УИХ-ЫН ДАРГА З.ЭНХБОЛД ҮАГ-ЫН ҮЙЛ АЖИЛЛАГААТАЙ ӨӨРИЙН БИЕЭР ИРЖ ТАНИЛЦЛАА

2014 оны 3 дугаар сарын 06 ны өдөр УИХ-ын дарга З. Энхболд ҮАГ-т ирж Төрийн аудитын байгууллагын үйл ажиллагаа, бүтэц, орон тоо, ажлын байрны нөхцөл  байдалтай  танилцаж тус байгууллагын удирдлагуудаас саналыг сонсож зарим асуудлыг шийдвэрлэхээ хэллээ.

Энэ үйл явдал нь Улсын Их Хурлын дарга  Төрийн аудитын байгууллагын ажилтай өөрийн биеэр ирж танилцаж байгаа анхны тохиолдол боллоо. Уг үйл ажиллагаанд УИХ-ын даргын ахлах зөвлөх С.Ламбаа, эдийн засгийн зөвлөх Б.Нарантуяа нар хамт ирж ажиллаа.

Монгол Улсын Ерөнхий аудитор А.Зангад байгууллагынхаа үйл ажиллагааны талаар Улсын Их Хурлын даргад танилцуулахдаа тус газар Төрийн аудитын тухай хуульд оруулсан өөрчлөлтийн дагуу Улсын Их Хурлын Төсвийн байнгын хороогоор байгууллагын бүтцийн схемээ батлуулан босоо тогтолцоонд шилжин, хөндлөнгийн хяналт хэрэгжүүлэх, шинэ бүтцээр чанарын удирдлагын шинэ тогтолцоог хангаж байгаа гэдгийг хэллээ.Үндэсний аудитын газар 2014 оныг чанарын жил болгон зарлаж, чанарын удирдлагын шинэ тогтолцоонд шилжсэнтэй холбогдуулан чанартай тайлан гаргаж Улсын Их Хуралд танилцуулах гол зорилттой ажиллаж байгааг танилцууллаа.