2016 ОНЫ СОНГУУЛИЙН МӨРИЙН ХӨТӨЛБӨРТ ХИЙХ АУДИТЫГ ЭЦЭСЛЭЖ, ДҮГНЭЛТИЙГ СОНГУУЛИЙН ЕРӨНХИЙ ХОРООНД ХҮРГҮҮЛЛЭЭ

УИХ-ын ээлжит сонгуульд оролцох нам, эвсэл, бие даагчийн сонгуулийн мөрийн хөтөлбөрт туссан зорилт, арга хэмжээ нь хөгжлийн бодлого төлөвлөлтийн тухай хууль, төсвийн тогтвортой байдлын тухай хууль, Монгол Улсын тогтвортой хөгжлийн үзэл баримтлал-2030-д нийцсэн эсэх болон эдийн засгийн тооцоо, судалгаанд дүгнэлт гаргах  ажлыг Төрийн аудитын байгууллагаар гүйцэтгүүлэхээр хуульчилсан юм.

Үндэсний аудитын газар Төрийн аудитын тухай хуулийн 15 дугаар зүйлийн 15.1.17-д заасан бүрэн эрхийн хүрээнд УИХ-ын сонгуульд оролцох 15 улс төрийн нам, намуудын сонгуулийн 3 эвсэл, Сонгуулийн тухай хуулийн 67 дугаар зүйлийн 67.5.2-т заасан 103 бие даагчийн сонгуулийн мөрийн хөтөлбөрт 2016 оны 4 дүгээр сарын 20-оос 5 дугаар сарын 10-ны өдөр хүртэлх хугацаанд дүгнэлт гаргаж Сонгуулийн ерөнхий хороонд хүргүүллээ.

Мөн Үндэсний аудитын газрын харьяа орон нутаг дахь салбар аудитын газрууд аймаг нийслэлийн ИТХ-ын сонгуульд оролцох 325 бие даан нэр дэвшигчийн сонгуулийн мөрийн хөтөлбөрт аудит хийж дүгнэлтийг сонгуулийн хороодод хүргүүлсэн байна.