Төрийн аудитын байгууллагын ахлах аудиторуудын сургалт боллоо


Үндэсний аудитын газрын Тамгын газар, Стратегийн удирдлагын газраас Төрийн аудитын байгууллагын сургалт, хөгжлийн стратеги хөтөлбөрийн хүрээнд 2019 оны сургалтын нэгдсэн төлөвлөгөөнд зохицуулалт хийх замаар ТАБ-ын хэмжээнд ажиллаж байгаа 83 ахлах аудиторуудыг хамруулан аравдугаар сарын 23-аас 25-ны өдрийн хооронд сургалт зохион байгууллаа.

Сургалтаар 2019 оны нэгдүгээр сарын 1-ээс  хэрэгжиж эхэлсэн шинэчлэн найруулсан “Төрийн албаны тухай” хуулийн дагуу  төрийн албаны сургалтын бодлогод орсон  өөрчлөлт шинэчлэлт, гүйцэтгэлийн удирдлагын асуудал, төрийн байгууллага болон албан хаагчийн гүйцэтгэлийн төлөвлөгөөг боловсруулах  арга зүй, гүйцэтгэлийн үнэлгээ, төрийн аудитын хэмжээнд аудитын арга зүй болон дүрэм, журамд гарсан өөрчлөлт, сургалт, хөгжлийг дэмжих зэрэг чиглэлээр 27 цагийн хичээлийг заалаа.

Энэ удаагийн сургалт нь төрийн жинхэнэ албан хаагчийн мэргэшүүлэх болон чадавхжуулах сургалтыг хэрхэн зохион байгуулах,  гүйцэтгэлийн удирдлага, гүйцэтгэлийн үнэлгээ хийх,  албан хаагчийн гүйцэтгэлийн төлөвлөгөө боловсруулах зэрэг арга зүйн асуудлаар ахлах аудиторуудад зориулж Удирдлагын академийн Төрийн албаны сургууль дээр 1 өдрийн захиалгат сургалтыг зохион байгуулснаараа онцлогтой.

ҮАГ-ын СУГ-ын арга зүйч менежерүүд болон бусад сургагч багш нар ахлах аудиторуудын санхүү, гүйцэтгэл, нийцлийн аудитын талаарх мэргэжлийн арга зүйг хөгжүүлэх, олон улсын стандартыг хэрэгжүүлэх,  онол дадлага хослуулсан сургалтыг дараагийн өдрүүдэд Эрдмийн их сургуульд зохион байгуулсан юм.

Төрийн аудитын байгууллагын хэмжээнд цахим  сургалтын арга хэлбэрийг хөгжүүлэх, шинэ технологийг нэвтрүүлэх хүрээнд ШУТИС-ын зөвлөх багш проф.  Г.Зориг “ Технологийн шинэ эрин ба хөгжлийн бодлого” сэдвээр лекц уншиж, шинэ технологийн талаар үнэтэй мэдээлэл хуваалцсанд сургалтад хамрагдсан аудиторууд баяртай байгаагаа илэрхийлсэн юм.

Сургалтын гол агуулгыг  хэрхэн эзэмшсэн талаар 2 хувилбартай 60 асуулттай тестээр ахлах аудиторуудын мэдлэгийг  шалгахад 73 хувьтай үнэлэгдсэн байна.

Сургалтын хаалтын  ажиллагаанд МУЕА Д.Занданбат оролцож төрийн аудитын байгууллагын цаашдын бодлого, чиглэлийн талаар үг хэлж, оролцогчдын санал бодлыг сонсож, мэдээлэл солилцож,  “Сертификат” гардууллаа.