“НЭМЭГДСЭН ӨРТГИЙН ТАТВАРЫН БУЦААН ОЛГОЛТЫН ХЭРЭГЖИЛТ, ҮР ДҮН”, “ТАТВАРЫН ХӨНГӨЛӨЛТ, ЧӨЛӨӨЛӨЛТИЙН БОДЛОГО, ТҮҮНИЙ ХЭРЭГЖИЛТ, ҮР ДҮН” ЗЭРЭГ СЭДВЭЭР ХИЙХ ГҮЙЦЭТГЭЛИЙН АУДИТЫН НЭЭЛТИЙГ ХИЙЛЭЭ.
Улсын Их Хурлын Төсвийн Байнгын хорооны 2017 оны 2 дугаар тогтоол, Монгол Улсын Ерөнхий аудиторын 2017 оны А/12 дугаар тушаалаар баталсан Үндэсний Аудитын Газрын 2017 оны үйл ажиллагааны төлөвлөгөөг үндэслэн Төрийн аудитын тухай хуулиар тодорхойлсон Үндэсний аудитын газрын бүрэн эрхийн хүрээнд хийх “Нэмэгдсэн өртгийн татварын буцаан олголтын хэрэгжилт, үр дүн”, “Татварын хөнгөлөлт, чөлөөлөлтийн бодлого, түүний хэрэгжилт, үр дүн” сэдвүүдээр аудитын нээлтийн үйл ажиллагааг Сангийн яаманд хийлээ.
Дээрх аудитын нээлтэнд Үндэсний аудитын газраас Монгол Улсын Ерөнхий аудиторын орлогч С.Оюунбилэг, Гүйцэтгэлийн аудитын газрын захирал М.Давааням болон аудит хийх багийн гишүүд, Монгол Улсын Сангийн Дэд сайд Х.Булгантуяа, Сангийн яамны Төсвийн бодлого, төлөвлөлтийн газрын дарга Ж.Ганбат, Төсвийн орлогын хэлтсийн дарга Э.Алтанзул, Гаалийн ерөнхий газрын дэд дарга Б.Батхишиг, Татварын Ерөнхий газрын Татварын орлогын хэлтсийн дарга, Д.Цогтжаргал дэд дарга нар болон бусад албаны ажилтнууд оролцлоо.
Уг аудитуудаар 2015-2016 оны байдлаарх татварын хуулийн хөнгөлөлт, чөлөөлөлт эдэлсэн иргэн, аж ахуй нэгж, төсөл хөтөлбөрийн судалгаа, бүртгэл тайлагнал, статистик мэдээ, бусад материалд үндэслэн Сангийн яам, Татварын Ерөнхий газар, Гаалийн Ерөнхий газар болон аймаг, нийслэлийн холбогдох харьяа байгууллагууд, аж ахуй нэгж, иргэдийг түүврийн аргаар хамруулан шалгах ба нэмэгдсэн өртгийн албан татварын буцаан олголтын бодлого татварын хөнгөлөлт, чөлөөлөлтийн бодлого, зохицуулалт үр дүнтэй хэрэгжиж байгаа эсэх, түүнд тавих дотоод хяналт үр нөлөөтэй байж чадаж байгаа эсэх талаар Төрийн хяналт, шалгалтын стандарт, Гүйцэтгэлийн аудитын журам, АДБОУС 3000-3100 буюу Гүйцэтгэлийн аудитын удирдамжийн дагуу нягтлан шалгаж, дүгнэлт, зөвлөмж боловсруулан ажиллах юм.
