ын Бодлого, төлөвлөлт удирдлагын хэлтсийн дарга Ц.Баяр-Эрдэнэ, БХЯ-ны Санхүүгийн хэлтсийн ахлах мэргэжилтэн дэд хурандаа С.Түвшинтөгс, Цахилгаан дамжуулах үндэсний сүлжээ ТӨХК-ийн Санхүү эдийн засгийн хэлтсийн дарга Б.Энхмаа, Ашигт малтмал газрын тосны газар, Газрын тосны бүтээгдэхүүний хэлтсийн дарга Н.Энхцогт, Ашигт малтмал газрын тосны газар, Хүнд үйлдвэр техник технологийн хэлтсийн мэргэжилтэн н.Бат-Эрдэнэ, БОАЖЯ-ны Байгаль орчны үнэлгээ, аудитын хэлтсийн ахлах мэргэжилтэн Д.Шижир-Эрдэнэ, Хөгжлийн банкны Төслийн зээл, санхүүжилтийн хэлтсийн ахлах мэргэжилтэн н.Эрдэнэбаатар, мэргэжилтэн н.Янжинлхам нар ирж санал хэлж, мэдээлэл солилцлоо.