Сургагч багшийн давтан сургалт зохион байгуулагдлаа.


ТАБ-ын сургагч багш нарыг давтан сургах зорилгоор “Төрийн аудитын сургалтын цар хүрээ” гэсэн агуулгын хүрээнд 2017 онд бэлтгэсэн  сургагч багш нарыг давтан сургах, тэдний мэдлэг арга зүйг хуваалцах 24 цагийн сургалтыг Стратеги удирдлагын газраас Тамгын газартай хамтран 2019 оны 06 дугаар сарын 26-28-ны өдрүүдэд зохион байгууллаа.

Сургалтыг Тамгын газрын дарга Ц.Ганболд нээж үг хэлэхдээ төрийн аудитын байгууллагын хөгжлийн чухал зүйлийн нэг бол үр дүнтэй сургалт хийх, арга зүйтэй сургагч багшийн нөөц бүрдүүлэх асуудал гэдгийг онцлов. Сургалтад аймаг, нийслэл, ҮАГ-аас 23 сургагч багш хамрагдаж төрийн аудитын байгууллагын сургалтын цар хүрээг тодорхойлох талаар арга зүйч, менежер Х.Баярмаа эхний өдрийн онол болон дадлага хосолсон сургалтыг зохион байгуулав.

Дараагийн хоёр өдөр нь сургагч багш нар СУГ-аас хуваарилсан аудитын сэдвийн дагуу 35 минутын хичээл бэлтгэн зааж үзүүлсэн нь харилцан биесээсээ суралцсан, туршлага хуваалцсан сургалтыг илүү үр дүнтэй, заасан хичээлүүдийг төрийн аудитын хэмжээнд түгээх боломжтой болголоо. Аудитын сэдэв, агуулгыг бусдад эзэмшүүлэх зорилготой сургагч багш нар хичээлдээ их бэлтгэсэн байсан нь сайшаалтай байв. Тодорхой шалтгааны улмаас Тамгын газар, Нийцлийн аудитын газар, Ховд, Говь-Алтай, Дорнод аймгийн сургагч багш нар оролцсонгүй.                                                                                                                                                                               

Сургалтад хичээл заасан багш нарын хичээлийг арга зүйч менежер Х.Баярмаа, ЧБА-ны дарга Ц.Батбаяр, сургалт хариуцсан менежер Ж.Эрдэнэ нарын комисс үнэлж заагдсан хичээл бүрийн талаар шүүмж хийж, дүгнэлт өгөн 100 хүртэл оноогоор үнэллээ. Үнэлгээний нэгдсэн дүнгээр 90-95.6 оноо авсан багш 7, 80.6-89.6 оноотой 13, 70-79 оноог 4 багш авчээ.

Хичээл заасан үнэлгээгээр Баянхонгор аймгийн ахлах аудитор А.Цээням, Санхүүгийн аудитын газрын ахлах аудитор Ц.Хосжаргал, Хэнтий аймгийн аудитор Б.Эрдэнэбилэг эхний 3 байр эзэлж өргөмжлөл мөнгөн шагналаар шагнагдав.Сургалтыг хааж СУГ-ын дарга Д.Энхболд үг хэлэхдээ сургалтын чанар, үр өгөөжийг сайжруулахад сургагч багшийн үүрэг оролцоо чухал болж буйг тэмдэглэн  оролцогчдод “СЕРТИФИКАТ” гардуулав.

ТАБ-ын болон өөрийн байгууллагын хэмжээнд аудитын сэдвээр хичээл бэлтгэн заах арга зүй, ур чадвартай сургагч багш нарын нөөцтэй болж байгаа нь чухал ач холбогдолтой болсон юм.

Цаашид эдгээр багш нарыг сургалтын төлөвлөгөө, хөтөлбөрийн санал боловсруулах, байгууллага дахь сургалтыг зохион байгуулах, сургалт, хөгжлийн асуудлыг хариуцуулан ажиллуулах зэргээр мэдсэн сурсан зүйлийг  ашиглах нь төрийн аудитын байгууллагын анхаарах асуудлын нэг болж байна.