СТРАТЕГИЙН ОРД ЭЗЭМШИГЧДИЙН ҮЙЛ АЖИЛЛАГААНД ХИЙХ ГҮЙЦЭТГЭЛИЙН АУДИТЫН ТӨЛӨВЛӨЛТИЙН ШАТНЫ ХЭЛЭЛЦҮҮЛГИЙГ ЗОХИОН БАЙГУУЛЛАА

УИХ-ын Төсвийн байнгын хорооны 2017 оны 02 дугаар тогтоол, Үндэсний аудитын газраас Монгол Улсын Ерөнхий аудиторт 2017 онд нийлүүлэх бүтээгдэхүүн, ажил үйлчилгээний төлөвлөгөөний дагуу ҮАГ-ын Гүйцэтгэлийн аудитын газраас Стратегийн орд эзэмшигчдээс Монгол Улсын Засгийн газрын өмнө хүлээсэн үүргийн хэрэгжилтэд гүйцэтгэлийн аудит хийхээр төлөвлөлтийн шатны судалгааг эхлүүлээд байна.

Энэ ажлын хүрээнд стратегийн орд эзэмшигчидтэй холбоотой үйл ажиллагаа явуулдаг, тодорхой чиг үүрэг бүхий төрийн байгууллагуудын төлөөлөлтэй хийх уулзалтыг Монгол Улсын Ерөнхий аудиторын орлогч С.Оюунбилэг, Гүйцэтгэлийн аудитын газрын захирал М.Давааням, Гүйцэтгэлийн аудитын газрын менежер З.Ариунзаяа, ахлах аудитор Б.Болормаа, аудитор С.Одонцэцэг нарын бүрэлдэхүүнтэйгээр ҮАГ дээр зохион байгуулж, хэлэлцүүлэг хийлээ.

Тус хэлэлцүүлэгт Сангийн яамны Төсвийн орлогын газар болон Эдийн засгийн хөгжлийн газар, Уул уурхай, хүнд үйлдвэрийн яам, Татварын ерөнхий газар, Гаалийн ерөнхий газар, Мэргэжлийн хяналтын ерөнхий газрын удирдах шатны ажилтнууд оролцож, стратегийн орд эзэмшигчдийн үйл ажиллагаатай холбогдуулан гүйцэтгэх засаглалын байгууллагуудаас өнгөрсөн хугацаанд хэрэгжүүлж ирсэн үйл ажиллагаа, өнөөгийн байдлаар хариуцан хэрэгжүүлж буй чиг үүрэг, байгууллагуудын ажлын уялдаа, хамтын ажиллагааны талаар ҮАГ-т мэдээлэл өглөө.

Түүнчлэн  стратегийн орд эзэмшигчдийн үйл ажиллагаанд төрийн аудитын байгууллагаас хийх аудиттай холбогдуулан тулгамдсан асуудлууд, гүйцэтгэлийн аудитаар авч үзэх асуудлын талаар санал, бодлоо илэрхийллээ.

ҮАГ-ын Гүйцэтгэлийн аудитын газар нь Стратегийн орд эзэмшигчдээс Монгол Улсын Засгийн газрын өмнө хүлээсэн үүргийн хэрэгжилтэд хийх гүйцэтгэлийн аудитын төлөвлөгөө, зорилтыг боловсруулахдаа энэхүү уулзалт, хэлэлцүүлгээр олж авсан мэдээлэл, хөндөгдсөн асуудлыг зохих ёсоор тусгаж ажиллах юм.

Үндэсний аудитын газрын Гүйцэтгэлийн аудитын газар