Төрийн аудитын байгууллагад системчилсэн үнэлгээ хийлээ.

Монгол Улсын Ерөнхий аудиторын томилсон ажлын хэсэг эхний улиралд багтаан Улсын Их Хурлын Төрийн байгуулалтын байнгын хорооны тогтоолоор баталсан системчилсэн үнэлгээний аргачлалын дагуу Төрийн аудитын байгууллагын 2014 оны үйл ажиллагаанд байгууллагын чиг үүрэг, хүний нөөцийн хэрэгцээ, төсвийн зарцуулалтыг сонгон, гүйцэтгэлийн, нийцлийн, санхүүгийн аудитын төлөвлөгөөний биелэлтийг хамруулан системчилсэн үнэлгээ хийж, дүгнэлт гаргалаа.

2014 онд Үндэсний аудитын газар шинэчилсэн Төрийн аудитын тухай хуулийн орчинд үйл ажиллагаагаа явуулж, гүйцэтгэлийн болон нийцлийн аудитыг нэгдсэн удирдамжийн дагуу Улсын Их Хурлын Төсвийн байнгын хорооны тогтоолоор баталсан сэдвүүдээр хийж, зарим аудитын тайланг тус байнгын хорооны хуралдаанаар хэлэлцүүлсэн /нийтийн сонсгол хэлбэрээр/ нь парламентын хяналтыг төрийн аудитын үйл ажиллагаатай уялдуулах, аудитын тайлангаар нийтийн сонсгол хийдэг парламентын хяналтын соёлыг төлөвшүүлэхэд чиглэсэн төрийн аудитын шинэчлэлийн чухал алхам болжээ.

Улсын Их Хурлын бодлогын дэмжлэгтэйгээр төрийн аудитын байгууллагыг шинэчлэх, хөгжүүлэх чиглэлээр 2014 онд тодорхой арга хэмжээнүүд хэрэгжүүлж, төсвийн тухай хуулиар батлагдсан хөрөнгө оруулалтаар Аудитын дээд байгууллагаас баталсан олон улсын иж бүрэн стандартыг эх хэлнээ хөрвүүлэн үндэсний түвшинд мөрдөх арга зүй болгох, санхүүгийн тайлангийн аудит гүйцэтгэх програм хангамжийг боловсруулж нэвтрүүлэх, Төрийн аудитын байгууллагад мэдээллийн технологийн онлайн орчин бүрдүүлэх зэрэг төслүүдийг амжилттай хэрэгжүүлсэн байна.

Төрийн аудитын байгууллага нь Улсын Их Хурлын Төсвийн Байнгын хорооны тогтоолоор баталсан бүтэц, орон тооны дээд хязгаарын хүрээнд ажиллаж, гүйцэтгэлийн 248, санхүүгийн 4543, нийцлийн 187 аудит хийсэн бөгөөд энэ үйл ажиллагаанд зарцуулсан хүн өдөр, цагийн тооцоогоор хүний нөөц дутагдалтай байна гэж дүгнэжээ.