ТӨРИЙН АУДИТЫН БАЙГУУЛЛАГА САНХҮҮГИЙН ТАЙЛАНГИЙН АУДИТЫН УДИРДЛАГЫН СИСТЕМИЙГ НЭВТРҮҮЛЛЭЭ

Харьцангуй хязгаарлагдмал нөөцөөр түүнээс давсан их ачаалал, цар хүрээг хамарсан аудит хийх шаардлага төрийн аудитын байгууллагын өмнө тулгардаг. Энэ шаардлагыг илүү үр нөлөөтэй биелүүлэхэд санхүүгийн аудитыг улсын хэмжээнд нэг цаг хугацаанд нэгтгэж, удирдах, зохион байгуулах шаардлага зүй ёсоор урган гардаг. Ийм боломжийг гагцхүү аудитын үйл явц, удирдлагын мэдээллийн системийг цахим хэлбэрт шилжүүлснээр бий болох юм. Өөрөөр хэлбэл аудит хийх, хянах, нэгтгэж удирдах үйл ажиллагааг програм хангамжийн тусламжтай цахим хэлбэрээр хэрэгжүүлэх явдал юм. Дээрх нөхцлийг бий болгох зорилгоор Үндэсний аудитын газар 2014 онд Улсын төсвийн хөрөнгө оруулалтын их үүсвэрээр санхүүгийн тайлангийн аудитын удирдлагын системийг /СТАУС/ боловсруулах ажил дуусч, аудитад нэвтрүүлэх ажил эхэлж байна.

Санхүүгийн тайлангийн аудит хийх стандартчилагдсан горим, арга зүйг цахим хэлбэрт шилжүүлж, улмаар аудитыг улсын хэмжээнд цахим хэлбэрээр хийх нэгтгэж удирдахад системийн зорилго чиглэгдэж байна.

Санхүүгийн тайлангийн аудит хийх ажлыг цахим хэлбэрт шилжүүлэн, нэгтгэж удирдах боломж бий болсноор дээрх хэрэгцээ шаардлагуудыг хангаад зогсохгүй аудитын чанар үр нөлөө, дээшилж, төрийн аудитын байгууллага өөрийн чиг үүрэг, зорилго, зорилтоо нэр төртэй биелүүлэхэд ихээхэн тус дэмтэй юм.

Өөрөөр хэлбэл СТАУС системийг аудитад нэвтрүүлснээр төрийн аудитын байгууллага хөрөнгө, нөөц хэмнэх бөгөөд мэдээлэл хэрэглэгчдийн хүсэл сонирхолд нийцсэн чанартай ажил үйлчилгээ үзүүлж, хөгжиж буй мэдээллийн нэгдсэн тогтолцоотой хөл нийлүүлэн алхах боломж бүрдэх юм.

Энэхүү систем нь санхүүгийн тайлангийн аудитын бүхий л үйл явцад хамаарах бөгөөд санхүүгийн тайлангийн аудитын цогц систем байх болно.

Системд Үндэсний аудитын газар удирдлага, зохион байгуулалтын чиг үүргийг хэрэгжүүлж, 21 аймаг, нийслэлийн төрийн аудитын байгууллага, түншлэлийн гэрээний үндсэн дээр төрийн аудитын байгууллагатай хамтран ажилладаг зарим хувийн аудитын компанийн аудиторууд системд хандаж, үйл ажиллагаа явуулах боломж бүрдэх юм.