Дундговь: Аймгийн Иргэдийн Төлөөлөгчдийн хурлын 2016 оны ээлжит сонгуулийн хандивын жагсаалт

Үндэсний Аудитын газрын харьяа Дундговь аймгийн Аудитын газар аймгийн иргэдийн Төлөөлөгчдийн Хурлын 2016 оны ээлжит сонгуулийн зардлын тайланд аудит хийж тайланг холбогдох газруудад хүргүүлэв.

Дундговь аймгийн иргэдийн Төлөөлөгчдийн Хурлын сонгуульд нэр дэвшиж, бүртгүүлсэн 119 нэр дэвшигчээс, 78 нэр дэвшигч сонгуулийн зардлын тайлангаа хуульд заасан хугацаанд сонгуулийн байгууллагад хүргүүлсэн байна.

Сонгуулийн тухай хуулийн 60.3-д “Төрийн аудитын байгууллага зардлын тайланг хянаж, хүлээн авсан өдрөөс хойш 90 хоногийн дотор дүнг нийтэд мэдээлэх ба нэг сая ба түүнээс дээш төгрөгийн хандив өгсөн иргэн,  хоёр сая ба түүнээс дээш төгрөгийн хандив өгсөн хуулийн этгээдийг нийтэд зарлана” гэж заасны дагуу 35 нэр дэвшигчид 78 иргэнээс өгсөн 118,400.5 мянган төгрөгийн хандивыг нийтэд зарлаж байна. Аудитын газарт ирүүлсэн нэр дэвшигчдийн сонгуулийн зардлын тайлангуудад  2 сая төгрөгөөс дээш хандив өгсөн хуулийн этгээд байхгүй болно.

Аймгийн иргэдийн Төлөөлөгчдийн Хурлын 2016 оны ээлжит сонгуульд оролцсон намуудын хувьд Сонгуулийн тухай хуулийн 60.3-т заасны дагуу нийтэд зарлах хандив байхгүй байна.

Тайлан ирүүлсэн нэр дэвшигчдээс АН-ын Сайнцагаан сумын 16-р тойрогт нэр дэвшигч Б.Цэрэнчунт,  Сайнцагаан сумын 13-р тойрогт нэр дэвшигч Ш.Батбаатар, Сайнцагаан сумын 15-р тойрогт нэр дэвшигч Н.Мэндсайхан, Сайнцагаан сумын 17-р тойрогт нэр дэвшигч Д.Оюунчимэг, Эрдэнэдалай сумын 23-р тойрогт нэр дэвшигч Б.Лхагвамандал, Ч.Пүрэвсүрэн, Б.Сугар нарын 7 нэр дэвшигч хандивын тайлан, дансны хуулга гаргаж өгөөгүй тул эдгээр нэр дэвшигчдэд өгсөн хандивын мэдээллийг зарлах боломжгүй байлаа.

Аймгийн иргэдийн Төлөөлөгчдийн Хуралд оролцсон 19 нэр дэвшигчийн сонгуулийн зардлын дансанд 22 иргэнээс өгсөн нийт 9,430.5 мянган төгрөгийн хандив шилжүүлсэн баримтанд регистрийн дугаар бичигдээгүй байна. Дээрх хандивыг хүлээн авч, сонгуулийн зардалд зарцуулсан нь Сонгуулийн тухай хуулийн 50 дугаар зүйлийн 50.4-д ” Хандив өгч байгаа иргэн, хуулийн этгээд нь регистрийн дугаараа банкны гүйлгээний баримтад заавал тусгах бөгөөд энэ шаардлагыг хангаагүй хандивыг хандив хүлээн авагч буцаан шилжүүлнэ.” гэсэн заалтыг зөрчсөн байна.

Нэг сая ба түүнээс дээш төгрөгийн хандив өгсөн иргэдийн жагсаалтыг энд дарж үзнэ үү