Дундговь: Монгол Улсын Их Хурлын болон аймаг, нийслэлийн иргэдийн Төлөөлөгчдийн Хурлын сонгуулийн зардлын гүйцэтгэлд хийсэн гүйцэтгэлийн аудит

Үндэсний Аудитын газрын харъяа Дундговь аймгийн Аудитын газрын 2015 оны үйл ажиллагааны төлөвлөгөөний дагуу “Монгол Улсын Их Хурлын болон аймаг, нийслэлийн иргэдийн Төлөөлөгчдийн Хурлын сонгуулийн зардлын гүйцэтгэл”-д гүйцэтгэлийн аудит хийлээ. 

Монгол Улсын Их Хурлын болон аймаг, нийслэлийн иргэдийн Төлөөлөгчдийн Хурлын сонгуулийн зардлын гүйцэтгэлд аудит хийж, дүгнэлт, зөвлөмж өгөхөд аудитын зорилт чиглэгдсэн.

Уг зорилтыг хангахын тулд дараах чиглэлээр аудитыг хийсэн болно. Үүнд:

• УИХ-ын болон аймаг, нийслэлийн ИТХ-ын сонгуулийг зохион байгуулах хөрөнгийг холбогдох хууль, журмын дагуу зарцуулсан эсэх.
• Хөрөнгийн зарцуулалтад тавих хяналт үр дүнтэй эсэх.

Аудитын явцад нийт 4.4 сая төгрөгийн зөрчил илрүүлж, 0.2 сая төгрөгийн зөрчлийг нөхөн төлүүлэхээр төлбөрийн акт тогтооож, 4.2 сая төгрөгийн зөрчлийг арилгуулахаар хугацаатай албан шаардлага хүргүүлж ажиллалаа.

Аудитын нотлох зүйл, дүнд үндэслэн “Улсын Их Хурал, аймгийн иргэдийн Төлөөлөгчдийн Хурлын  сонгууль зохион байгуулах зардлыг Сонгуулийн Ерөнхий Хорооноос өгсөн чиглэлийн дагуу зарцуулжээ. ” гэж дүгнэлээ.

Дундговь аймгийн иргэдийн Төлөөлөгчдийн Хурлын сонгууль зохион байгуулах зардлын гүйцэтгэлд хийсэн гүйцэтгэлийн аудитаас Сонгуулийн Ерөнхий Хороонд уламжлуулахаар ҮАГ-т дараах саналыг хүргүүллээ. Үүнд:

1. Сонгуулийн Ерөнхий Хорооны 2016 оны 03 дугаар сарын 2-ны өдрийн 04 дүгээр тогтоолоор батлагдсан ”Сонгуулийн хороодод төсөв хуваарилах, зарцуулах, түүнд хяналт тавих, тайлан гаргах тухай журам”-ын 2.2, 2.3 дахь заалтууд мөрдөгдөхгүй байгааг анхаарах.
2. Сонгууль зохион байгуулахад гарах зардлын зүйл тус бүрд ямар зардлууд орох талаар журамд тодорхой тусгах
3. Аймгийн сонгуулийн хороог хуульд заасан үүргүүдийг бүрэн хэрэгжүүлсний дараа татан буулгах.
4. Сонгуулийн тухай хуулийн 23.3-т /Баг, хороог бусад баг, хороотой нийлүүлж хэсэг байгуулахыг хориглох бөгөөд сонгогчдын тооноос хамааран баг, хороог хувааж хэсэг байгуулж болно./ гэж заасан нь хүн ам багатай аймгийн хувьд хэрэгжүүлэхэд хүндрэлтэй, сонгууль зохион байгуулах зардал өндөр гарах үр дагаврыг бий болгохоор байна. Иймд тус хуулийн заалтыг тохиромжтой байдлаар өөрчлөх саналтай байна.

Тайланг энд дарж үзнэ үү

АУДИТЫН ГАЗАР

2016 он