“УЛСЫН ӨРИЙН АУДИТЫН ЗЭЭЛДҮҮЛЭХ БОЛОН ЗЭЭЛДЭХ ТОГТОЛЦОО” СЭДЭВТ СЕМИНАРТ ТӨРИЙН АУДИТЫН БАЙГУУЛЛАГЫН ТӨЛӨӨЛӨЛ ОРОЛЦЛОО
Аудитын дээд байгууллагуудын Олон Улсын Холбооны хөгжлийн санаачлага (Аи Ди Аи)–с хэрэгжүүлсэн “Улсын өрийн аудитын Зээлдүүлэх болон зээлдэх тогтолцоо” сэдэвт хөтөлбөрийн хүрээнд Норвеги Улсын нийслэл Осло хотноо 2017 оны 3 дугаар сарын 30-31-ний өдрүүдэд зохион байгуулагдсан төгсгөлийн үе шатны семинарт Үндэсний аудитын газраас Стратегийн удирдлагын газрын менежер Х.Баярмаа, Гүйцэтгэлийн аудитын газрын ахлах аудитор Б.Болормаа нар оролцсон байна.
Тус семинарт Аи Ди Аи-н дадлага туршлагатай сургагч багш нар болон Олон улсын санхүүгийн байгууллагын шинжээчид, Норвеги Улсын Гадаад харилцааны яамны төлөөлөгчид оролцон илтгэл тавьж, хөтөлбөрийн үр дүн, улсын өрийн аудитад анхаарах асуудлаар санал солилцсон байна.
Хөтөлбөрийн зорилго нь улсын өрийн аудитыг олон улсын аудитын стандартын дагуу гүйцэтгэж, бусад орны аудитын багийн гүйцэтгэсэн аудитын сайн туршлагыг судалж, санал солилцон, цаашид “Улсын өрийн аудитын гарын авлага”-төслийг боловсруулан удирдлагаар батлуулан аудитад нэвтрүүлэхэд чиглэгдсэн байна.
Хөтөлбөрт Аудитын дээд байгууллагын 24 орны 73 төлөөлөгчид оролцож, 22 орны төлөөлөгчдийн 80 хувь гэрээний дагуу сургалтад бүрэн хамрагдаж, Монгол Улсын Аудитын дээд байгууллагаас уг хөтөлбөрийн 2012-2015 онуудад цахим сургалт, аудитын төлөвлөлт, талбарын ажил, аудитын чанарын баталгаажуулалт болон тайлагналын үе шатанд 4 хүний бүрэлдэхүүнтэй баг оролцсон байна. Үүнд:
- Нийцлийн аудитын газрын ахлах аудитор Ш.Энхтайван – багийн ахлах
- Гүйцэтгэлийн аудитын газрын ахлах аудитор Б.Болормаа
- Санхүүгийн аудитын газрын ахлах аудитор Р.Гончигцэрэн
- Санхүүгийн аудитын газрын аудитор Ж.Болормаа
Үндэсний аудитын газраас томилогдсон аудитын баг хөтөлбөрийн бүх үе шатны сургалтад амжилттай оролцож, “Хамтын ажиллагааны хэлэлцээр”-тусгагдсан ажлыг бүрэн хийж гүйцэтгэсэн байна.
Засгийн газрын өрийн удирдлагын аудитад анхаарах асуудлаар менежер Х.Баярмаа, ахлах аудитор Б.Болормаа нар 2017 оны 4 дүгээр сарын 7-ны өдөр “Засгийн газрын өрийн удирдлагын хэрэгжилт, үр дүн”-д аудит хийж буй Гүйцэтгэлийн аудитын газрын аудитын багийн бүрэлдэхүүнд сургалт зохион байгуулсан байна.
