2012 онд Монгол улсын эдийн засаг, нийгмийг хөгжүүлэх үндсэн чиглэлийн хэрэгжилт

Тайлан

Аудитын зөвлөмж

Аудитын дүн, дүгнэлтэд үндэслэн дараах арга хэмжээг авч хэрэгжүүлэхийг дор дурдсан албан тушаалтанд зөвлөж байна.

Эдийн засгийн хөгжлийн сайд Н.Батбаярт:

    Улсын эдийн засаг, нийгмийг хөгжүүлэх Үндсэн чиглэлд тусгах бодлогын зорилтыг томъёолох, түүнд хүрэх арга хэмжээнүүдийг тодорхойлон хэрэгжих хугацаа, шаардагдах санхүүгийн болон бусад нөөцийг төлөвлөж баталгаажуулах, хэрэгжилт үр дүнг тооцох шалгуурыг тогтоох стандарт, арга зүйг бий болгож, дагаж мөрдөхөд чиглэсэн санал боловсруулж, зохих журмын дагуу шийдвэрлүүлэх,

    Улсын эдийн засаг нийгмийг хөгжүүлэх 2012 оны Үндсэн чиглэлийн хэрэгжилт дутуу арга хэмжээнүүдийг нягтлан үзэж, эдийн засаг нийгмийн ач холбогдол, хэрэгцээ шаардлагыг харгалзан биелэлтийг хангах арга хэмжээ авах,

    Үндсэн чиглэлийг хангалтгүй хэрэгжүүлсэн байгууллага, албан тушаалтанд ажлын хариуцлага тооцох тогтолцоо, эрх зүйн орчныг бүрдүүлэх,

    Улсын эдийн засаг, нийгмийг хөгжүүлэх бодлогын зорилт, арга хэмжээний саналуудын томъёолол, үндэслэл, тооцоог сайтар нягтлан боловсруулж, шаардагдах санхүүгийн болон бусад нөөцөөр баталгаажсан, хүрэх үр дүн, түүнийг тооцох шалгуур нь тодорхойлогдсон зорилт, арга хэмжээг Үндсэн чиглэлд тусгаж байх,

Төсвийн ерөнхийлөн захирагч нарт:

    Улсын эдийн засаг, нийгмийг хөгжүүлэх 2012 оны Үндсэн чиглэлд тусгагдсан хэрэгжилт дутуу буюу хэрэгжээгүй зорилт, арга хэмжээний биелэлтийг нягтлан үзэж, ач холбогдол, хэрэгцээ шаардлагыг харгалзан биелэлтийг хангах арга хэмжээг авч ажиллах,

    Үндсэн чиглэлийн зорилт, арга хэмжээний төлөвлөлт, хэрэгжилтийн зохион байгуулалтыг сайжруулах, тайлагналын явцад хяналт-шинжилгээ хийж, үр дүнг тооцож ажиллах,

    Үндсэн чиглэлд улсын төсөв болон бусад эх үүсвэрээр хэрэгжүүлсэн зорилт, арга хэмжээний хэрэгжилтийг төлөвлөсөн болон батлагдсан санхүүжилт, түүний гүйцэтгэлтэй уялдуулан үнэн зөв, бодитой тайлагнаж байх.