Дундговь аймаг: Орон нутгийн сонгуулийн зардлын дээд хэмжээг тогтоолоо
Аймгийн аудитын газар Сонгуулийн тухай хуулийн 41 дүгээр зүйлийн 41.3 –т “Орон нутгийн хурлын сонгуулийн тухайд төрийн аудитын дээд байгууллагаас тогтоосон жишигт нийцүүлэн аймаг, нийслэл дэх төрийн аудитын салбар байгууллага нь тухайн аймаг, нийслэл, сум, дүүрэг дэх орон нутгийн хурлын сонгуулийн тойрогт нам, эвсэл, нэр дэвшигчээс зарцуулах зардлын дээд хэмжээг санал авах өдрөөс 90-ээс доошгүй хоногийн өмнө тогтооно.” гэж заасны дагуу нам, эвслээс зарцуулах зардлын дээд хэмжээг хуулийн хугацаанд нь тооцож гаргаад аймгийн ИТХ-д хүргүүллээ.
Орон нутгийн хурлын сонгуульд нам эвслээс зарцуулах зардлын дээд хэмжээг 143.0 сая төгрөгөөр тогтоосон.
Энэ нь сонгуульд оролцогч нам, эвсэл бүрт ижил байна.
Тойрогт нэр дэвшигчдийн зарцуулах зардлын дээд хэмжээг тойрог тус бүрээр нь тогтоолоо. Сонгогчийн тоо өрхийн тооноос хамаарч нэг тойрогт 9.0-12.0 сая төгрөгөөр тогтоосон. Сонгуулийн тухай хуулийн 43 дугаар зүйлийн 43.6, 45 дугаар зүйлийн 45.7, 47 дугаар зүйлийн 47.10 дахь заалтуудыг нам, эвсэл, нэр дэвшигч хэрэгжүүлэхдээ энэ тогтоосон сонгуулийн зардлын дээд хэмжээг баримтална.
