Улсын Их Хурлын Инновац, цахим бодлогын байнгын хороо 2024 оны 10 дугаар сарын 23-ны өдөр хуралдаж, Монгол Улсын 2025 оны төсвийн тухай, Үндэсний баялгийн сангийн 2025 оны төсвийн тухай, Нийгмийн даатгалын сангийн 2025 оны төсвийн тухай, Эрүүл мэндийн даатгалын сангийн 2025 оны төсвийн тухай хуулийн төслийг хэлэлцэв.
Монгол Улсын Ерөнхий аудитор Д.Загджав 2025 оны нэгдсэн төсвийн төсөлд өгсөн аудитын дүгнэлтэд Монгол Улсын Их Хурлын Хяналт шалгалтын тухай хуулийн 23 дугаар зүйлийн 23.1-д заасан шалгуурыг хангасан гэж үзсэнийг танилцуулав.
Тэрбээр танилцуулгадаа, 2025 оны нэгдсэн төсвийн төсөлд тэнцвэржүүлсэн орлого 33.9 их наяд төгрөг буюу ДНБ-ий 35.6 хувь, нийт зарлага 35.8 их наяд төгрөг буюу ДНБ-ий 37.7 хувь, төсвийн суурь тэнцэл 1.9 их наяд төгрөгийн ашигтай, тэнцвэржүүлсэн тэнцэл 1.93 их наяд төгрөгийн буюу ДНБ-ий 2.0 хувьтай тэнцэх алдагдалтай байхаар төлөвлөснийг дурдаад, тус Инноваци, цахим бодлогын байнгын хорооны эрхлэх асуудлын хүрээний төсвийн ерөнхийлөн захирагч нар буюу Цахим хөгжил, инновац, харилцаа холбооны болон Монгол Улсын Тэргүүн Шадар сайд бөгөөд Эдийн засаг, хөгжлийн сайдын төсвийг нэг бүрчлэн танилцууллаа. Эдгээр сайд нарын 2025 оны төсвийн төслийг 2024 оны тодотгосон төсөвтэй харьцуулахад Эдийн засаг, хөгжлийн сайдын багцын төсөвт төвлөрүүлэх орлогыг 0.1 тэрбум төгрөгөөр бууруулан төлөвлөжээ.
Нийт зарлага ба цэвэр зээлийн хэмжээг 2024 оны тодотгосон төсвөөс 170.9 тэрбум төгрөгөөр нэмэгдүүлсэн нь Цахим хөгжил, инновац, харилцаа холбооны сайдын урсгал зардлын төсвийг 19.1 тэрбум төгрөгөөр нэмэгдүүлэн 90.1 тэрбум төгрөгөөр, хөрөнгө оруулалтын төсвийг зургаан төсөл, арга хэмжээнд нийт 39.1 тэрбум төгрөгийг улсын төсвөөс, гурван төсөл, арга хэмжээнд 241.6 тэрбум төгрөгийг гадаад зээл тусламжаар санхүүжүүлэхээр, Эдийн засаг, хөгжлийн сайдын урсгал зардлын төсвийг 19.0 тэрбум төгрөгөөр нэмэгдүүлэн 109.7 тэрбум төгрөгөөр, хөрөнгө оруулалтын төсвийг дөрвөн төсөл, арга хэмжээнд нийт 202.6 тэрбум төгрөгийг улсын төсвөөс, долоон төсөл, арга хэмжээнд 33.9 тэрбум төгрөгийг гадаад зээл тусламжаар санхүүжүүлэхээр тус тус төлөвлөсөн нь нөлөөлсөн гэж танилцууллаа.
Алсын хараа
АЛСЫН ХАРАА Монгол Улсын хөгжлийн бодлого, зорилтуудыг хэрэгжүүлэхэд чиглэсэн эдийн…
