Үндэсний аудитын газар болон хараат бус аудитын компанийн төлөөлөл Улсын онцгой комисст хандив цуглуулан хүргүүллээ


Дэлхий нийтийг цочроосон "Covid-19"  вирусын халдвар 192  оронд тархаж, улс орон бүр иргэдийнхээ аюулгүй байдал онцгой анхаарч, урьдчилан сэргийлэх, хамгаалах арга хэмжээг эрчимтэй зохион байгуулж байна. 

Монгол улс халдвараас урьдчилан сэргийлэх, ард иргэдээ хамгаалах чиглэлд холбогдох байгууллагууд өндөржүүлсэн бэлэн байдалд ажиллаж  байгаа энэ үед Улсын онцгой комиссын үйл ажиллагааг дэмжих зорилгоор ТАБ-ын нийт албан хаагчид мөнгөн хандив цуглуулж хүргүүлсэн

            Тэгвэл Үндэсний аудитын газраас жил бүр хийдэг санхүүгийн тайлангийн аудитад зөвлөн туслах үйлчилгээ явуулж тогтмол хамтран ажилладаг “Гранд Тронтон” аудитын компаниас санаачлага гарган хандив цуглуулсныг УОК-т хүргүүлсэн байна. “Гранд Тронтон” ХХК-ны ерөнхий захирал Б.Осоргарав  МУ-ын Ерөнхий сайд У.Хүрэлсүх, УОК-ын дарга, МУ-ын шадар сайд Ө.Энхтүвшин, УИХ-ын гишүүн, ЭМЯ-ны сайд Д.Сарангэрэл, ОБЕГ-ын дарга, хошууч генерал Т.Бадрал нарт хаягласан захидалдаа Монгол улсын эгэл жирийн иргэн миний бие “Эх орноо эдийн засгийн хүндрэлээс гаргахын төлөө” хөдөлгөөнийг санаачлан бүгдээрээ “Эх орныхоо төлөө” гэсэн уриан дор нэгдэн БНСУ-ын ард түмний жишгээр Эх орноо эдийн засгийн хүндрэлээс гаргахын төлөө 8 настай балчраасаа эхлэн 80 настай азай буурлаа хүртэл, байгууллага, аж ахуйн нэгжийн үйлчилгээний ажилтнаасаа эхлэн УИХ, Засгийн газрын гишүүд, Монгол Улсын Ерөнхийлөгчөө хүртэл идэвхийлэн оролцохыг уриалж 2017 оны 1-р сард Уриалга гаргасан билээ. Энэхүү хандивын аян маань 2 ба 3-р сард буюу ердөө хоёр орчим сар үргэлжлээд л ерөнхийдөө зогссон юм. Энэ хооронд Сангийн Яамны Төрийн сан банк дахь 100900080800 тоот төгрөгийн дансанд 153.072.960 төгрөг 82 мөнгө цугларч, одоо ийм үлдэгдэлтэй, энэхүү дансны хуулга байна. 2016 оны эцэст Монгол эх орон эдийн засгийн хямралд орж, Монгол улсын Засгийн газар Евро бондын өрийн эхний хэсэг болох 580 сая ам.долларыг төлөх мөнгөгүй, улсын сангийн авдар хоосорсон гэж өдөр, шөнөгүй, өглөө, үдэшгүй ярьж, ард түмнээ байж суухын аргагүй болтол нь ярьж, ард түмнийхээ толгойг угааж, өмнөхөө муулж байсан тэр цаг хугацаанд өрнөсөн хандивын аяны хөдөлгөөнд цугларсан энэхүү 153.1 сая төгрөгийг, дэлхийг цочроосон аюулт өвчин болох Коронавирусын эсрэг аянд нэгдэж Монгол улсын Засгийн газар, түүний Улсын онцгой комисс, Эрүүл мэндийн Яам, Онцгой байдлын Ерөнхий газарт хүлээлгэж өгөхийг хүсч байна. 2017 оны эхэнд ард түмний хандиваар цугларсан  энэхүү мөнгийг Монгол эх орон, ард түмнээ, Коронавирус гэх энэ аюулт өвчнийг эх орондоо оруулж ирэхээс сэргийлэх, ард түмнээ энэ аюулт өвчнөөс хамгаалах арга хэмжээнд зохих ёсоор зарцуулна гэдэгт итгэж байна гэжээ.   

            Үндэсний аудитын газраас “Гранд Тронтон” ХХК-ны удирдлагад улс орон нийтээр өндөржүүлсэн бэлэн байдалд ажиллаж байгаа энэ үед оновчтой санал, санаачилга, уриалга гарган хэрэгжүүлж буйд талархал илэрхийлж байна.