Төрийн аудитын байгууллагын 2013 оны эхний хагас жилийн статистик мэдээг нэгтгэж, дүгнэсэн тухай

МУ-ын Ерөнхий аудиторын 64 дүгээр тушаалаар ’’Төрийн аудитын байгууллагын үйл ажиллагаанд дотоод аудит, мониторинг хийх журам’’-ын 5 дугаар бүлэг болон батлагдсан 7 маягт, зааврын дагуу төрийн аудитын төв байгууллагын нэгж, аймаг, нийслэлийн аудитын газруудын 2013 оны эхний хагас жилийн үйл ажиллагааны үр дүнгийн статистик мэдээллийг нэгтгэж, дүн шинжилгээ хийснийг танилцуулж байна.

Гүйцэтгэлийн аудит :

Эхний хагас жилд бүтээгдэхүүн, ажил үйлчилгээний төлөвлөгөөнд 160 гүйцэтгэлийн аудит хийхээр тусгасны 49.4 хувийг нь төрийн аудитын байгууллага өөрийн санаачлагаар хийхээр төлөвлөжээ.
Энэ хугацаанд төрийн аудитын байгууллага 2756 аж ахуйн нэгж, байгууллага, төсөл хөтөлбөрийг хамруулан нийтдээ 167 гүйцэтгэлийн аудит хийсний 89.2 хувь нь буюу 149 нь төлөвлөгөөт аудит байгаа бөгөөд урьд оны мөн үеийнхээс хийсэн аудитын тоо 33-аар, хамруулсан аж ахуйн нэгж, байгууллагын тоо 207-оор олон байна.

Тайлант хугацаанд гүйцэтгэлийн аудитаар 1038 зөвлөмж өгч, нийт зөвлөмжийн 41,4 хувь хэрэгжиж, 58,6 хувь нь хэрэгжих шатандаа болон хугацаа болоогүй шалтгаанаар сүүлийн хагас жилд шилжлээ.
Мөн аудитаар өмнөх оноос шилжиж ирсэн болон тайлант хугацаанд нэмэгдсэн нийт актын 57,2 хувь болох 4,4 тэрбум төгрөгийн төлбөрийг барагдуулж, улс, орон нутгийн төсөвт 4,3 тэрбум төгрөг оруулжээ.

Санхүүгийн тайлангийн аудит:

2013 оны эхний хагас жилд Төсвийн ерөнхийлөн захирагчдын нэгтгэсэн болон улсын төсвийн байгууллагын орон нутгийн түвшинд нэгтгэсэн, улс, орон нутгийн төсвийн байгууллага, төрийн болон орон нутгийн өмчит хуулийн этгээдийн 4096 санхүүгийн тайланд аудит хийсний 70,7 хувийг нь төрийн аудитын төв, орон нутгийн аудитын байгууллага, үлдэх 29,3 хувийг хувийн хэвшлийн Улаанбаатар хотын болон орон нутгийн аудитын компаниар гэрээгээр хийлгүүлжээ.

Санхүүгийн тайлангийн аудитын тоо урьд оны мөн үеийнхээс 9,2 хувиар нэмэгджээ.

Булган, Говь-Алтай, Сүхбаатар, Төв аймгийн аудитын газруудаас бусад газрууд 4-139 аж ахуйн нэгж, байгууллагын санхүүгийн тайлангийн аудитыг гэрээний үндсэн дээр гүйцэтгүүлжээ. Тухайлбал: Хөвсгөл аймгийн аудитын газар санхүүгийн тайлангийн аудитынхаа 47,2 хувь болох 129-ийг, Нийслэлийн аудитын газар 77,6 хувь 139-ийг тус тус орон нутгийн аудитын компаниар гэрээгээр хийлгүүлж дүгнэлт гаргуулжээ.

Төрийн аудитын байгууллага санхүүгийн тайлангийн аудитаар нийт 1600,8 тэрбум төгрөгийн зөрчил илрүүлж, илрүүлсэн зөрчлийн 14,4 хувь болох 230,8 тэрбум төгрөгийн зөрчлийг санхүүгийн тайланд залруулж тусгуулжээ. Илрүүлсэн зөрчлийн хэмжээ урьд оны мөн үеийнхээс 40,1 хувиар буурчээ.

Санхүүгийн тайлангийн аудитаар өгсөн санал дүгнэлтийн 83,4 хувийг зөрчилгүй, 13,8 хувийг хязгаарлалттай, 1,7 хувийг сөрөг санал дүгнэлт эзэлж, харин 1,1 хувьд нь дүгнэлт гаргахаас татгалзжээ.
Өнгөрсөн оны мөн үетэй харьцуулахад зөрчилгүй санал дүгнэлтийн тоо 3,0 хувиар, сөрөг санал дүгнэлтийн тоо 0,2 хувиар, санал дүгнэлт гаргахаас татгалзсан 0,3 хувиар тус тус өсч, хязгаарлалттай санал дүгнэлтийн тоо 3,5 хувиар багасжээ.

Бусад аудит:

2013 эхний хагас жилд нийт 390,2 тэрбум төгрөгийн санхүүгийн үнэлгээ бүхий 76 эрсдлийн болон нийцлийн аудит гүйцэтгэжээ. Аудитад 704 аж ахуйн нэгж, байгууллагыг хамруулсны 60,8 хувийг нь төсвийн байгуулага, 37,5 хувийг нь хувийн хэвшлийн аж ахуйн нэгж эзэлж байгаа бөгөөд аудитаар 31,4 тэрбум төгрөгийн алдаа зөрчил илрүүлжээ. Нийт 20 орон нутгийн аудитын газар 1-13 эрсдлийн болон нийцлийн аудит хийжээ. Төв аймгийн аудитын газар 13 аудит хийсэн нь хамгийн олон байна.

Аудитаар илрүүлсэн алдаа, зөрчил:

Эхний хагас жилд төрийн аудитын байгууллагын хэмжээгээр нийтдээ 1935,9 тэрбум төгрөгийн алдаа, зөрчил илрүүлсэн нь урьд оны мөн үеийхээс 49,0 хувиар бага байгаа нь гүйцэтгэлийн болон санхүүгийн тайланд хамрагдсан аж ахуйн нэгж, байгууллагын төсвийн хөрөнгийн ашиглалт зарцуулалт, орлого бүрдүүлэлт, нягтлан бодох бүртгэл хөтлөлт болон бүртгэлээр тавих хяналт сайжирч санхүүгийн ажилтнуудын мэргэжлийн болон хууль эрх зүйн мэдлэг чадвар дээшилж байгааг харуулж байна.

Дээрхи зөрчил дутагдалтай холбоотойгоор төрийн аудитын байгууллага албан тушаалтанд хариуцлага тооцуулах 543 саналыг тайлант хугацаанд гаргасан нь урьд оны мөн үеийнхээс 8-аар олон байгаа бөгөөд 42,5 хувь нь бүрэн хэрэгжиж, 53,9 хувь нь хугацаа болоогүй байна.
Говь-Алтай, Төв, Баян-Өлгий, Дундговь, Хэнтий, Ховд, Нийслэлийн аудитын газар 42-87 албан тушаалтанд хариуцлага тооцуулахаар эрх бүхий байгууллага, албан тушаалтанд хандаж санал гаргаж, Төв, Ховд, Хэнтий аймгийн аудитын газар 64,4-96,5 хувийг нь хэрэгжүүлсэн нь хамгийн олон байхад Дархан-Уул, Дорноговь, Завхан аймгийн аудитын газар албан тушаалтанд хариуцлага тооцуулах санал гараагүй байна.
Хууль хяналтын байгууллагад өмнөх онд шийдвэрлэгдээгүй 42 асуудал нэмэгдээд нийтдээ 74 асуудлыг шилжүүлсний 24 буюу 32,4 хувь нь хэрэгжиж, 44 нь буюу 59,5 хувь нь хянагдаж байна.

Аудитын үр өгөөж:

Тайлант хугацаанд нийт 3217 санхүүгийн болон санхүүгийн бус үр өгөөжийг бүртгэж, бүртгэсэн санхүүгийн үр өгөөжийн мөнгөн дүнгийн үнэлгээ 358,7 тэрбум төгрөг болжээ.
Гүйцэтгэлийн болон санхүүгийн тайлангийн аудитаар өмнөх оноос шилжиж ирсэн бүртгэгдсэн болон тайлант хугацаанд бүртгэсэн 358,7 тэрбум төгрөгийн үр өгөөжөөс 132,7 тэрбум төгрөгийн санхүүгийн үр өгөөжийг тооцоолж, 96,4 хувь болох 128,0 тэрбум төгрөгийг нь харилцагч байгууллагаар хүлээн зөвшөөрүүлжээ.

Төрийн аудитын байгууллагын хэмжээнд улс, орон нутгийн төсвөөс авсан нэг төгрөгийн санхүүжилтийн хариуд дунджаар 2012 оны эхний хагас жилд 45,99 төгрөгийн үр өгөөжийг бий болгож байсан бол энэ оны эхний хагас жилд 36.31 төгрөгийн үр өгөөжийг харилцагч байгууллагаар хүлээн зөвшөөрүүлжээ.

Аудитын зөвлөмж:

Гүйцэтгэлийн болон санхүүгийн тайлангийн аудитаар эхний хагас жилд 7332 зөвлөмж өгсний 14,1 хувийг нь гүйцэтгэлийн аудит эзэлж, нийт зөвлөмжийн 51,0 хувийг хэрэгжүүлж, үлдэх 49.0 хувь нь хэрэгжих шатандаа болон хугацаа болоогүй шалтгаанаар шилжиж байгаа нь санхүүгийн тайлангийн аудитаар өгсөн зөвлөмжийн хэрэгжилтийг дараа жилийн эцсийн санхүүгийн тайлангийн аудитаар тооцож байгаа, мөн биелэлтийг тооцож, хэрэгжилтийг хангуулах хугацаа болоогүйтэй холбоотой.

Тайлант хугацаанд хэрэгжүүлсэн нийт зөвлөмжийн 35,6 хувь нь дотоод хяналтыг сайжруулах, 16,0 хувь нь үр нөлөөг сайжруулах, 13,9 хувь нь үр ашгийг дээшлүүлэх, 10,0 хувь нь арвилан хэмнэхэд чиглэгджээ.

Акт, албан шаардлага:

Нийт 1384,0 тэрбум төгрөгийн акт, албан шаардлагын 13,3 хувь буюу 183,7 тэрбум төгрөгийн акт, албан шаардлагыг тайлант хугацаанд хэрэгжүүлж улс, орон нутгийн төсөвт 22,3 тэрбум төгрөг оруулжээ.

Төрийн аудитын байгууллагын хэмжээнд оны эхний хагас жилд 1646 актаар 19,0 тэрбум төгрөгийн төлбөр ногдуулж, нийт 69,4 тэрбум төгрөгийн актын 13,7 хувийг нь барагдуулж, улс, орон нутгийн төсөвт 8,9 тэрбум төгрөг оруусан нь урьд оны мөн үеийнхээс актын тоо 19,3 хувиар өссөн боловч ногдуулсан төлбөрийн мөнгөн дүн 68,6 хувиар, барагдуулсан актын болон улс, орон нутгийн төсөвт оруулсан мөнгөний дүн 5,3 хувиар бага байна.

Тайлант хугацаанд 682,2 тэрбум төгрөгийн зөрчил дутагдалтай холбоотой 1342 албан шаардлага өгчээ. Нийт албан шаардлагын 67,9 хувь болох 1081 нь хугацаа болоогүй, хэрэгжих шатандаа шалтгаанаар дараа хагас жилд шилжиж байна.

Аудитын бус үйл ажиллагаа:

Төрийн аудитын байгууллагын үйл ажиллагаа, хийж гүйцэтгэх болон гүйцэтгэсэн ажил, аудитын тайлангийн талаар радио, телевиз, хэвлэл мэдээллийн хэрэгслээр 182 удаа мэдээлэл, сурталчилгаа хийж, ярилцлага өгч, аудитын тайлангийн мэдээллээр 1617 хэрэглэгчдэд үйлчилжээ.

Төрийн аудитын байгууллага эхний хагас жилд 158 мэдээлэл, хүсэлт хүлээн авсны 10,1 хувь нь төрийн аудитын байгууллагын үйл ажиллагаатай холбоотой, 19,6 хувь нь аудит хийх эрсдэлтэй асуудлыг хөндсөн байх бөгөөд ирүүлсэн мэдээлэл, хүсэлтийн 86,1 хувь буюу 136-г нь хугацаанд нь шийдвэрлэж, харин хугацаа болоогүй 20 мэдээлэл, хүсэлт байна.

Төрийн аудитын байгууллагын мэргэжлийн тасралтгүй сургалтын хөтөлбөрийн хүрээнд аймаг, нийслэлийн ерөнхий аудиторууд болон аудитын газруудын гадаад болон дотоодын 116 сургалтанд 864 ажилтнуудыг (давхардсан тоогоор) хамруулан мэргэжил, арга зүйн сургалтыг зохион байгууллаа.

Ажиллагсдын 20,3 хувь нь ахлах аудитор болон шинжээчид, 49,6 хувь нь аудитор, шинжээчид, 31,3 хувь нь магистр, 52,0 хувь нь мэргэшсэн нягтлан бодогч ажиллаж байна.

Тайлант хугацаанд төрийн аудитын байгууллагын дүнгээр төсвийн гүйцэтгэл 3505,6 сая төгрөг болж, үүний 64,1 хувийг нь цалинд зарцуулж, батлагдсан төсвөө 484,1 сая төгрөгийн хэмнэлттэй зарцуулжээ.

Захиргаа үйлчилгээний газар

2013-07-29