mn

Төрийн байгууллагын хүний нөөцийн бодлого, тогтолцооны үр нөлөөнд гүйцэтгэлийн аудит хийж эхэллээ

Төрийн аудитын тухай хуулийн 6 дугаар зүйлийн 6.3.1-д заасан Төрийн аудитын байгууллагын бүрэн эрхийн хүрээнд Улсын Их Хурлын Төсвийн байнгын хорооны 2023 оны 08 дугаар тогтоол, Монгол Улсын Ерөнхий аудиторын 2023 оны “Аудитын жилийн төлөвлөгөө батлах тухай” А/162 дугаар тушаалаар баталсан дагуу “Төрийн байгууллагын хүний нөөцийн бодлого, тогтолцооны үр нөлөө” сэдэвт гүйцэтгэлийн аудитыг эхлүүлж, нээлтийн уулзалтыг 2024 оны 08 дугаар сарын 26-ны өдөр Үндэсний аудитын газарт зохион байгууллаа.

Монгол Улсын Ерөнхий аудиторын Орлогч Я.Самбууням аудитыг нээж, аудитын зорилго, зорилтыг танилцуулж, Гүйцэтгэл, нийцлийн аудитын газрын захирал, тэргүүлэх аудитор Д.Энхболд аудитын төлөвлөгөө, анхаарах шаардлагатай асуудлыг танилцуулав.

Тус нээлтийн уулзалтад аудитад хамрагдах төрийн байгууллагуудын холбогдох албан тушаалтнууд хүрэлцэн ирж, аудитын төлөвлөгөөг хүлээн авч, тодруулга мэдээлэлдээ хариулт авлаа.

Төрийн байгууллагын хүний нөөцийн бодлого, хууль эрх зүйг хэрэгжүүлэх тогтолцоо бүрдсэн эсэх, Төрийн байгууллагуудын хүний нөөцийн тогтолцоо нь сайн засаглалыг бий болгож байгаа эсэх зорилтын хүрээнд тус аудитыг гүйцэтгэж, Монгол Улсын Их хурал болон холбогдох байгууллагад хүргүүлнэ.

Төрийн захиргаа, төрийн тусгай, улс төрийн, төрийн үйлчилгээний байгууллагуудын хүний нөөцийн, бодлогын, хяналт шинжилгээ дотоод аудитын албад нь өөрийн болон өөрт хамаарах байгууллагуудын хүний нөөцийн бодлогыг оновчтой зөв тодорхойлсон, боловсруулсан, батлуулсан байдлыг 2013 оноос эхлэн 2023 он дуусах буюу 10 жилийн хугацааг хамруулан холбогдох баримт бичгийг үзэж аудитыг гүйцэтгэхээр төлөвлөөд байна.

Тус аудитыг улсын хэмжээнд нэгдсэн удирдамжаар аймаг, нийслэл дэх Төрийн аудитын газрууд төлөвлөгөө, хөтөлбөрийн дагуу гүйцэтгэж, Үндэсний аудитын газрын Гүйцэтгэл, нийцлийн аудитын газар аудитын дүнг нэгтгэн тайланг бэлтгэж холбогдох байгууллагуудад хүргүүлэхээр төлөвлөгөөнд тусгажээ.

Аудитын тайлан

Их уншсан