Говь-Алтай аймаг дахь төрийн аудитын газар-Санхүүгийн аудитын мэдээлэл

САНХҮҮГИЙН АУДИТЫН МЭДЭЭЛЭЛ

/Аймгийн төвийн удирдах ажилтнуудад/

2017.04.24

Та бүхэнд ажлын шинэ 7 хоногийн өглөөний мэнд дэвшүүлэн аймгийн 2016 оны санхүүгийн тайланд хийсэн аудитын дүнг танилцуулъя.

Бид Төрийн аудитын газарт Төсвийн тухай хууль болон Төрийн аудитын тухай хуулийн хүрээнд Аудитын олон улсын стандарт,  түүнд нийцүүлж Монгол Улсын Үндэсний аудитын газраас гаргасан Санхүүгийн тайлангийн аудитын журам, гарын авлага, 2016 оны жилийн эцсийн санхүүгийн тайлангийн баталгаажуулах аудит хийхэд баримтлах бодлого, аудитаар илэрсэн алдаа,  зөрчилд  өгөх шийдвэрийн төслийг үндэслэн аудитыг хийж гүйцэтгэлээ.

Бид өмнө мэдээлэл хийж байсан аймгийн хэмжээний 193 байгууллагын 273 санхүүгийн тайлан гарснаас 32 тайланд итгэл үзүүлж, 79 тайланг түүвэрт хамруулахаар төлөвлөж ажиллалаа. Үүнээс 3 ОНӨААТҮГ Төрийн аудитын байгууллагад санхүүгийн тайлан, холбогдох баримт материалаа ирүүлээгүй, ХААГ- ОНӨА нэгдэж, ЖДҮД Инкубатор төв үйл ажиллагаа явуулаагүйгээс дүгнэлт гаргаагүй, 1 төрийн өмчит аж ахуйн нэгжийн тайлан аймагт аудит хийгдэж нийт 158 тайланд Аудитын газар аудит хийж дүгнэлт гаргалаа. Аудит хийсэн санхүүгийн тайлан, дүгнэлтийг хүснэгтээр харуулбал:

Төсвийн ерөнхийлөн захирагчийн 1 санхүүгийн тайлан, шууд захирагчийн  110 санхүүгийн тайлан, төсвийн төвлөрүүлэн захирагчийн 20 санхүүгийн тайлан, 21 төсөл сан хөтөлбөр, 6 төрийн болон орон нутгийн өмчит аж ахуйн нэгжийн нийт 158  санхүүгийн тайланд дүгнэлт гаргасан байна. Үүнээс 27 байгууллагын санхүүгийн тайлангийн аудитыг хувийн аудитын компанитай гэрээ байгуулан гүйцэтгүүлсэн.

Гэгээн нуур цэнгэг ус ОНӨААТҮГ, Барилга зураг зүйн товчоо ОНӨААТҮГ, Орон сууцны алба ОНӨААТҮГ-ууд нь Төсвийн тухай хуулийн 8 дугаар зүйлийн 8.9.1, 8.9.3 дахь заалтад заасан хугацаанд санхүүгийн тайлан, холбогдох баримт материалаа ирүүлээгүйгээс аудит хийгээгүй байна.

Санхүүгийн тайлангийн аудитыг 11 хүн 3894 илүү цагаар ажиллаж гүйцэтгэсэн байна. Нэг аудитор шинжээч дунджаар 486 илүү цаг ажиллажээ.

Аудитаар нийт  22166,3 сая төгрөгийн зөрчил илрүүлж, 5682,0 сая  төгрөгийн зөрчлийг аудитын явцад залруулан, 1211,5 сая  төгрөгийн зөрчилд төлбөрийн акт тогтоож, 10306,5 сая  төгрөгийн зөрчилд 209 заалт бүхий зөрчил арилгуулах албан шаардлага, 2547,7 сая  төгрөгийн  зөрчилд 79 заалт бүхий зөвлөмж хүргүүлж, 1937,4 сая  төгрөгийн санхүүгийн, 138 санхүүгийн бус үр өгөөжийг бүртгэлээ.

Мөн 53 байгууллагын нягтлан бодогч нарт 159 заалт бүхий зөвлөгөө өгч хуулиар хүлээсэн албан үүргээ хангалтгүй биелүүлэн ажлын хариуцлага алдсан 32 албан тушаалтанд хариуцлага тооцуулахаар эрх бүхий байгууллагад албан шаардлага хүргүүллээ.

Нийт 1211,5 сая төгрөгийн төлбөрийн актын 961.8 сая төгрөг буюу 79% нь Сум хөгжүүлэх сангийн эргэн төлөлттэй холбоотой акт байна. Гэтэл өмнөх оны тус сантай холбоотой төлбөрийн актын үлдэгдэл 529,3 сая төгрөг байгаа юм. Нийлээд хугацаандаа зээлээ төлөөгүйд тогтоосон төлөгдөөгүй акт 1491,1 сая төгрөг байна.

Хугацаа алдах, хойшлуулах тусам төлөгдөхгүй, найдваргүй авлага болох эрсдлийг бий болгож байна. Яагаад төрийн өмнөөс байгуулсан гэрээнийхээ эрх, үүргийг хэрэгжүүлэн хугацаа хэтрүүлсэн зээлийг төлүүлэхгүй байгаад шат шатны удирдлагууд анхаарал хандуулах зайлшгүй шаардлага гарч ирж байна.

Санхүүгийн аудитын 2016, 2017 оны үзүүлэлтийг харьцуулахад зөрчилийн дүн буурсан үзүүлэлттэй байна. Ялангуяа алдаатай тайлагналыг залруулсан дүн 50 хувиар буурсан байгаа нь аймгийн санхүүгийн ажилтнуудын ур чадвар илт сайжирсантай холбоотой гэж үзэж байна. Аудитын илрүүлэлт, залруулга, шийдвэрийг хүснэгтээр харуулбал:

/сая төгрөг/

Санхүүгийн аудитын дүнг аймгийн ИТХ, Засаг даргад дэлгэрэнгүйгээр албажуулан хүргүүлнэ. Та бүхэн аудитын дүнг ИТХ, ИТХ-ын тэргүүлэгчид, Засаг даргын зөвлөлөөр хэлэлцүүлэн гарсан зөрчил дутагдлыг арилгах арга хэмжээ авч ажиллана гэдэгт найдаж байна.

ГОВЬ-АЛТАЙ АЙМАГ ДАХЬ ТӨРИЙН АУДИТЫН ГАЗАР