МОНГОЛ УЛСЫН ЕРӨНХИЙ АУДИТОР БОЛОВСРОЛ, СОЁЛ, ШИНЖЛЭХ УХААН, СПОРТЫН САЙДАД САНХҮҮГИЙН САХИЛГА ХАРИУЦЛАГЫГ ДЭЭШЛҮҮЛЭХ ЧИГЛЭЛЭЭР ЗӨВЛӨМЖ ӨГЧ АЖИЛЛАЛАА

Монгол Улсын Ерөнхий аудиторын бодлогын хүрээнд 2017 оныг “Сахилга хариуцлагыг дээшлүүлэх жил” болгон зарласантай холбоотойгоор Үндэсний аудитын газраас анх удаа зөвлөмжийн биелэлтийг шалгах аяныг зохион байгуулсан.

Төсөв захирагчдын 2016 оны санхүүгийн тайлангийн аудитаар өгсөн акт, албан шаардлага, зөвлөмжийн хэрэгжилтийг үнэлэх зорилготой тус аяны үр дүнг Монгол Улсын Ерөнхий аудитор Д.Хүрэлбаатар шинээр томилогдсон төсвийн ерөнхийлөн захирагч нарт танилцуулж, зөвлөмж өгөх үйл ажиллагаа үргэлжилж байна.

Тус үйл ажиллагаа нь:

• Төсвийн ерөнхийлөн болон төвлөрүүлэн захирагчид, тэдгээрийн эрхлэх асуудлын хүрээний байгууллагуудын 2016 оны санхүүгийн тайлангийн аудитаар илэрсэн зөрчил дутагдал;
• Дээрх зөрчил дутагдлыг арилгах чиглэлээр өгсөн төлбөрийн акт, албан шаардлага, зөвлөмжийн хэрэгжилт /2017 оны эхний хагас жилийн байдлаар/;
• Шинээр томилогдсон Төсвийн ерөнхийлөн захирагч нарт дээрх зөрчил дутагдлыг засч, залруулахад анхаарах асуудлаар зөвлөмж өгөх зорилготой юм.

Энэхүү үйл ажиллагаанд Монгол Улсын Ерөнхий аудитор Д.Хүрэлбаатар, Монгол Улсын Ерөнхий аудиторын орлогч бөгөөд Тэргүүлэх аудитор С.Оюунбилэг, Үндэсний аудитын газрын Санхүүгийн аудитын газрын захирал бөгөөд тэргүүлэх аудитор Ц.Наранчимэгээр удирдуулсан аудитын баг, Боловсрол, соёл, шинжлэх ухаан, спортын яамны Төрийн нарийн бичгийн дарга Ж.Болормаа, сайдын эрхлэх асуудлын хүрээний байгууллагуудын удирдлагууд оролцлоо.

Боловсрол, соёл, шинжлэх ухаан, спортын сайдын эрхлэх асуудлын хүрээний байгууллагуудын 2016 оны жилийн эцсийн санхүүгийн тайлангийн аудитад  төсвийн төвлөрүүлэн захирагч 2, төсвийн шууд захирагч 52  байгууллага хамрагдсан байна.

Аудитад хамрагдсан байгууллагуудаас 44 нь “Зөрчилгүй” дүгнэлт авсан бөгөөд “Хязгаарлалттай” санал авсан байгууллага:

– Архангай, Хэнтий аймгийн Боловсролын газар;

– Завхан аймгийн Хөгжим бүжгийн коллеж, Биеийн тамир, спортын газар;

– Үндэсний номын сан;

– Театрын музей;

-Шинжлэх ухаан, технологийн их сургууль;

-“Булган Хангал” спортын бэлтгэлийн төв;

Түүнчлэн тус төсвийн ерөнхийлөн захирагчийн эрхэлсэн асуудлын хүрээний байгууллагуудын 2016 оны санхүүгийн тайлангийн аудитаар 3.4 сая төгрөгийн 2 төлбөрийн актын биелэлт 52.9 хувь, 40 сая төгрөгийн 3 албан шаардлагын биелэлт 64.7 хувь, 177 зөвлөмжийн биeлэлт 34.4 хувийн хэрэгжилттэй байна. Мөн сайдын эрхлэх асуудлын хүрээний байгууллагууд Төсвийн ерөнхийлөн захирагчид зөвлөмжийн хэрэгжилтийг ирүүлээгүй, тус яамны Хяналт-шинжилгээ, үнэлгээ, дотоод аудитын газар зөвлөмжийн хэрэгжилтийг нэгтгэж дүгнээгүй байна.

Тиймээс цаашид:

-Аудитаар өгсөн зөвлөмжийн хэрэгжилтийг хангаж ажиллах;

-Хэрэгжүүлээгүй ажилтанд хариуцлага тооцох;

-Төсвийг батлагдсан хэмжээнд зориулалтын дагуу зарцуулах, авлага, өглөгийг барагдуулах, тооцоо нийлж баталгаажуулах,

-Авлага, өглөгийг нэмэгдүүлэхгүй байх, олж бэлтгэсэн хөрөнгийг холбогдох байгууллагын шийдвэрийг үндэслэн данс бүртгэлд тусгах,

-Шилэн дансны тухай хуулийн хэрэгжилтийг бүрэн хангаж ажиллах;

– Засгийн газрын тусгай сангийн хөрөнгийг бүрдүүлэх, зарцуулахад тавих хяналтыг сайжруулах;

-Дотоод хяналтыг сайжруулах,

-Үйл ажиллагааг зөв зохион байгуулах зэрэг санхүүгийн зөрчил гаргахгүй байх зөвлөмжийг өглөө.

Боловсрол, соёл, шинжлэх ухаан, спортын яамны Төрийн нарийн бичгийн дарга Ж.Болормаа Үндэсний аудитын газраас зохион байгуулж байгаа тус үйл ажиллагаанд талархалтай байгаагаа илэрхийлээд, санхүүгийн тайлангийн аудитаар илэрсэн зөрчил дутагдлыг арилгах, акт, албан шаардлага, зөвлөмжийн биелэлтийг сайжруулах талаар эрхлэх асуудлын хүрээний байгууллагын удирдлагуудад үүрэг чиглэл өглөө.