1

ЭМГЭНЭЛ

Монголын Төр, нийгмийн зүтгэлтэн, авьяаслаг удирдах ажилтан Цэндийн Молом 2020 оны 11 дүгээр сарын 10-нд хүнд өвчний улмаас насан өөд болов.

Ц.Молом нь 1932 онд Увс аймгийн Давст сумын нутагт төрж, 1950 онд Санхүү эдийн засгийн техникум, 1958 онд ЗХУ-д Эрхүү хотын Санхүү, эдийн засгийн дээд сургуулийг төгсөж, санхүүч эдийн засагч мэргэжил эзэмшжээ.

Тэрбээр 1950-1963 онд Сангийн яаманд зааварлагч, Увс аймгийн АДХ-ын гүйцэтгэх захиргаанд байцаагч, Санхүү эдийн засгийн техникумд багш, хичээлийн эрхлэгч, захирал, Сангийн яаманд хэлтсийн дарга, орлогч сайд, 1963-1965 онд Эдийн засгийн хамтын ажиллагааны олон улсын банкны ерөнхий хорооны гишүүн, 1965-1968 онд БНМАУ-аас ЗХУ-д суугаа ЭСЯ-д худалдааны төлөөлөгч, 1968-1969 онд Сангийн яамны нэгдүгээр орлогч сайд, 1969-1979 онд Сангийн яамны сайдаар тус тус ажиллаж,  Сангийн яамны сайдын албыг хамгийн олон жил хашсан 3 хүний нэг болж түүхэнд үлдсэн.

Ц.Молом нь 1979-1983 онд Сайд нарын зөвлөлийн орлогч дарга бөгөөд БНМАУ-ын Ардын хянан шалгах хорооны даргаар ажиллаж, Ардын хяналт шалгалтын тухай хууль, холбогдох бусад дүрэм, журмыг боловсруулан батлуулж, ардын хяналт шалгалтын тогтолцоог анхнаас нь төлөвшүүлэн хөгжүүлж, төрийн хяналт шалгалтын цар хүрээ, далайцыг нэмэгдүүлэхийн  төлөө хүчин зүтгэж бодитой үр дүнд хүргэсэн  билээ.

Тэрбээр 1983-1985 онд Хөдөлмөр, нийгэм хангамжийн улсын хороонд ахлах эдийн засагч, 1985-1988 онд Монголын иргэний агаарын тээврийн газарт орлогч дарга, 1988-1990 онд Эдийн засгийн гадаад харилцаа, хамтын ажиллагааны яамны орлогч сайд, 1990-1994 онд Монгол Улсаас ХБНГУ-д суугаа ЭСЯ-нд худалдаа, эдийн засгийн зөвлөх, 1994-1997 онд ОХУ дахь “МИАТ” компанийн ерөнхий төлөөлөгчөөр тус тус ажиллажээ.

Ц.Молом залуу боловсон хүчнийг ажилд нь сургаж дадлагажуулах, мэдлэг мэргэжлийг нь дээшлүүлэхэд анхаардаг, эрхэлсэн ажилдаа амжилт гаргасан, өсөх ирээдүйтэй залуусыг дэмждэг, шударга, зарчимч, аливаа саад бэрхшээлийг даван туулах сэтгэлийн тэнхээтэй нэгэн байв.

Түүний хөдөлмөрийг төр, засаг өндрөөр үнэлж Санхүү, банкны тэргүүний ажилтан цол, тэмдэг,  ойн медалиуд, “Алтан гадас” одон, “Хөдөлмөрийн гавьяаны улаан тугийн одон”-гоор шагнаж, 2006 онд Монгол Улсын Гавьяат эдийн засагч цол хүртээжээ.

Монгол Улсын Гавьяат эдийн засагч Ц.Молом нь аливаа ажилд бүтээлч, санаачилгатай ханддаг, салбар байгууллагынхаа хэмжээнд тулгамдсан сорилт, нийгмийн асуудлыг өргөн хүрээнд харж шийдвэрлэж чаддаг байснаараа хамт олныхоо хүндэтгэлийг хүлээсэн, улс эх орноо гэсэн чин сэтгэлтэй, алсын хараатай чадварлаг, нэр хүндтэй удирдах ажилтан байлаа.

Ц.Моломын авьяас билэг, мятаршгүй зүтгэл, шинийг санаачлагч, бүтээлч сэтгэлгээ, улс орны санхүү эдийн засгийн хөгжил чадавхыг бий болгоход гаргасан хүч чармайлт, хувь нэмэр, ажилсаг, нөхөрсөг зан чанар бидний зүрх сэтгэлд үүрд мөнхрөн үлдэж санхүү эдийн засгийн салбарт тодоос тод гэрэлтэх болно.

 

     ҮНДЭСНИЙ АУДИТЫН ГАЗАР

                 УЛСЫН АРДЫН ХЯНАН ШАЛГАХ ХОРООНЫ ХАМТ ОЛОН