МОНГОЛ УЛСЫН ЕРӨНХИЙ АУДИТОР БАЙГАЛЬ ОРЧИН, АЯЛАЛ ЖУУЛЧЛАЛЫН САЙДАД САНХҮҮГИЙН САХИЛГА ХАРИУЦЛАГЫГ ДЭЭШЛҮҮЛЭХ ЧИГЛЭЛЭЭР ЗӨВЛӨМЖ ӨГЧ АЖИЛЛАЛАА

Монгол Улсын Ерөнхий аудиторын бодлогын хүрээнд 2017 оныг “Сахилга хариуцлагыг дээшлүүлэх жил” болгон зарласантай холбоотойгоор Үндэсний аудитын газраас анх удаа зөвлөмжийн биелэлтийг шалгах аяныг зохион байгуулсан.

Төсөв захирагчдын 2016 оны санхүүгийн тайлангийн аудитаар өгсөн акт, албан шаардлага, зөвлөмжийн хэрэгжилтийг үнэлэх зорилготой тус аяны үр дүнг Монгол Улсын Ерөнхий аудитор Д.Хүрэлбаатар шинээр томилогдсон төсвийн ерөнхийлөн захирагч нарт танилцуулж, зөвлөмж өгөх үйл ажиллагаа үргэлжилж байна.

Тус үйл ажиллагаа нь:

• Төсвийн ерөнхийлөн болон төвлөрүүлэн захирагчид, тэдгээрийн эрхлэх асуудлын хүрээний байгууллагуудын 2016 оны санхүүгийн тайлангийн аудитаар илэрсэн зөрчил дутагдал;
• Дээрх зөрчил дутагдлыг арилгах чиглэлээр өгсөн төлбөрийн акт, албан шаардлага, зөвлөмжийн хэрэгжилт /2017 оны эхний хагас жилийн байдлаар/;
• Шинээр томилогдсон Төсвийн ерөнхийлөн захирагч нарт дээрх зөрчил дутагдлыг засч, залруулахад анхаарах асуудлаар зөвлөмж өгөх зорилготой юм.

Энэхүү үйл ажиллагаанд Монгол Улсын Ерөнхий аудитор Д.Хүрэлбаатар, Монгол Улсын Ерөнхий аудиторын орлогч бөгөөд Тэргүүлэх аудитор С.Оюунбилэг, Үндэсний аудитын газрын Санхүүгийн аудитын газрын захирал бөгөөд Тэргүүлэх аудитор Ц.Наранчимэгээр удирдуулсан аудитын баг, Байгаль орчин, аялал жуулчлалын сайд Н.Цэрэнбат, түүний эрхлэх асуудлын хүрээний байгууллагуудын удирдлагууд оролцлоо.

Байгаль орчин, аялал жуулчлалын сайдын эрхлэх асуудлын хүрээний байгууллагуудын 2016 оны жилийн эцсийн санхүүгийн тайлангийн аудитад  төсвийн шууд захирагч 53, төсвийн төвлөрүүлэн захирагч 1, Засгийн газрын тусгай сан, төсөл 6, төрийн өмчийн аж ахуй нэгж 3 хамрагдсан байна.

Аудитад хамрагдсан байгууллагуудаас 58 байгууллага “Зөрчилгүй” дүгнэлт авсан.

Харин “Хязгаарлалттай” санал авсан байгууллага:

-Байгаль орчин, уур амьсгалын сан;

-Говийн их дархан цаазат газрын “Б” хэсгийн хамгаалалтын захиргаа;

-Монгол Ус ТӨААТҮГ;

-Увс нуурын ай савын Улсын тусгай хамгаалалттай газар.

Түүнчлэн Байгаль орчин, аялал жуулчлалын яамны 2016 оны санхүүгийн тайлангийн аудитаар тогтоосон актыг бүрэн барагдуулсан ба албан шаардлага 80 хувь, зөвлөмж 87.5 хувийн биелэлттэй байна.

Тиймээс цаашид:

-Аудитаар өгсөн зөвлөмжийн хэрэгжилтийг хангаж ажиллах;

-Хэрэгжүүлээгүй ажилтанд хариуцлага тооцох;

-Төсвийг батлагдсан хэмжээнд зориулалтын дагуу зарцуулах, авлага, өглөгийг барагдуулах, тооцоо нийлж баталгаажуулах,

-Авлага, өглөгийг нэмэгдүүлэхгүй байх, олж бэлтгэсэн хөрөнгийг холбогдох байгууллагын шийдвэрийг үндэслэн данс бүртгэлд тусгах,

-Шилэн дансны тухай хуулийн хэрэгжилтийг бүрэн хангаж ажиллах;

– Засгийн газрын тусгай сангийн хөрөнгийг бүрдүүлэх, зарцуулахад тавих хяналтыг сайжруулах;

-Дотоод хяналтыг сайжруулах,

-Үйл ажиллагааг зөв зохион байгуулах зэрэг санхүүгийн зөрчил гаргахгүй байх зөвлөмжийг өглөө.

Байгаль орчин, аялал жуулчлалын сайд Н.Цэрэнбат Үндэсний аудитын газраас зохион байгуулж байгаа тус үйл ажиллагаанд талархалтай байгаагаа илэрхийлээд, санхүүгийн тайлангийн аудитаар илэрсэн зөрчил дутагдлыг арилгах, акт, албан шаардлага, зөвлөмжийн биелэлтийг сайжруулах талаар эрхлэх асуудлын хүрээний байгууллагын удирдлагуудад үүрэг чиглэл өглөө.