МОНГОЛ УЛСЫН ИХ ХУРЛЫН ТӨСВИЙН БАЙНГЫН ХОРОО ЗАСГИЙН ГАЗРЫН ЗАРИМ ТУСГАЙ САНД ХИЙСЭН НИЙЦЛИЙН АУДИТЫН ТАЙЛАНГ ҮНДЭСЛЭН ТОГТООЛ ГАРГАЛАА

УИХ-ын Төсвийн байнгын хороо 2017 оны 02 дугаар сарын 07-ны өдөр Засгийн газрын зарим тусгай сангийн үйл ажиллагааны үр дүнд хийсэн Үндэсний аудитын газрын нийцлийн аудитын тайланг  үндэслэн Монгол улсын Засгийн газарт чиглэл өгөх тухай 03 дугаар тогтоол гаргалаа. Энэхүү тогтоолд:

– Улсын төсвийн нэгдмэл байдлыг хангах, тусгай сангуудын зорилго, үйл ажиллагааны чиглэлийг тодорхой болгох, үр дүнг дээшлүүлэх, хоорондын уялдаа холбоог сайжруулах, давхардлыг арилгах, сангуудын зохицуулалтыг нэг хуулиар зохицуулах зорилгоор Засгийн газрын тусгай сангийн тухай хуулийн шинэчилсэн найруулгын төслийг Улсын Их Хуралд өргөн мэдүүлж, хэлэлцүүлэх;

– Тусгай сангийн үйл ажиллагааг холбогдох хууль журмын дагуу зохион байгуулаагүй, санхүүгийн эх үүсвэрийг хуулиар тодорхойлсон заалт бүрээр бүрдүүлээгүй, сангийн хөрөнгийг хууль бусаар зарцуулсан албан тушаалтанд хариуцлага тооцох;

– Тусгай сангуудад үүссэн өр, авлагыг барагдуулах ажлыг зохион байгуулж,  хэрэгжилтийг улирал тутам Төсвийн байнгын хороонд танилцуулах талаар дурдсан байна.

Мөн УИХ-ын Төсвийн байнгын хорооны 2016 оны “Аудитын сэдэв батлах тухай“ 01 дүгээр тогтоол, Үндэсний аудитын газраас 2016 онд Монгол Улсын Ерөнхий аудиторт нийлүүлэх бүтээгдэхүүн, ажил, үйлчилгээний төлөвлөгөөний дагуу “Шилэн дансны тухай хуулийн хэрэгжилт“, “Орон нутгийн хурлын сонгуулийн зардлын гүйцэтгэл“-д тус тус аудит хийж тайланг УИХ-ын Төсвийн байнгын хороо болон холбогдох байгууллага, албан тушаалтанд хүргүүллээ.

УИХ-ын Төсвийн байнгын хорооны 2017 оны 2 дугаар тогтоол, Монгол Улсын Ерөнхий аудиторын баталсан ҮАГ-ын 2017 оны үйл ажиллагааны төлөвлөгөөний дагуу “Орон нутгийн хөгжлийн сангийн хөрөнгийн зарцуулалт“-д хийх аудитын төлөвлөгөөг аймаг, нийслэлийн аудитын газарт хүргүүлж арга зүйгээр хангах зорилгоор онлайн хурал зохион байгуулсан байна.