Улсын Их Хурлын Төсвийн байнгын хорооны 2024 оны “Аудитын сэдэв батлах тухай” 05 дугаар тогтоолыг үндэслэн “Засгийн газрын өрийн удирдлагын 2023-2025 оны стратегийн баримт бичгийн хэрэгжилт”, “Үр дүнд суурилсан төсөвлөлт, төлөвлөлтийн шилжилтийн үйл явц, үр дүн” сэдэвт аудитуудын нээлтийг Үндэсний аудитын газар зохион байгууллаа.
Засгийн газрын өрийн удирдлагын 2023-2025 оны стратегийн баримт бичгийн хэрэгжилтэд хийх аудит нь Өрийн удирдлагын тухай хуулийн дагуу гүйцэтгэж байгаа арга хэмжээ юм. Аудитын тайланг ирэх дөрөвдүгээр сарын 01-ний дотор Монгол Улсын Их Хуралд хүргүүлэхээр төлөвлөн ажиллаж байна.
Мөн “Үр дүнд суурилсан төсөвлөлт, төлөвлөлтийн шилжилтийн үйл явц, үр дүн” аудитаар энэхүү үйл явцыг үнэлэх, үр дүнтэй хэрэгжүүлэхэд чиглэсэн дүгнэлт, зөвлөмж боловсруулах зорилготой. Улмаар дээрх бодлогын баримт бичгүүдийн хоорондын уялдаа холбоог сайжруулан нэгдсэн зорилгод чиглүүлж, бодлого төлөвлөлтийг төсөвлөлттэй уялдуулан хөгжлийн бодлогын нэгдмэл байдлыг хангах, хөгжлийн бодлогод бодит ахиц дэвшил гаргах, үргүй зардлыг багасгах зэрэг ач холбогдолтой. Уг тайланг энэ оны долдугаар сард Улсын Их Хуралд хүргүүлнэ.
Аудитын нээлтийг Үндэсний аудитын газрын Гүйцэтгэл, нийцлийн аудитын захирал, Тэргүүлэх аудитор Д.Энхболд хийж, Монголбанк, ЗГХЭГ, Засгийн газрын Хяналт хэрэгжүүлэх газар, Сангийн яам, Эдийн засгийн хөгжлийн яам, НЗДТГ зэрэг аудитад хамрагдах байгууллагуудын төлөөлөл оролцлоо.
