МУ-ЫН ТӨРИЙН АУДИТЫН БАЙГУУЛЛАГА, ОХУ-ЫН ТООЦООНЫ ТАНХИМЫН КОЛЛЕГИЙН ХАМТАРСАН ХУРАЛДААН АМЖИЛТТАЙ ЗОХИОН БАЙГУУЛАГДАЖ БАЙНА.
Монгол Улсын болон Оросын Холбооны Улсын аудитын дээд байгууллагуудын хамтарсан аудитын дүнгийн хуралдаан амжилттай зохион байгуулагдаж байна.
Уг хуралдаанаар
- Монгол-Оросын хамтарсан “Эрдэнэт үйлдвэр” ХХК-ний үйл ажиллагаанд аудитын тайлангийн дүнг хэлэлцэх,
- Монгол-Оросын хамтарсан “Улаанбаатар төмөр зам” хувь нийлүүлсэн нийгэмлэгийн үйл ажиллагаанд хийх хамтарсан аудитын төлөвлөгөө,хөтөлбөр, батлах
- “Хил орчмын байгаль орчныг хамгаалах талаарх төрийн зохицуулалтын үр нөлөөт байдал”-д зэрэгцээ шалгалт явуулах хамтын ажиллагааны талаар хэлэлцэж байна.
“Эрдэнэт үйлдвэр” ХХК-д хийсэн хамтарсан аудит
Монгол Улсын Үндэсний аудитын газраас ОХУ-ын Тооцооны танхимтай хамтран Монгол-Оросын хамтарсан “Эрдэнэт үйлдвэр” ХХК-ий 2012-2013 он, 2014 оны эхний 9 сарын үйл ажиллагаанд аудит хийсэн. Хамтарсан аудитын төлөвлөгөө, хөтөлбөрийн дагуу нэгдсэн тайлангийн дүнг хэлэлцэж, гарын үсэг зураахаар ОХУ-ын Тооцооны танхимын аудитор А.И.Жданьков тэргүүтэй төлөөлөгчид манай улсад хамтарсан хуралдаан хийж байна.
“Улаанбаатар төмөр зам” ХХН-д хийх хамтарсан аудит
Монгол Улсын УИХ-ын Төсвийн байнгын хорооны 2014 оны 12 дугаар сарын 17-ны өдрийн 20 дугаар тогтоол, Монгол Улсын Үндэсний аудитын газар болон ОХУ-ын Тооцооны танхим хооронд 2013 оны 12 дугаар сарын 9–ны өдөр Москва хотноо байгуулсан хамтран ажиллах хэлэлцээрийн дагуу бид энэ оны 3-4 сард Монгол- Оросын хамтарсан “Улаанбаатар төмөр зам” ХНН-ийн үйл ажиллагаанд хамтарсан аудит хийхээр төлөвлөсөн .
Аудит 2 улсын хувь нийлүүлсэн хөрөнгийн зарцуулалтын үр дүнг үнэлэх чиглэлээр хийгдэж, нийгэмлэгийн үйл ажиллагааг сайжруулан, ойрын болон ирээдүйд хэрэгжүүлэх шаардлагатай хөгжлийн бодлогыг тодорхойлоход дэмжлэг болохуйц зөвлөмж гаргахаар ажиллах юм .
“ Хил орчмын байгаль орчныг хамгаалах талаарх төрийн зохицуулалтын үр нөлөөт байдал”-д хийх зэрэгцээ аудит
Аудитыг ОХУ-ын Тооцооны танхим, ҮАГ-ын хооронд 2013 оны 12 дугаар сарын 9-ний өдөр байгуулсан “Хил орчмын байгаль орчныг хамгаалах талаарх төрийн зохицуулалтын үр нөлөөт байдал”-д зэрэгцээ шалгалт явуулах тухай хамтын ажиллагааны хэлэлцээрийг үндэслэн хийж байна. Аудитад Засгийн газар, БОНХАЖЯ, ХХЕГ, ОБЕГ, МХЕГ болон Булган, Дорнод, Увс, Сэлэнгэ, Хэнтий, Хөвсгөл аймгуудын төр захиргааны байгууллагууд хилийн дагуух зарим сум, орон нутгийн захиргаа холбогдох бусад байгууллагууд хамрагдах болно.