Орхон аймаг дахь Төрийн аудитын газраас ойн арга хэмжээний хүрээнд “Явган алхалт” зохион байгууллаа.

     Орхон аймаг дахь Төрийн аудитын газраас Монгол улсад төрийн хяналтын тогтолцоо үүсэж хөгжсөний 100 жилийн ойн нэрэмжит “Явган алхалт”-ыг Орхон аймгийн Биеийн тамир спортын газар, Орхон аймгийн Явган алхалтын холбоотой хамтран 2022 оны 10 сарын 22-ны өдөр төрийн байгууллага, төрийн албан хаагчдын дунд  зохион байгууллаа.

     Тус алхалтад 31 төрийн байгууллагын 350 гаруй албан хаагчид өглөө Амарын талбайд цуглан бие халаалтын дасгал хөдөлгөөн хийж, Хүрэнбулагийн рашааны чиглэлд цуваагаар алхан, заагдсан маршрутын дагуу Баян-Өндөр уулын орой руу алхсан юм.

     “Явган алхалт”-ын үеэр уулнаас бууж ирээд оролцогчдын дунд олс таталт, хөгжөөнт буухиа, АХА гэсэн 3 төрлийн тэмцээн зохион байгуулав.

     Олс таталтын тэмцээнд 8 хүний бүрэлдэхүүнтэй 27 баг оролцож тэргүүн байрыг Онцгой байдлын газар, дэд байрыг 2 дугаар цэцэрлэг, гутгаар байрыг Татварын хэлтэс тус тус эзэлж, Хөгжөөнт буухиа тэмцээнд 5 хүний бүрэлдэхүүнтэй 27 баг оролцож тэргүүн байранд мөн Онцгой байдлын газар, дэд байранд Орхон МСҮТөв, гутгаар байранд 7 дугаар цэцэрлэг орсон байна.

     АХА тэмцээнд 70 албан хаагч оролцон Номын төвийн мэргэжилтэн Д.Отгонцэцэг тэргүүлж, дэд байрыг Уран эгшиг хөгжмийн сургуулийн ажилтан  Ж.Хатансайхан, гутгаар байрыг Баян-Өндөр сумын ЗДТГ-ын ажилтан М.Энхтайван нар эзэлж, явган алхалт болон 3 төрлийн тэмцээн уралдаан амжилттай зохион байгуулагдлаа.

     АХА тэмцээний асуултыг тэмцээний удирдамжид заагдсаны дагуу танин мэдэхүйн болон Орхон аймаг дахь Төрийн аудитын газрын фэйсбүүк хуудсаар түгээсэн Төрийн аудитын байгууллагын үйл ажиллагаа, түүхэн замнал, хууль тогтоомжийн хүрээнд бэлтгэсэн тул оролцогчид мэдлэг мэдээлэл, бэлтгэл сайтай байлаа.

     Иймд дээрх арга хэмжээ нь Төрийн аудитын байгууллагыг иргэд олон нийтэд таниулан, сурталчилсан үйл ажиллагаа болсон юм.

     Орхон аймаг дахь Төрийн аудитын газраас зохион байгуулсан арга хэмжээнд идэвхтэй оролцсон нийт төрийн байгууллага, тэдгээрийн албан хаагчдад талархал илэрхийлье.