ТӨРИЙН АУДИТЫН БАЙГУУЛЛАГА САНХҮҮГИЙН ТАЙЛАНГИЙН АУДИТЫГ ЦАХИМ УДИРДЛАГЫН СИСТЕМ – ПРОГРАММ ХАНГАМЖИЙН ТУСЛАМЖТАЙ ГҮЙЦЭТГЭХ ТӨСӨЛ АРГА ХЭМЖЭЭ ХЭРЭГЖҮҮЛЖ БАЙНА
Харьцангуй хязгаарлагдмал нөөцөөр түүнээс давсан их ачаалал, цар хүрээг хамарсан аудит хийх шаардлага төрийн аудитын байгууллагын өмнө тулгардаг. Энэ шаардлагыг илүү үр нөлөөтэй биелүүлэхэд санхүүгийн аудитыг улсын хэмжээнд нэг цаг хугацаанд нэгтгэж, удирдах, зохион байгуулах шаардлага зүй ёсоор урган гардаг.
Ийм боломжийг гагцхүү аудитын үйл явц, удирдлагын мэдээллийн системийг цахим хэлбэрт шилжүүлснээр бий болгох юм. Өөрөөр хэлбэл аудит хийх, хянах, нэгтгэж удирдах үйл ажиллагааг програм хангамжийн тусламжтай цахим хэлбэрээр хэрэгжүүлэх явдал юм.
СТАУС-ийн (цаашид “систем” гэх) зорилго нь санхүүгийн тайлангийн аудитыг төрийн аудитын байгууллагын хэмжээнд цахим хэлбэрээр хийх, хянах, нэгтгэж удирдах боломж бий болгох явдал юм.
Санхүүгийн тайлангийн аудит хийх стандартчлагдсан арга зүйг цахим хэлбэрт шилжүүлж, улмаар аудитыг улсын хэмжээнд цахим хэлбэрээр нэгтгэж удирдахад системийн зорилго чиглэгдэж байна.
Санхүүгийн тайлангийн аудит хийх ажлыг цахим хэлбэрт шилжүүлэн, нэгтгэж удирдах боломж бий болсноор дээрх хэрэгцээ шаардлагуудыг хангаад зогсохгүй аудитын чанар үр нөлөө дээшилж, төрийн аудитын байгууллага өөрийн чиг үүрэг, зорилго, зорилтоо нэр төртэй биелүүлэхэд ихээхэн тус дэмтэй юм.
Энэхүү зөвлөх үйлчилгээг хэрэгжүүлснээр төрийн аудитын байгууллага хөрөнгө, нөөц хэмнэх бөгөөд мэдээлэл хэрэглэгчдийн хүсэл сонирхолд нийцсэн чанартай ажил үйлчилгээ үзүүлж, хөгжиж буй мэдээллийн нэгдсэн тогтолцоотой хөл нийлүүлэн алхах боломж бүрдэх юм.
Энэхүү систем нь санхүүгийн тайлангийн аудитын бүхий л үйл явцад хамаарах бөгөөд санхүүгийн тайлангийн аудитын цогц систем байх болно.
Системд Үндэсний аудитын газар удирдлага, зохион байгуулалтын чиг үүргийг хэрэгжүүлж, орон нутаг дахь төрийн аудитын байгууллага, түншлэлийн гэрээний үндсэн дээр төрийн аудитын байгууллагатай хамтран ажилладаг зарим хувийн аудитын компанийн аудиторууд системд хандаж, үйл ажиллагаа явуулах боломж бүрдэх юм.
Санхүүгийн тайлангийн аудитын арга зүйг шинэчлэгдэж буй хууль эрх зүйн орчин, олон улсын стандартад нийцүүлэн боловсронгуй болгох, програмчлах ажилд орон нутаг төрийн аудитын байгууллага болон төрийн аудитын байгууллагатай түншлэн ажилладаг байгууллагын аудиторуудын үнэтэй санал, санаачлага нэн чухал тул та бүхэн дээрх төсөл арга хэмжээнд өөрийн хувь нэмэрээ оруулахыг уриалж байна.
Саналыг Үндэсний аудитын газрын Санхүүгийн аудитын газарт хүлээн авна.
