Дундговь аймаг: Нийгмийн халамжийн сангийн хөрөнгийн төлөвлөлт зарцуулалтад нийцлийн аудит хийлээ.
Үндэсний Аудитын газрын харъяа Дундговь аймгийн Аудитын газрын 2015 оны үйл ажиллагааны төлөвлөгөөний дагуу “Нийгмийн халамжийн сангийн хөрөнгийн төлөвлөлт зарцуулалт”-д нийцлийн аудит хийлээ.
Халамжийн тухай хууль, журмын хэрэгжилт, хөрөнгийн зарцуулалтыг шалгаж дүгнэлт гарган, зөвлөмж боловсруулж холбогдох байгууллага, албан тушаалтанд танилцуулах, аудитын үр дүнг олон нийтэд мэдээлэхэд аудитын зорилт чиглэгдэв.
Аудитад Аймгийн Нийгмийн халамж үйлчилгээний хэлтэс болон Сайнцагаан, Дэлгэрхангай, Сайхан-Овоо, Эрдэнэдалай, Дэлгэрцогт, Дэрэн сумдын Нийгмийн халамжийн сангийн 2014, 2015 оны үйл ажиллагааг хамруулан холбогдох баримт материалд тулгуурлан аудитыг хийж гүйцэтгэлээ.
Аудитаар нийт 2,514.0 мянган төгрөгийн зөрчил илрүүлж, 790.0 мянган төгрөгийн хохирлыг нөхөн төлүүлэхээр төлбөрийн акт тогтоож, 1,724.0 мянган төгрөгийн зөрчлийг арилгуулахаар хугацаатай албан шаардлага хүргүүллээ.
Аудитын явцад цуглуулсан нотлох зүйл, аудитын дүнд үндэслэн “Халамжийн сангийн хөрөнгө хууль, журмын дагуу зарцуулагдаж байгаа боловч ахмад настан хөгжлийн бэрхшээлтэй иргэдэд үзүүлэх хөнгөлөлт давхардаж, Олон нийтийн оролцоонд түшиглэсэн халамжийн зарим үйлчилгээний үр дүн хангалтгүй байна.” гэсэн дүгнэлтийг өглөө.
Аудитаас дараах зөвлөмжүүдийг Нийгмийн халамж үйлчилгээний хэлтэст хүргүүллээ. Үүнд:
- Байнгын асаргаатай холбоотой гарсан зөрчлүүдэд дүгнэлт хийж сумдын халамжийн ажилтны ажлын хариуцлагыг сайжруулах хуулиар олгогдсон эрх үүргийг мөрдүүлэх.
- Ахмад настны амралт, сувиллын газарт амрах эрхийн бичгийн хөнгөлөлт, түлшний хөнгөлөлт, сонсголийн аппаратыг “Халамжийн үйлчилгээний менежер” программд бүрэн оруулж, давхардуулан олгосон зөрчлийг арилгаж, цаашид ийм зөрчил гаргахгүй ажиллах
- Сургалтын төлөвлөгөө арга барилыг оролцогчдын идэвх оролцоог нэмэгдүүлэх шаардлагад нийцүүлэн өөрчлөх.
- Олон нийтийн оролцоонд түшиглэсэн халамж үйлчилгээг, зорилтод бүлгийн хэрэгцээ шаардлагад нийцэх байдал, хамрах хүрээ, хүрэх үр дүн, үр өгөөжийг харгалзан сонгож хэрэгжүүлэх
- Олон нийтийн оролцоонд түшиглэсэн халамж үйлчилгээний журам заавар, аргачлалыг мөрдөхөд гарч байгаа хүндрэл бэрхшээлтэй асуудлыг дээд байгууллагад уламжлах
- Гэрээгээр үйлчилгээ үзүүлдэг байгууллагын ажиллах маршрутыг тодорхойлон, хянаж баталгаажуулж ажиллах
- Амьжи ргааг дэмжих зөвлөлийн үйл ажиллагаанд тавих хяналтыг сайжруулах
- Сумдын нийгмийн ажилтнууд мөнгөн хөрөнгийн бүртгэл, олголтын журнал хөтөлж халамжийн санд хяналт тавих боломжийг бүрдүүлэх
- Дотоод хяналт шалгалтын мөрөөр авч хэрэгжүүлэх арга хэмжээ, үр дүнг тооцож, зөрчлийг арилгах ажлыг сайтар зохион байгуулж түүнд дахин хяналт хийх, хүрсэн үр дүнг тайлан мэдээндээ тусгаж ажиллах
- Нийгмийн халамжийн сангийн мэдээллийг шилэн дансны нэгдсэн сүлжээнд тавих боломжийг судалж, нийгмийн халамжийн сангийн талаарх мэдээллийг хэвлэл, мэдээллийн хэрэгсэл болон баг олон нийтийн хуралд танилцуулж иргэдийг мэдээллээр хангах.
