1

НЭГДСЭН ҮНДЭСТНИЙ БАЙГУУЛЛАГЫН ХӨГЖЛИЙН ХӨТӨЛБӨРИЙН ТӨЛӨӨЛӨГЧДИЙГ ХҮЛЭЭН АВЧ УУЛЗЛАА

Монгол Улсын Ерөнхий аудиторын орлогч О.Тэнгис тэргүүтэй Үндэсний аудитын газрын удирдлагууд 2020 оны аравдугаар сарын 11-ны өдөр Нэгдсэн Үндэсний Байгууллагын Хөгжлийн хөтөлбөрийн төлөөлөгчдийг хүлээн авч уулзлаа.

Уулзалтад Нэгдсэн Үндэстний Байгууллагын Хөгжлийн хөтөлбөрийн НҮБХХ-ийн ажилтан Л.Бархас, НҮБХХ-ийн Төслийн зохицуулагч Б.Мөнхтуул, НҮБХХ-ийн Төслийн зөвлөх Д.Баасанхүү, НҮБХХ-ийн Төслийн зөвлөх Д.Энхзул нар байлцсан юм.

Энэ үеэр “Тогтвортой хөгжлийн зорилт”-уудтай уялдсан, үр дүнд суурилсан төсвийн хэрэгжилтэд хяналт-шинжилгээ, үнэлгээ хийх талаар болон Сангийн яам, НҮБ-ын хамтран хэрэгжүүлж эхэлж буй “Монгол Улсад тогтвортой хөгжлийн санхүүжилтийн нэгдсэн тогтолцоог нэвтрүүлэх нь” хамтарсан хөтөлбөрийн тухай танилцуулж, хөтөлбөрийн хүрээнд Үндэсний аудитын газартай хамтран ажиллах талаар санал солилцов.

Уулзалтын үр дүнд талууд хамтын ажиллагааны техникийн шатны яриа хэлэлцээрүүдийг идэвхтэй зохион байгуулж, бусад оролцогч талуудтай хамтран ажиллах талаар санал солилцож, нэгдсэн ойлголтод хүрсэн юм.