Олон улсын аудитын дээд байгууллагын их хурал болж байна


Энэ өдрүүдэд олон улсын аудитын дээд байгууллагуудын их хурал ОХУ-ын Москва хотноо зохион байгуулагдаж байна. "ИНКОСАЙ-23" их хуралд Монгол Улсын Ерөнхий аудитор Д.Занданбат болон холбогдох албан тушаалтнууд оролцож байгаа бөгөөд өнөөдөр Олон улсын аудитын дээд байгууллагыг ирэх 3 жилийн хугацаанд тэргүүлэх болсон ОХУ-ын Тооцооны танхимын дарга Алексей Кудрин сонгуульт ажлаа хүлээн авлаа. 1953 онд үүсгэн байгуулагдсан Олон улсын аудитын дээд байгууллага нь өдгөө эгнээндээ 194 орны аудитын дээд байгууллагуудыг нэгтгэдэг ба их хурал нь 3 жил тутамд болдог. ОХУ-ын нийслэл Москва хотод болж буй их хуралд 169 орны 600 гаруй төлөөлөгчид оролцож байна.

ОХУ нь анх удаа энэхүү олон улсын нэр хүндтэй байгууллагын их хурлыг эх орондоо зохион байгуулж байгаа бөгөөд ОХУ-ын Ерөнхийлөгч Владимир Путин хуралд оролцогчдод хандан хэлсэн үгэндээ улс орнууд аудитын тогтолцооны талаар туршлага солилцох, харилцан итгэлцлийг бэхжүүлэх, тулгарч буй асуудлуудаа хамтдаа даван туулах, эдийн засгийн тогтвортой өсөлтийг хангах, хүн амын амьдралын төвшинг сайжруулах болон хүрээлэн буй орчныг хамгаалах тал дээр онцгой анхаарч ажиллах хэрэгцээ шаардлага үүсэж байгааг онцлов. Өөрөөр хэлбэл энэ удаагийн хурлын гол сэдвүүд НҮБ-ын Тогтвортой хөгжлийн зорилтуудыг хэрэгжүүлэхэд чиглэгдэж байгааг тодотгов. 

Улс орнуудын хэрэгжүүлж буй урт хугацааны, томоохон төслүүдийн төсвийн зарцуулалтын үр ашигтай байдал, хөрөнгө оруулалт болон төрийн бодлогод үнэлэлт дүгнэлт өгдгөөрөө аудитын байгууллага нь Тогтвортой хөгжлийн зорилтуудыг хэрэгжүүлэхэд маш чухал үүрэг гүйцэтгэх нь дамжиггүй юм. Орчин үеийн амьдралын хэв маяг, технологийн салбарт гарч буй эрс өөрчлөлтүүд, инноваци, улс орнуудын өмнө тулгарч буй шинэ сорилтууд нь аудитын салбарт шинэ шинэ стандартууд нэвтрүүлэх шаардлагыг бий болгож байгааг оролцогч улс орнууд онцолж, шийдлүүдийг хэлэлцэж байна.