МОНГОЛ УЛСЫН ЕРӨНХИЙ АУДИТОР Д.ХҮРЭЛБААТАР ШИНЭЭР ТОМИЛОГДСОН ТӨСВИЙН ЕРӨНХИЙЛӨН ЗАХИРАГЧ НАРТ САНХҮҮГИЙН САХИЛГА ХАРИУЦЛАГЫГ ДЭЭШЛҮҮЛЭХ ЧИГЛЭЛЭЭР ЗӨВЛӨМЖ ӨГЧ АЖИЛЛАЖ БАЙНА

Монгол Улсын Ерөнхий аудиторын бодлогын хүрээнд 2017 оныг “Сахилга хариуцлагыг дээшлүүлэх жил” болгон зарласантай холбоотойгоор Үндэсний аудитын газраас анх удаа зөвлөмжийн биелэлтийг шалгах аяныг зохион байгуулсан.

Төсөв захирагчдын 2016 оны санхүүгийн тайлангийн аудитаар өгсөн акт, албан шаардлага, зөвлөмжийн хэрэгжилтийг үнэлэх зорилготой тус аяны үр дүнг Монгол Улсын Ерөнхий аудитор Д.Хүрэлбаатар бүх салбарын сайд нарт танилцуулах үйл ажиллагаа эхэллээ.

Тус үйл ажиллагаа нь:

• Төсвийн ерөнхийлөн болон төвлөрүүлэн захирагчид, тэдгээрийн эрхлэх асуудлын хүрээний байгууллагуудын 2016 оны санхүүгийн тайлангийн аудитаар илэрсэн зөрчил дутагдал;
• Дээрх зөрчил дутагдлыг арилгах чиглэлээр өгсөн төлбөрийн акт, албан шаардлага, зөвлөмжийн хэрэгжилт /2017 оны эхний хагас жилийн байдлаар/;
• Шинээр томилогдсон Төсвийн ерөнхийлөн захирагч нарт дээрх зөрчил дутагдлыг засч, залруулахад анхаарах асуудлаар зөвлөмж өгөх зорилготой юм.

Энэхүү үйл ажиллагаанд Монгол Улсын Ерөнхий аудитор Д.Хүрэлбаатар, Үндэсний аудитын газрын Санхүүгийн аудитын газрын захирал бөгөөд тэргүүлэх аудитор Ц.Наранчимэгээр удирдуулсан аудитын баг, Хүнс, хөдөө аж ахуй, хөнгөн үйлдвэрийн сайд Б.Батзориг, түүний эрхлэх асуудлын хүрээний байгууллагуудын удирдлагууд оролцлоо.

Хүнс, хөдөө аж ахуй, хөнгөн үйлдвэрийн сайдын эрхлэх асуудлын хүрээний байгууллагуудын 2016 оны жилийн эцсийн санхүүгийн тайлангийн аудитад 30 байгууллага хамрагдсан бөгөөд 25 байгууллага “Зөрчилгүй”, 4 байгууллага  “Хязгаарлалттай”, 1 байгууллага “Сөрөг” санал дүгнэлт авсан байна. Тодруулбал,  “Хязгаарлалттай” санал дүгнэлт авсан байгууллагууд:

-Тариалан эрхлэлтийг дэмжих сан;

-Жижиг, дунд үйлдвэрлэлийг дэмжих сан;

-Малын удмын сангийн үндэсний төв;

-Хөдөө аж ахуйн бирж;

“Сөрөг” санал, дүгнэлт авсан байгууллага:

-Говь-Алтай аймгийн Хүнс, хөдөө аж ахуйн газар.

Түүнчлэн тус төсвийн ерөнхийлөн захирагчийн эрхлэх асуудлын хүрээний байгууллагуудын 2016 оны санхүүгийн тайлангийн аудитаар 1 их наяд 105.4 тэрбум төгрөгийн зөвлөмж өгөгдсөнөөс 56.8 хувь буюу 628.2 тэрбум төгрөгийн зөвлөмжийг биелүүлсэн буюу биелэгдэх шатандаа, 43.2 хувь буюу 477.2 тэрбум төгрөгийн зөвлөмжийг хэрэгжүүлээгүй байна.

Тиймээс цаашид:

-Аудитаар өгсөн зөвлөмж, акт, албан шаардлагыг хэрэгжүүлж ажиллах;

-Хэрэгжүүлээгүй ажилтанд хариуцлага тооцох;

-Төсвийг батлагдсан хэмжээнд зориулалтын дагуу зарцуулах, авлага, өглөгийг барагдуулах, тооцоо нийлж баталгаажуулах,

-Авлага, өглөгийг нэмэгдүүлэхгүй байх, олж бэлтгэсэн хөрөнгийг холбогдох байгууллагын шийдвэрийг үндэслэн данс бүртгэлд тусгах,

-Худалдан авалт хийхдээ хууль, журмын дагуу зохион байгуулах, хугацаа хэтэрсэн зээлийг барагдуулах, эргэн төлөлтийн хэрэгжилтэнд хяналт тавих,

-Дотоод хяналтыг сайжруулах,

-Үйл ажиллагааг зөв зохион байгуулах зэрэг санхүүгийн зөрчил гаргахгүй байх зөвлөмжийг өглөө.

Хүнс, хөдөө аж ахуй, хөнгөн үйлдвэрийн сайд Б.Батзориг Үндэсний аудитын газраас зохион байгуулж байгаа тус үйл ажиллагаанд талархалтай байгаагаа илэрхийлээд, санхүүгийн тайлангийн аудитаар илэрсэн зөрчил дутагдлыг арилгах, акт, албан шаардлага, зөвлөмжийн биелэлтийг сайжруулах талаар эрхлэх асуудлын хүрээний байгууллагын удирдлагуудад үүрэг чиглэл өглөө.