АУДИТЫН ДЭЭД БАЙГУУЛЛАГУУДЫН ХАМТЫН АЖИЛЛАГААНЫ ТАЛААР ХЭЛЭЛЦЛЭЭ


ОХУ-ын Москва хотноо зохион байгуулагдаж буй олон улсын аудитын дээд байгууллагуудын их хурал “ИНКОСАЙ-23” үргэлжилж байна.

Их хуралд оролцож буй Монгол Улсын Ерөнхий аудитор Д.Занданбат эдгээр өдрүүдэд ОХУ-ын Тооцооны Танхимын дарга Алексей Леонидович Кудрин, БНХАУ-ын Ерөнхий аудитор хатагтай Ху Жэзун, БНСУ-ын Аудит, хяналт шалгалтын зөвлөлийн дарга Чой Жае Хёнтай албан ёсны уулзалт хийлээ.

ОХУ-ын Тооцооны танхимын дарга Алексей Кудринтэй хийсэн уулзалтаар ОХУ-ын Ерөнхийлөгч Владимир Путины Монгол Улсад 9 дүгээр сард хийсэн төрийн айлчлалын дүнд Монгол Улс болон ОХУ-ын харилцаа иж бүрэн стратегийн түншлэлийн шатанд хүрснийг талууд онцолж, энэхүү түншлэлийн хүрээнд манай хоёр орны төрийн аудитын дээд байгууллагуудын хамтын ажиллагааг өргөжүүлэх, хоёр байгууллагын хэмжээнд төдийгүй ИНТОСАЙ, АСОСАЙ-н төвшинд харилцан 2 улсаа дэмжиж ажиллах боломжуудыг хэлэлцэв.

БНХАУ-ын Ерөнхий аудитор хатагтай Ху Жэзунтай хийсэн албан ёсны уулзалтаар  хоёр орны аудитын дээд байгууллагуудын хамтын ажиллагааг 2018-2020 онд хэрэгжүүлэх хамтын ажиллагааны хөтөлбөрийн хэрэгжилтийг сайжруулах, аудитын үйл ажиллагаанд мэдээлэл технологийг дэвшлийг ашиглах, их өгөгдлийг боловсруулах, ашиглах чадавхыг бэхжүүлэх чиглэлээр санал солилцлоо.

БНСУ-ын Аудит болон Хяналт шалгалтын зөвлөлийн дарга Чой Жае Хёнтай хийсэн уулзалтаар БНСУ-ын аудитын дээд байгууллагатай урьд хэрэгжүүлж  ирсэн хамтын ажиллагаагаа цаашид сургалтын болон програм хангамжийн чиглэлд өргөжүүлэх хүсэлтэй байгаагаа илэрхийлсэн юм. БНСУ-ын аудитын дээд байгууллага, түүний дэргэдэх сургалтын төв нь АСОСАИ-н төвшинд үйл ажиллагаа болон сургалтын чанараараа тэргүүлэх байр суурь эзэлдэг юм.

Уг Их хурлаас 10 зүйл заалт бүхий тунхаглал батлагдан гарлаа. Тунхагт аудитад их өгөгдөл ашиглан мэдээллийн технологи дэвшил хийх, мөн Тогтвортой хөгжлийн зорилтын хэрэгжилтийг дэмжих үүднээс Төрийн аудитын байгууллагууд холбогдох стратегийг боловсруулж ажиллах гэсэн 2 асуудлыг онцолсон Москвагийн тунхаглалыг ирэх 3 жилд ИНТОСАИ-ын бүх гишүүн орнуудын тэргүүн зорилт болох хэрэгжүүлэхээр боллоо.