Төрийн аудитын тухай хуулийн 6 дугаар зүйлийн 6.3.1, 11 дүгээр зүйл, 11.1, 11.5 дахь зүйл, Монгол Улсын Ерөнхий аудиторын 2023 оны А/100 дугаар тушаалаар баталсан Нийслэл дэх Төрийн аудитын газрын 2024 онд гүйцэтгэх аудитын сэдвийг үндэслэн “Газар эзэмшигчдэд 2021-2022 онд олгосон газрын нөхөн олговор, газар чөлөөлөлтийн хэрэгжилт” сэдэвт гүйцэтгэлийн аудитыг эхлүүлж, нээлтийн уулзалтыг 2024 оны 9 дүгээр сарын 16-ны өдөр Нийслэл дэх Төрийн аудитын газарт зохион байгууллаа.
Монгол Улсын Ерөнхий аудиторын Орлогч С.Батбямба аудитыг нээж, аудитын зорилго, төлөвлөгөө болон анхаарах шаардлагатай асуудлыг танилцуулав.
Мөн аудитын нээлтийн уулзалтад Нийслэл дэх Төрийн аудитын газрын дарга, тэргүүлэх аудитор М.Эрдэнэжаргал, Нийслэл дэх Төрийн аудитын газрын дэд дарга Ч.Болд, Үндэсний аудитын газрын Эрсдэлийн удирдлагын газрын менежер Н.Анхбаяр, Нийслэл дэх Төрийн аудитын газрын аудитын баг оролцлоо.
Аудитад хамрагдах Нийслэлийн Засаг даргын Тамгын газрын дарга П.Хадбаатар болон холбогдох албан тушаалтнууд аудитын нээлтийн уулзалтад хүрэлцэн ирж, аудитын төлөвлөгөөг хүлээн авч, тодруулга мэдээлэлдээ хариулт авлаа.
Тус гүйцэтгэлийн аудитаар газар чөлөөлөх арга хэмжээг холбогдох бодлогын баримт бичгүүдтэй уялдуулж төлөвлөсөн эсэх, газар эзэмшигч, өмчлөгчдөд олгох нөхөн олговрыг холбогдох хууль тогтоомжийн дагуу үнэн зөв тооцож олгосон эсэх, газар чөлөөлөх үйл ажиллагааг хууль тогтоомжид заасны дагуу үр дүнтэй хэрэгжүүлсэн эсэхийг үзэхээр төлөвлөсөн.
Аудитад Нийслэлийн Иргэдийн төлөөлөгчдийн хурал, Нийслэлийн Засаг дарга, Нийслэлийн Засаг даргын тамгын газар, Нийслэлийн Замын хөгжлийн газар, Нийслэлийн боловсролын газар, Хот байгуулалт хөгжлийн газар, нийслэл, дүүргийн Газар зохион байгуулалтын алба болон бусад харьяа газруудын 2021-2024 оны холбогдох гэрээ, түүний хэрэгжилт, олгосон санхүүжилт, төсөл, арга хэмжээний явц, үр дүнг хамруулах юм.
Нийслэл дэх Төрийн аудитын газар “Газар эзэмшигчдэд 2021-2022 онд олгосон газрын нөхөн олговор, газар чөлөөлөлтийн хэрэгжилт” сэдэв гүйцэтгэлийн аудитын тайлан, дүгнэлтийг 2024 оны 11 дүгээр сарын 25-ны дотор холбогдох байгууллагад хүргүүлнэ.
Дархан-Уул аймаг дахь Төрийн аудитын газар “Төрөөс бүх нийтийн боловсрол олгож байгаа өнөөгийн байдал, үр дүн”-д хийсэн гүйцэтгэлийн аудит
Дархан-Уул аймаг дахь Төрийн аудитын газар “Төрөөс бүх нийтийн боловсрол…
