Үндэсний аудитын газрын нийт албан хаагчид мод тарив


“Үндэсний цэцэрлэгт хүрээлэн” ОНӨТҮГ нийслэл хотын ногоон байгууламжийн массыг нэмэгдүүлэх, эрүүл эко орчныг бүрдүүлэх зорилтын хүрээнд жил бүрийн 5,10 дугаар сард "Бүх нийтээр мод тарих үндэсний өдөр”-ийг албан байгууллагатай хамтран зохион байгуулдаг уламжлалтай.

Энэ жилийн “Мод тарих үндэсний өдөр”-ийг угтан 2019 оны 10-р сарын 05-ны өдөр Үндэсний цэцэрлэгт хүрээлэнд ҮАГ-ын нийт албан хаагчид мод тарилаа. Технологийн дагуу зөв тарилт хийх үүднээс ҮЦХ-ийн ажилтнуудаас зааварчилгаа авч нийт 108 модыг суулгаж, усалгаа хийсэн юм.

Энэ удаагийн мод тарилтанд хүрээлэнг төлөөлөн н.Уянга мод тарих үйлсэд нэгдсэн албаны хүмүүст талархал илэрхийлж, цаашид хамтран ажиллахдаа таатай байх болно гэдгээ хэлсэн юм.

Монгол Улсын Ерөнхий аудитор Д.Занданбат “Бүх нийтээр мод тарих үндэсний өдрийг зөвхөн тарьдаг биш, арчилж ургуулдаг болгож шинэчлэн баяжуулъя. Өнөөдөр тарьсан мод нь ирэх жил ирэхэд цэцэглэсэн байхын өлзийтэй ерөөлийг дэвшүүлье" гээд энэхүү үйл ажиллагааг зохион байгуулсан Санхүүгийн аудитын газрын хамт олонд талархал илэрхийлсэн юм.