ТӨРИЙН АУДИТЫН БАЙГУУЛЛАГЫН САНХҮҮГИЙН ТАЙЛАНГИЙН АУДИТАД ТҮНШИЙН ҮНЭЛГЭЭ ХИЙЛЭЭ

Дэлхийн банкны буцалтгүй тусламжаар “Төрийн аудитын чадавхыг бэхжүүлэх төсөл” Монгол Улсын Үндэсний аудитын газарт 2016 оноос эхлэн 2 жилийн хугацаатай хэрэгжиж байна.

Тус төслийн хүрээнд Монгол Улсын Төрийн аудитын байгууллагын чадавхыг бэхжүүлэх хэд хэдэн томоохон ажлууд хийгдэх бөгөөд үүний нэг нь Төрийн аудитын байгууллагын санхүүгийн тайлангийн аудитын үйл ажиллагаанд түншийн үнэлгээ хийх юм. Төрийн аудитын байгууллагын санхүүгийн аудитын үйл ажиллагаанд түншийн үнэлгээ хийлгэснээр тус байгууллагын давуу, сул талуудыг хөндлөнгөөс үнэлж, нэн тэргүүнд сайжруулах шаардлагатай чиглэлүүдийг тодорхойлж өгнө.

Нэгдсэн Вант Улс /Англи/-ын Үндэсний аудитын газар энэхүү түншийн үнэлгээг хийхээр сонгогдон, хоёр орны Аудитын дээд байгууллагууд түншийн үнэлгээний гэрээг 2016 оны 11 дүгээр сарын 1-ний өдөр байгууллаа.

Гэрээнд заасны дагуу Нэгдсэн Вант Улсын Үндэсний аудитын газрын Санхүүгийн аудитын менежер Корин Таннер, ахлах аудитор Анна Вожтал нарын бүрэлдэхүүнтэй түншийн үнэлгээний баг 2016 оны 11 дүгээр сарын 14-25-ны өдрүүдэд Монгол Улсын Үндэсний аудитын газарт ажиллав.

Ажлын айлчлалын хүрээнд Түншийн үнэлгээний баг Үндэсний аудитын газрын удирдлага болон Төрийн аудитын байгууллагын менежер, ахлах аудитор шинжээч нартай Төрийн аудитын байгууллагын үйл ажиллагаа, санхүүгийн тайлангийн аудитын талаар үр өгөөжтэй уулзалтуудыг зохион байгууллаа.

Нэгдсэн Вант Улсын Үндэсний аудитын газрын түншийн үнэлгээний баг Төрийн аудитын байгууллагын санхүүгийн тайлангийн аудитын үйл ажиллагаанд хийсэн түншийн үнэлгээний тайланг 2016 оны 12 дугаар сарын 30-ны өдөр Монгол улсын Ерөнхий аудиторт хүргүүлнэ.