“СТРАТЕГИЙН ОРД ЭЗЭМШИГЧДИЙН ЗАСГИЙН ГАЗРЫН ӨМНӨ ХҮЛЭЭСЭН ҮҮРГИЙН ХЭРЭГЖИЛТ, ҮР ДҮН”-Д ХИЙХ АУДИТЫН НЭЭЛТИЙГ ХИЙЛЭЭ

УИХ-ын Төсвийн байнгын хорооны 2017 оны “Аудитын сэдэв батлах тухай” 02 дугаар тогтоол, Монгол Улсын Ерөнхий аудиторын А/12 тушаалыг үндэслэн “Стратегийн орд эзэмшигчдийн Засгийн газрын өмнө хүлээсэн үүргийн хэрэгжилт, үр дүн”-д хийх аудитын нээлтийн үйл ажиллагаа боллоо.

Монгол Улсын Ерөнхий аудиторын орлогч С.Оюунбилэг үг хэлснээр нээлтийн үйл ажиллагаа эхэлж, Үндэсний аудитын газрын Гүйцэтгэлийн аудитын газрын захирал, тэргүүлэх аудитор М.Даваанямаар удирдуулсан аудитын баг гүйцэтгэх аудитын төлөвлөгөөг танилцууллаа.

Тус нээлтийн үйл ажиллагаанд БОАЖЯ, УУХҮЯ, МХЕГ, АМГТГ, “Цайрт Минерал”, “Чинхуа Мак Нарийн Сухайт”, “Монголын алт”, “Бороо Гоулд”, “Сентерра гоулд Монголия”, “Эрдэнэт үйлдвэр” ХХК, “Дарханы Төмөрлөгийн үйлдвэр”, “Багануур”, “Шивээ овоо” ХК-ийн төлөөлөгчид оролцлоо.

“Стратегийн орд эзэмшигчдийн Засгийн газрын өмнө хүлээсэн үүргийн хэрэгжилт, үр дүн”-д хийх аудитыг хууль эрхзүйн орчин хангалттай эсэх, орд эзэмшигчид Засгийн газрын өмнө хүлээсэн үүргээ биелүүлсэн эсэх, тэдний үйл ажиллагаа нийгэм, эдийн засагт үр өгөөж өгч буй эсэх, хяналтын тогтолцоо үр нөлөөтэй эсэхийг дүгнэх зорилтын хүрээнд гүйцэтгэх юм. Үүнд Уул уурхай, хүнд үйлдвэрийн яам, Байгаль орчин, аялал жуулчлалын яам, Ашигт малтмал, газрын тосны газар, Сангийн яам, Татварын ерөнхий газар, Гаалийн ерөнхий газар, Мэргэжлийн хяналтын ерөнхий газар гэсэн төрийн байгууллагууд төлөвлөгөөнд тусгагдсан чиг үүргийн дагуу оролцоно. Аудитад “Эрдэнэт”, “Цагаан суварга”, “Нарийн сухайт”, “Багануур”, “Шивээ-Овоо”, “Асгат”, “Төмөртэй”, “Төмөртийн овоо”, “Бүрэнхаан”, “Дорнод”, “Гурванбулаг”, “Мардай”, “Бороо”, “Гацуурт” зэрэг ордыг хамруулах юм.