ҮНДЭСНИЙ АУДИТЫН ГАЗРААС ХАРААТ БУС ХУВИЙН АУДИТЫН КОМПАНИУДЫН АЖИЛТНУУДАД ЗОРИУЛЖ СУРГАЛТ ЗОХИОН БАЙГУУЛЛАА

Төрийн аудитын байгууллагын мэргэжлийн тасралтгүй сургалтын хөтөлбөрийн хүрээнд Үндэсний аудитын газраас хараат бус хувийн аудитын компаниудын ажилтнуудад зориулж “Төрийн аудитын эрх зүй болон санхүүгийн тайлангийн аудит” сэдвээр 2014 оны 11 сарын 25-26 ны өдрүүдэд сургалт зохион байгууллаа. Тус сургалтад Монгол Улсын хэмжээнд үйл ажиллагаа явуулж байгаа 63 хараат бус хувийн аудитын компанийн 155 гаруй ажилтнууд амжилттай хамрагдаж, Үндэсний аудитын газрын сургалтын гэрчилгээг гардан авлаа.

Хараат бус хувийн аудитын компаниуд нь Үндэсний аудитын газрын нэрийн өмнөөс гэрээгээр ажил гүйцэтгэж ажлын тайлангаа ҮАГ-ын тайланд нэгтгэдэг.Тиймээс хараат бус хувийн аудитын компаниудын ажилтнуудад сургалт хийх зайлшгүй шаардлага гарч ирсэн тул жил бүр уламжлал болгон сургалтыг тасралтгүй зохион байгуулж байна. Сургалтыг хамтран зохион байгуулахад “Улаанбаатар аудит корпораци” ХХК болон “Эрнст энд янг монголия аудит” ХХК оролцлоо.Мөн сургалтын төгсгөлд Төрийн аудитын байгууллагын удирдлагууднийт ажилтнуудтай нээлттэй ярилцлага зохион байгуулж, тэдний асуултад хариулт өгч, санал солилцон, ажлын амжилт хүслээ.