АУДИТАД МЭДЭЭЛЛИЙН ТЕХНОЛОГИ АШИГЛАХ, ХӨГЖҮҮЛЭХ ЗАРИМ АСУУДАЛ СЭДВЭЭР ТӨРИЙН АУДИТЫН БАЙГУУЛЛАГЫН ХҮРЭЭНД ХЭЛЭЛЦҮҮЛЭГ ЗОХИОН БАЙГУУЛЛАА
Монгол Улсын Ерөнхий аудиторын 2016 оны А/53 дугаар тушаалаар батлагдсан санхүүгийн тайлангийн аудитын удирдлагын системийг хөгжүүлэх зарим ажлын төлөвлөгөөний дагуу “Аудитад мэдээллийн технологийг ашиглах, хөгжүүлэх зарим асуудал” сэдвийн дор Үндэсний аудитын газар, Нийслэлийн аудитын газар орон нутгийн аудитын газрын удирдлага, менежер, аудиторуудын дунд 2016 оны 6 дугаар сарын 22-ны өдөр хэлэлцүүлэг зохион байгууллаа.
Хэлэлцүүлгийг нээж Монгол Улсын Ерөнхий аудитор А.Зангад үг хэллээ.
Хэлэлцүүлэгт Үндэсний аудитын газар, Нийслэлийн аудитын газар, 15 аймгийн аудитын газрын 144 ажилтан оролцож, хөтөлбөрийн дагуу Стратегийн удирдлагын газрын дарга, тэргүүлэх аудитор Б.Өлзий “Төрийн аудитын байгууллагын мэдээлэл, харилцаа холбооны технологийн хөгжлийн талаар баримтлах бодлого”
Санхүүгийн аудитын газрын ахлах аудитор Ж.Батсайхан “Санхүүгийн тайлангийн аудитын удирдлагын системийг турших, аудитад нэвтрүүлэх ажлын талаар товч танилцуулга, тулгамдаж байгаа зарим асуудал”
Гүйцэтгэлийн аудитын газрын шинжээч Б.Хишигтогтох “Гүйцэтгэлийн аудитын үе шатны ажлыг цахим хэлбэрт шилжүүлэх бодлого, үйл ажиллагаа, тулгамдаж байгаа асуудлууд”
Тамгын газрын шинжээч Н.Галбадрах “Аудитыг цахим хэлбэрт шилжүүлэхэд төрийн аудитын байгууллагын мэдээллийн технологийн дэд бүтэц, техник хангамж, мэргэжлийн боловсон хүчний боломж нөөц”
Төв аймгийн аудитын газрын дарга, тэргүүлэх аудитор Л.Жаргалсайхан, Нийслэлийн аудитын газрын ахлах аудитор Ц.Батсүх нар “Санхүүгийн аудитын шинээр батлагдсан бодлого, арга зүйг цахим хэлбэрт шилжүүлэхэд орон нутагт тулгарч байгаа асуудал” сэдвээр тус тус илтгэл тавилаа.
Хэлэлцүүлгийн дараалал дэгийн дагуу оролцогчид дараах 3 чиглэлээр салбар хуралдаанд оролцож, асуудал тус бүрээр нэгтгэсэн санал, санаачлаг гарган хэлэлцүүлсэн юм. Үүнд:
- Гүйцэтгэлийн болон санхүүгийн тайлангийн аудит хийх үйл явц, бодлого, журам, маягт аргачлалын төлөвшил, өнөөгийн нөхцөл байдал нь тэдгээрийг цахим хэлбэрт шилжүүлэхэд хэрхэн нөлөөлж байгаа талаар
- Аудитад мэдээллийн технологийг ашиглах, бодлого аргачлалыг цахим хэлбэрт шилжүүлэхэд мэдээллийн технологийн орчин, нөхцөл бий болсон эсэх
- Мэдээллийн системийн дэд бүтэц
- Техник тоног төхөөрөмжийн хангамж
- Боловсон хүчний боломж нөөц
- Санхүүгийн эх үүсвэр
- Төрийн аудитын байгууллагын хүрээнд аудитыг цахим хэлбэрт шилжүүлэх бодлого, үйл ажиллагааны хэрэгжилт, ажлын явц, үр дүн, цаашид хөгжүүлэх бодлого
- Санхүүгийн тайлангийн аудитын удирдлагын систем
- Хөрөнгө оруулалтын програм
- Гүйцэтгэлийн аудитын удирдлагын систем гэсэн асуудлуудыг хөндөн ярилцлаа.
Тус хэлэлцүүлэгт оролцогчид нийт 286 санал, санаачлагыг илэрхийлж, мэдээллийн технологийг аудитад нэвтрүүлэх, СТАУС-ийг хэрхэн хөгжүүлэх талаар нээлттэй ярилцаж, хэлэлцсэн асуудалд дүн шинжилгээ хийж тус хэлэлцүүлэг өндөрлөлөө.
