Төрийн аудитын байгууллагын 2011 оны жилийн эцсийн статистик мэдээг нэгтгэж, дүгнэсэн тухай

МУ-ын Ерөнхий аудиторын 64 дүгээр тушаалаар ’’Төрийн аудитын байгууллагын үйл ажиллагаанд дотоод аудит, мониторинг хийх журам’’-ын5 дугаар бүлэг болон холбогдох хавсралтуудыг шинэчлэн батлуулж, батлагдсан 7 маягт, зааврын дагуу төрийн аудитын төв байгууллагын нэгж, аймаг, нийслэлийн аудитын газруудын 2011 оны үйл ажиллагааны үр дүнгийн статистик мэдээллийг нэгтгэж, дүн шинжилгээ хийснийг танилцуулж байна. Орон нутгийн аудитын байгууллагууд 1,2,4-р улирлын статистик мэдээг цаасаар болон электрон шуудангаар тогтоосон хугацаанд бүрэн ирүүлж байгаа боловч харилцан зөрүүтэй, алдаатай тоо мэдээллийг ирүүлсээр байна. Тухайлбал, Архангай, Баян-өлгий, Булган, Говьсүмбэр, Дорноговь, Сүхбаатар, Сэлэнгэ, Төв, Хөвсгөл, Нийслэлийн аудитын газруудаас бусад газрууд дунджаар 6 алдаа, зөрүүтэй мэдээлэл ирүүлснийг хянаж, зохих ёсоор залрууллаа

1. Гүйцэтгэлийн аудит:

Төрийн аудитын төв, орон нутгийн байгууллагын хэмжээгээр 2011 онд гүйцэтгэлийн аудит 348-ыг хийхээр төлөвлөснөөс 358-ыг гүйцэтгэсэн буюу төлөвлөгөө 102,9хувиар биелжээ.

Түүнчлэн, төлөвлөгөөнд тусгагдаагүй аудит 14-ийг хийсэн нь урьд оныхоос 41-ээр цөөн байгаа бөгөөд оны дүнгээр ТАБ-ын хэмжээнд гүйцэтгэлийн аудит бүгд 358-ыг хийжээ.

Гүйцэтгэлийн аудитаар 2011 онд бүгд 4735 байгууллагын үйл ажиллагааг хамруулсны дотор улс, орон нутгийн төсвийн 3340 байгууллага, төрийн болон орон нутгийн өмчит 104 компани, 127 төсөл, хөтөлбөр, хувийн хэвшлийн 1164 аж ахуйн нэгж байна. Энэ нь урьд оныхоос төсвийн байгууллагын тоо 18,6 хувь, төсөл хөтөлбөрийн тоо 2,6 дахин өсжээ.

ТАБ-ын хэмжээгээр авч үзэхэд 2011 онд төлөвлөж, гүйцэтгэсэн аудитын тоо өнгөрсөн онтой харьцуулахад 29,1 хувиар буюу 287-оор цөөн, сүүлийн дөрвөн жилийн дундажтай харьцуулахад 27,4 хувиар буурч, энэ онд аудитад хамрагдсан байгууллага, нэгжийн тоо 6,6 хувиар өссөн нь хамарсан асуудлын цар хүрээ өргөжиж улс, орон нутгийн чанартай нийтлэг асуудлыг хөндсөн асуудалд аудитын сэдвийн 55,6 хувийг чиглүүлж байгаа нь нөлөөлж байна.

Өнгөрсөн онд Завхан, Увс, Говь-Алтай, Баян-Өлгий, Ховд аймгийн аудитын газрууд 36-36 гүйцэтгэлийн аудит хийсэн нь орон нутгийн аудитын байгууллагуудын дундажтай харьцуулахад 10-20-оор олон, Орхон, Булган, Говьсүмбэр, Хэнтий аймгийн аудитын газрууд 4-8 аудит хийсэн нь дунджаас 8-12-оор цөөн байна.

Аудитаар илрүүлсэн зөрчил, дутагдал, аудитын үр өгөөжийн дүн нэмэгдэж байгаа нь Төрийн аудитын байгууллагын удирдах ажилтны зөвлөгөөнөөр 2011 онд ‘’Гүйцэтгэлийн аудитыг бэхжүүлж, төлөвшүүлэх нь’’ зорилт дэвшүүлэн ажиллаж, гүйцэтгэлийн аудитын үр нөлөө, үр өгөөжийг дээшлүүлэхэд аудитын сэдвийг оновчтой, зөв сонгож байгаа болон аудитын газруудын бүтэц, орон тоо, үйл ажиллагааны зохион байгууллалттай холбоотой байна.

Гүйцэтгэлийн аудитын өмнөх оноос шилжиж ирсэн болон тайлант онд нийт 2837 зөвлөмжийн 76,4 хувь буюу 2169-ийг хэрэгжүүлсний 10,0 хувь нь арвилан хэмнэх, 20,6 хувь нь үр ашгийг дээшлүүлэх, 22,3 хувь нь үр нөлөөг сайжруулахад чиглэгджээ. 2011 онд өгсөн зөвлөмжийн 75,2 хувийг биелүүлсэн нь зөвлөмжийн хэрэгжилтийг тооцох хугацаа болоогүй нь нөлөөлжээ.

1. Санхүүгийн тайлангийн аудит:

ТАБ-ын хэмжээнд 2011 онд Төсвийн ерөнхийлөн захирагчдын нэгтгэсэн болон улсын төсвийн байгууллагын орон нутгийн түвшинд нэгтгэсэн, улс, орон нутгийн төсвийн байгууллага, төрийн болон орон нутгийн өмчит хуулийн этгээдийн 3145 санхүүгийн тайланд аудит хийсний 75,7 хувийг нь төрийн аудитын төв, орон нутгийн байгууллага, үлдэх 24,3 хувийг Улаанбаатар хот болон аймгууд дахь хувийн хэвшлийн аудитын компаниудаар гэрээгээр хийлгүүлжээ.

Санхүүгийн тайлангийн аудитын тоо сүүлийн 3 жилийн дунджаас 8,8 хувиар, үүний дотор төрийн аудитын байгууллагын хийсэн санхүүгийн тайлангийн аудитын тоо 5,2 хувиар, гэрээгээр хийлгэсэн аудитын тоо 5,2 хувиар тус тус нэмэгдсэн нь аймаг, нийслэлийн аудитын газрууд гэрээгээр хийлгэх аудитын журмыг мөрдөж хэвшүүлсэн, орон нутагт байршилтай улсын төсвийн байгууллага, төрийн өмчит хуулийн этгээдийн үйл ажиллагаанд ҮАГ-ын нэрийн өмнөөс аудит хийж байх эрхийг аймаг, нийслэлийн аудитын газруудад олгосон, зарим аудитын газруудын бүтэц өөрчлөгдөж, ажиллагсдын тоо өссөн нь нөлөөлжээ.

            Төрийн аудитын байгууллага санхүүгийн тайлангийн аудитаар нийт 5585,4 тэрбум төгрөгийн зөрчил илрүүлж, илрүүлсэн зөрчлийн 9,7 хувь болох 542,0 тэрбум төгрөгийн зөрчлийг санхүүгийн тайланд залруулж тусгуулж, мөн аудитаар илрүүлсэн алдаа зөрчил үнийн дүнгээр урьд оны мөн үеийнхээс 11,4 хувиар буурсан нь шинэ журам заавраар эрсдлийн аудитыг бусад аудит гэсэн маягтад харуулах болсон, аудитын зөвлөмжийн хэрэгжилттэй холбоотой байна.

Санхүүгийн тайлангийн аудитаар өгсөн санал дүгнэлтийн 76,3 хувийг зөрчилгүй, 18,8 хувийг хязгаарлалттай, 3,1 хувийг сөрөг санал дүгнэлт эзэлж, харин 1,8 хувьд нь дүгнэлт гаргахаас татгалзжээ. Өнгөрсөн онтой харьцуулахад зөрчилгүй санал дүгнэлтийн тоо 3,9 хувиар өсч, хязгаарлалттай санал дүгнэлтийн тоо 9,3 хувиар, сөрөг санал дүгнэлтийн тоо 34,9 хувиар буурчээ.

                  САНХҮҮГИЙН АУДИТЫН САНАЛ, ДҮГНЭЛТ

1. Бусад аудит:

2011 онд нийт 3921,5 тэрбум төгрөгийн санхүүгийн үнэлгээ бүхий 92 эрсдлийн болон нийцлийн аудит гүйцэтгэжээ. Аудитад 878 аж ахуйн нэгж, байгууллагыг хамруулсны бараг 50,0 хувийг нь төсвийн байгуулага, 44,6 хувийг нь хувийн хэвшлийн аж ахуйн нэгж эзэлж байгаа бөгөөд аудитаар 384,6 тэрбум төгрөгийн алдаа зөрчил илрүүлжээ. Булган, Ховд аймгийн аудитын газрууд хамгийн олон 10-12 эрсдлийн болон нийцлийн аудит хийжээ.

1. Аудитын үр өгөөж:

Тайлант хугацаанд нийт 2880 санхүүгийн болон санхүүгийн бус үр өгөөжийг бүртгэж, бүртгэсэн санхүүгийн үр өгөөжийн мөнгөн дүнгийн үнэлгээ 227.2 тэрбум төгрөг болжээ.

Гүйцэтгэлийн аудит, санхүүгийн тайлангийн болон бусад аудит, судалгаа шинжилгээний ажлын үр дүнгээр 227.2 тэрбум төгрөгийн үр өгөөж бүртгэж, 181.0 тэрбум төгрөгийн санхүүгийн үр өгөөжийг тооцоолж 148.8 тэрбум төгрөг буюу 82.2 хувийг нь харилцагч байгууллагаар хүлээн зөвшөөрүүлсэн нь урьд оныхоос 45.1 тэрбум төгрөгөөр нэмэгджээ.

            Төрийн аудитын байгууллага улсын төсвөөс авсан нэг төгрөгийн санхүүжилтийн хариуд 38.86 төгрөгийн үр өгөөжийг харилцагч байгууллагаар хүлээн зөвшөөрүүлсэн нь урьд оныхоос 20.2 хувиар өсжээ.  

            Аймаг, нийслэлийн аудитын газрууд нийтдээ 97,8 тэрбум төгрөгийн 1783 санхүүгийн үр өгөөж тооцоолсноос 86.8 тэрбум төгрөгийн 1767 үр өгөөжийг холбогдох байгууллагаар хүлээн зөвшөөрүүлжээ. Аймаг, нийслэлийн аудитын газруудын төсвийн гүйцэтгэлийн нийт дүн 2804,3 сая төгрөгтэй харьцуулбал орон нутгийн дундаж үр өгөөж 30.96 төгрөг гарч байна. Үүний дотроос, нийслэлийн аудитын газар 39,4 тэрбум төгрөгийн 146 санхүүгийн үр өгөөж тооцсоноо бүрэн хүлээн зөвшөөрүүлж санхүүжилтын 1 төгрөгт ногдох үр өгөөжийг 107,84 төгрөгт хүргэсэн нь салбарын хамгийн өндөр үзүүлэлт болж байна. Өмнөговь аймгийн аудитын газар 4,6 тэрбум төгрөгийн санхүүгийн үр өгөөж бий болгож, санхүүжилтийн 1 төгрөгт ногдох үр өгөөжийг 48,69 төгрөг, Дорноговь аймгийн аудитын газар 4,0 тэрбум төгрөгийн санхүүгийн үр өгөөж бий болгож, санхүүжилтийн 1 төгрөгт ногдох үр өгөөжийг 37,69 төгрөг, Баян-Өлгий аймгийн аудитын газар 3,9 тэрбум төгрөгийн санхүүгийн үр өгөөж бий болгож, санхүүжилтийн 1 төгрөгт ногдох үр өгөөжийг 35,14 төгрөг, Ховд аймгийн аудитын газар 4,2 тэрбум төгрөгийн санхүүгийн үр өгөөж бий болгож, санхүүжилтийн 1 төгрөгт ногдох үр өгөөжийг 35,13 төгрөгт тус тус хүргэсэн нь бусдаасаа харьцангуй өндөр байна.    

            Тайлант хугацаанд бий болгосон үр өгөөжийг өнгөрсөн оны дундаж түвшин болох 32,32 төгрөгтэй харьцуулбал Ховд, Баян-Өлгий, Дорноговь, Өмнөговь, Нийслэлийн аудитын газруудынх 2,81-75,52 төгрөгөөр дээгүүр байхад бусад аудитын газруудынх 4,3-30,91 төгрөгөөр доогуур байна. Дундговь, Дорнод, Орхон, Өвөрхангай аймгийн аудитын газрууд 1,41-5,18 төгрөгийн үр өгөөж бий болгосон нь хамгийн бага байна.

2010 онд Аудитын үр өгөөжийг дээшлүүлж, арга зүйгээ боловсронгүй болгох зорилт дэвшүүлж, удирдах ажилны зөвлөгөөн дээр Монгол улсын Ерөнхий аудитор төрийн аудитын байгууллага өмнөх оны 1 төгрөгт ногдох үр өгөөжийн хүрсэн түвшинд ойртуулах, хүргэх, хүрсэн түвшингээс ахиулах зорилт тавин ажиллахыг зөвлөсний дагуу тодорхой ажлыг зохион байгуулж, аудитын байгууллага бүр тодорхой хэмжээнд үр өгөөжийг төлөвлөж, бодитойгоор хэрэгжүүлж, бүртгэсэн, бий болсон үр өгөөжийг тооцоолж, холбогдох үр өгөөж хүртэгч талаар хүлээн зөвшөөрүүлсэн мэдээлэл ирүүлж байгаа боловч цаашид агуулгын хувьд илүү чанаржуулах шаардлагатай байна.

Тухайлбал: Санхүүгийн тайланд хийсэн залруулгын дүнгээр, хөрөнгө, материал нягтлан бодох бүртгэлд тусгаагүй, байгууллагуудын үйл ажиллагааны үр дүнд орлогын төлөвлөгөө давуулан биелүүлсэн, батлагдсан төсвийг хэмнэлттэй зарцуулсан болон хэтрүүлсэн, хөрөнгө оруулалтын ажил бүрэн хийж дуусаагүй нөхцөлд урьдчилан санхүүжилт өгсөн байдлыг тоон дүнгээр, байгууллагуудын харилцах дансны үлдэгдлийг холбогдох хууль журмыг зөрчиж шууд төсвийн орлого болгож байгааг, өр авлагын тооцоо нийлээгүй байдалд тоон дүнгээр тооцсон, хүний хөгжил сангаас олгож байгаа хишиг хувь хүртээх мөнгөний үлдэгдэл, санхүүгийн бус үр өгөөж буюу чанарын сайжрал бий болсон байдлыг тоон дүнгээр авч санхүүгийн үр өгөөжид тооцож үр өгөөжийн нотлох баримтууд ойлгомжгүй, хагас дутуу явуулсан алдаанууд байна.

1. Аудитын үр дүн:

     а.Зөвлөмж:

Тайлант онд гүйцэтгэлийн болон санхүүгийн тайлангийн аудитаар 8331 аудитын зөвлөмж өгөгдсөн ба өмнөх оноос шилжиж ирсэн 1581 зөвлөмжийг оруулаад нийт зөвлөмжийн 85,6 % буюу 8485-ыг хэрэгжүүлээд байна. Үлдэх 14,4% буюу 1427 хэрэгжих шатандаа болон хугацаа болоогүй шалтгаанаар 2012 онд шилжихэд Орхон, Нийслэл, Дорноговь аймгийн, Санхүүгийн аудитын газруудад 129-324 зөвлөмж дараа онд шилжиж байгаа нь нөлөөлжээ.

2011 онд шинээр өгсөн зөвлөмжийн 85,5 хувь болох 7124 зөвлөмжийг хэрэгжүүлсний 23,9 хувь нь гүйцэтгэлийн аудитаар өгсөн зөвлөмж байна.  

            Тайлант хугацаанд хэрэгжүүлсэн зөвлөмжийн 32,0 хувь нь дотоод хяналтыг сайжруулах, 15,1 хувь нь үр ашгийг дээшлүүлэх, 8,0хувь нь арвилан хэмнэх, 16,8 хувь нь үр нөлөөг сайжруулахад чиглэгджээ.

ТӨРИЙН АУДИТЫН БАЙГУУЛЛАГЫН 2011 ОНД ХЭРЭГЖҮҮЛСЭН ЗӨВЛӨМЖ /хувь/

            Гүйцэтгэлийн болон санхүүгийн тайлангийн аудитад хамрагдсан байгууллагын 72,7 -91,9 хувийг улс, орон нутгийн төсвийн байгууллага, төрийн болон орон нутгийн өмчит аж ахуйн нэгж эзэлж байгаа нь дээрхи байгууллагуудад төсөв, хөрөнгийн зарцуулалт, хадгалалт, хамгаалалт, бүртгэл хөтлөлтөд тавих дотоод хяналт болон зөвлөмжийн чанар үр нөлөөг сайжруулах шаардлагатай байна.

     б. Акт, албан шаардлага:

Төрийн аудитын байгууллагын хэмжээнд нийтдээ 2867 акт, албан шаардлагаар 426,8 тэрбум төгрөгийн төлбөр ногдуулжээ.

Төрийн аудитын байгууллага тайланд онд 38,9 тэрбум төгрөгийн 2199 төлбөрийн акт (31,1 тэрбум төгрөгийн 1827 төлбөрийн актыг шинээр тогтоосон ба өмнөх оноос 7,8 тэрбум төгрөгийн 372 төлбөрийн акт шилжиж ирсэн) барагдуулах ёстойгоос 79,9 хувь буюу 24,4 тэрбум төгрөгийн 1711 актыг бүрэн барагдуулж, үлдэх 14,5 тэрбум төгрөгийн 488 төлбөрийн акт дараа онд шилжиж байна.Үүнд: Нийслэл, Орхон аймгийн аудитын газар, ҮАГ-ын Гүйцэтгэлийн болон Санхүүгийн аудитын газар 299,7-7794,2 сая төгрөгийн актыг хугацаа болоогүй, хэрэгжих шатандаа, хугацаа хэтэрсэн шалтгаанаар дараа онд шилжүүлсэн нь нөлөөлжээ.

Өнгөрсөн онд 31,1 тэрбум төгрөгийн акт тогтоосны 75,9 хувийг барагдуулж төсөвт 22,9 тэрбум төгрөг төвлөрүүлжээ.

Дархан-Уул, Баян-Өлгий, Хөвсгөл, Ховд аймгийн аудитын газрууд 28,1-217,4 актыг бүрэн барагдуулжээ.

Тайлант онд Булган, Дорнод, Өмнөговь, Нийслэлийн аудитын газар 299,1-2372,6 сая төгрөгийн акт тогтоосон нь хамгийн их байгаа бөгөөд актыг 86,6-100,0 хувь барагдуулж нийлээд төсөвт 4137,7 сая төгрөг оруулжээ.

Тайлант хугацаанд 395,7 тэрбум төгрөгийн зөрчил, дутагдлыг арилгуулахаар 1040 албан шаардлагыг холбогдох албан тушаалтнуудад хүргүүлж, урьд оноос шилжиж ирсэн 8,6 тэрбум төгрөгийн албан шаардлага нэмэгдээд нийт 358,0 тэрбум төгрөгийн зөрчил, дутагдалтай холбогдох 968 албан шаардлагыг барагдуулжээ.

Аймаг, нийслэлийн аудитын газрууд өнгөрсөн жил 157,1 тэрбум төгрөгийн зөрчлийг арилгуулахаар 956 албан шаардлага өгсөн бөгөөд өнгөрсөн оноос шилжиж ирсэн албан шаардлагыг оролцуулбал 142,1 тэрбум төгрөгийн зөрчлийг арилгуулах 899 албан шаардлагыг хэрэгжүүлжээ.

Баянхонгор, Баян-Өлгий, Булган, Говьсүмбэр, Дархан-Уул, Дорнод, Дундговь, Завхан, Ховд аймгийн аудитын газрууд албан шаардлагыг бүрэн барагдуулжээ.

Улс, орон нутгийн төсөвт төлбөрийн акт, албан шаардлагаар 59,6 тэрбум төгрөг төвлөрүүлсэн нь урьд оныхоос бараг 3,3 дахин буюу 41,3 тэрбум төгрөгөөр нэмэгджээ.

ТАБ-ын хэмжээгээр 2011 онд нийт 3694 аудит гүйцэтгэж илрүүлсэн алдаа, зөрчлийн дүн 6305,1 тэрбум төгрөг болж өмнөх оноос 1,5 хувиар буурсан байна.

Аудитаар албан тушаалтанд хариуцлага тооцуулах 743 саналыг холбогдох байгууллага, албан тушаалтанд өгснөөс 86,7 хувь нь бүрэн хэрэгжиж, 6,7 хувь нь хугацаа болоогүй, 6,6 хувь нь хэрэгжээгүй байна. Өмнөх онд шийдвэрлэгдээгүй 49 асуудал нэмэгдээд нийтдээ 114 асуудлыг хууль хяналтын байгууллагад шилжүүлсний 23 нь буюу 20,2 хувь нь хяналтын шатандаа, 72 нь буюу 63,2 хувь нь бүрэн хэрэгжиж, 19 нь буюу 16,7 хувийг хэрэгсэхгүй болгожээ.

Завхан аймгийн аудитын газар 78, Ховд, Хөвсгөл аймгийн аудитын газар 70 албан тушаалтанд хариуцлага тооцуулах санал өгч, Орхон, Булган аймгийн аудитын газар 12-24 асуудал шалгуулахаар хуулийн байгууллагад шилжүүлж ихэнхийг нь шийдвэрлүүлсэн байна.

1. Төсвийн төсөлд боловсруулсан санал:

Төрийн аудитын тухай хуулиар олгогдсон бүрэн эрхийн дагуу төрийн аудитын байгууллага улс, орон нутгийн төсвийн төсөлд 45,2 тэрбум төгрөгөөр орлого нэмэгдүүлэх 111 санал, 34,0 тэрбум төгрөгөөр үр ашиг дээшлүүлэх, зардал хорогдуулах 78 санал боловсруулсан байх бөгөөд тэдгээрээс орлого нэмэгдүүлэх саналын 23,8 хувь, үр ашиг дээшлүүлэх, зардал хорогдуулах саналын 7,2 хувь нь дэмжигдэж холбогдох төсөвт тусгагджээ.

Аймаг, нийслэлийн аудитын газрууд орон нутгийн төсвийн төсөлд бүгд 15.4 тэрбум төгрөгөөр орлого нэмэгдүүлэх 108 санал, бүгд 3.4 тэрбум төгрөгөөр зардал хорогдуулах 75 санал боловсруулж холбогдох хурлын байгууллагад өргөн барьсан бөгөөд боловсруулсан саналаас 10.7 тэрбум төгрөгөөр орлого нэмэгдүүлэх 76 санал, 2.4 тэрбум төгрөгөөр зардал хорогдуулах 41 саналыг бүрэн хэрэгжүүлжээ.  

Баянхонгор, Говь–Алтай, Дорнод, Дундговь, Завхан, Өмнөговь, Сэлэнгэ, Ховд, Хөвсгөл, Хэнтий аймгийн аудитын газруудын төсвийн төсөл болон төсвийн хөрөнгийн үр ашгийг нэмэгдүүлэх чиглэлээр өгсөн орлого нэмэгдүүлэх санал, Архангай, Баян-Өлгий, Булган, Говь-Алтай, Сүхбаатар, Ховд, Сэлэнгэ аймгийн газруудын зардал хорогдуулах санал бүрэн дэмжигджээ.

1. Аудитын бус үйл ажиллагаа

Төрийн аудитын байгууллагын үйл ажиллагааны талаар радио, телевиз, хэвлэл мэдээллийн хэрэгслээр 387 удаа мэдээлэл, сурталчилгаа хийж, ярилцлага өгсний гадна 5454 сонирхогч хувь хүн, байгууллагад аудитын тайлангийн талаар мэдээлэл гаргаж өгсөн нь урьд оныхоос 34,3 хувиар нэмэгдсэн нь төв, орон нутгийн аудитын байгууллагуудын хэмжээнд гүйцэтгэсэн аудит, хийсэн ажил, үйл ажиллагааны үр дүнгээ мэдээллийн хэрэгслийг ашиглан сурталчлах ажлаа амжилттай зохион байгуулж байгааг харуулж байна.

Төрийн аудитын үйл ажиллагаатай холбоотой 169 мэдээлэл, хүсэлт хүлээн авсны 161 буюу 95,3%-ийг хугацаанд нь шийдвэрлэсэн ба үлдэх 3 нь хугацаа болоогүй, 5 нь хугацаа хэтрээд байна. Ирүүлсэн хүсэлт, мэдээллийн 7,1% нь төрийн аудитын байгууллагын үйл ажиллагаатай холбоотой, 23,0% нь аудит хийх эрсдэлтэй асуудлыг, үлдэх нь 69,9 хувь нь бусад сэдвийг хөнджээ.

Төрийн аудитын байгууллага батлагдсан орон тоог бүрэн ашиглаж байгаа бөгөөд нийт ажиллагсдын 78.9 хувь орон нутгийн аудитын байгууллагад ногдож, аймаг, нийслэлийн нэг аудитын газарт дунджаар 11 хүн ажиллажээ.

Нийт ажиллагсдын тоо өнгөрсөн оныхоос 8,2 хувиар өсч, 27,9 хувь нь магистр, 53,8 хувь нь мэргэшсэн нягтлан бодогч, 77,4 хувь нь нягтлан бодогч, эдийн засагч мэргэжилтэй хүмүүс байна.

Ажиллагсдын 17,9 хувь ахлах аудитор, шинжээчид, 57,8 хувь нь аудитор, шинжээчид ажиллаж байгаа бөгөөд урьд оныхоос аудитор, шинжээчдийн тоо 17,6 хувиар өсжээ.

         Төрийн аудитын байгууллагын мэргэжлийн тасралтгүй сургалтын хөтөлбөрийн хүрээнд төрийн аудитын төв байгууллагын нэгж, аймаг, нийслэлийн аудитын газрууд гадаад болон дотоодын 252 сургалтанд 1805 ажилтнуудыг (давхардсан тоогоор) хамруулан мэргэжил, арга зүйн сургалтыг зохион байгуулсан нь 2010 оныхоос 1,7-36,9 хувиар нэмэгджээ.

Тайлант хугацаанд төрийн аудитын байгууллагын дүнгээр төсвийн гүйцэтгэл 3829,5 сая төгрөг болж, үүний 67,0 хувийг нь цалинд зарцуулж, батлагдсан төсвийг 115,9 сая төгрөгийн хэмнэлттэй зарцуулжээ.

СУДАЛГАА ШИНЖИЛГЭЭНИЙ ГАЗАР

2012 ОНЫ 1 ДҮГЭЭР САРЫН 25