МОНГОЛ УЛСЫН ЕРӨНХИЙ АУДИТОР БАРИЛГА, ХОТ БАЙГУУЛАЛТЫН САЙДАД САНХҮҮГИЙН САХИЛГА ХАРИУЦЛАГЫГ ДЭЭШЛҮҮЛЭХ ЧИГЛЭЛЭЭР ЗӨВЛӨМЖ ӨГЧ АЖИЛЛАЛАА

Монгол Улсын Ерөнхий аудиторын бодлогын хүрээнд 2017 оныг “Сахилга хариуцлагыг дээшлүүлэх жил” болгон зарласантай холбоотойгоор Үндэсний аудитын газраас анх удаа зөвлөмжийн биелэлтийг шалгах аяныг зохион байгуулсан.

Төсөв захирагчдын 2016 оны санхүүгийн тайлангийн аудитаар өгсөн акт, албан шаардлага, зөвлөмжийн хэрэгжилтийг үнэлэх зорилготой тус аяны үр дүнг Монгол Улсын Ерөнхий аудитор Д.Хүрэлбаатар шинээр томилогдсон төсвийн ерөнхийлөн захирагч нарт танилцуулж, зөвлөмж өгөх үйл ажиллагаа үргэлжилж байна.

Тус үйл ажиллагаа нь:

• Төсвийн ерөнхийлөн болон төвлөрүүлэн захирагчид, тэдгээрийн эрхлэх асуудлын хүрээний байгууллагуудын 2016 оны санхүүгийн тайлангийн аудитаар илэрсэн зөрчил дутагдал;
• Дээрх зөрчил дутагдлыг арилгах чиглэлээр өгсөн төлбөрийн акт, албан шаардлага, зөвлөмжийн хэрэгжилт /2017 оны эхний хагас жилийн байдлаар/;
• Шинээр томилогдсон Төсвийн ерөнхийлөн захирагч нарт дээрх зөрчил дутагдлыг засч, залруулахад анхаарах асуудлаар зөвлөмж өгөх зорилготой юм.

Энэхүү үйл ажиллагаанд Монгол Улсын Ерөнхий аудитор Д.Хүрэлбаатар, Монгол Улсын Ерөнхий аудиторын орлогч бөгөөд Тэргүүлэх аудитор С.Оюунбилэг, Үндэсний аудитын газрын Санхүүгийн аудитын газрын захирал бөгөөд Тэргүүлэх аудитор Ц.Наранчимэгээр удирдуулсан аудитын баг, Барилга, хот байгуулалтын  сайд Х.Баделхан, түүний эрхлэх асуудлын хүрээний байгууллагуудын удирдлагууд оролцлоо.

Барилга, хот байгуулалтын сайдын эрхлэх асуудлын хүрээний байгууллагуудын 2016 оны санхүүгийн нэгтгэсэн тайланд “Хязгаарлалттай” дүгнэлт өгсөн бөгөөд дараах үндэслэлтэй байна:

• Санхүүгийн нэгтгэсэн тайлангаарх нийт хөрөнгийн 47 хувийг эзэлж буй “ТОСК” ТӨҮГ-ын санхүүгийн тайланд хийсэн аудитаар 30.9 тэрбум төгрөгийн алдаа, зөрчил илрүүлсэн;
• УБ хотын VII, XIV, МҮОНРТ хорооллын орон сууц, дэд бүтцийн төслийн ажилтнуудын цалингийн төсөв 153.7 сая төгрөгөөр хэтэрсэн;
• Яамны аппарат тайлант хугацаанд зарим компанитай байгуулсан гэрээний дагуу урьдчилгаа төлбөрт 6.6 сая төгрөгийг шилжүүлсэн боловч гэрээг дүгнээгүй, 9.5-9.8 сая төгрөгийн үнийн дүн бүхий ижил ажлын даалгавартай гэрээг байгуулж, төлбөр төлсөн, зарим ажилтнуудад журам зөрчиж 4.2 сая төгрөгийн урамшуулал олгосон зэрэг зөрчилд нийт 30.1 сая төгрөгийн төлбөрийг барагдуулах акт тогтоосон;
• БХБЯ-ны албан тушаалтнуудын нийт 138.2 сая төгрөгийн томилолт болон бусад зардлыг яамны удирдлагын хүсэлтийг үндэслэн харьяа Барилгын хөгжлийн төв, “Төрийн орон сууцны корпораци“ ТӨҮГ-аас санхүүжүүлсэн, техник хяналтын зардлын данснаас зохих анхан шатны баримтын бүрдэлгүйгээр 28.2 сая төгрөгийг зарцуулж, зардлаар хүлээн зөвшөөрсөн.

Аудитад 7 байгууллага хамрагдаж, дээрх зөрчил дутагдалд 33 зөвлөмж, 15 акт, албан шаардлага хүлээлгэн өгчээ. Харин тус яамны Хяналт-шинжилгээ, үнэлгээ, дотоод аудитын газар Үндэсний аудитын газраас өгсөн зөвлөмжийг хэрэгжүүлэх төлөвлөгөө боловсруулан харъяа байгууллагуудаас хагас жилийн биeлэлтийг гаргуулж, дунджаар 85.5 хувийн биелэлттэй гэж тооцсон байна.

Тиймээс цаашид:

-Аудитаар өгсөн акт, албан шаардлага, зөвлөмжийг тайлант онд багтаан хэрэгжүүлэх;

-Хэрэгжүүлээгүй ажилтанд хариуцлага тооцох;

-Төсвийг батлагдсан хэмжээнд зориулалтын дагуу зарцуулах, авлага, өглөгийг барагдуулах, тооцоо нийлж баталгаажуулах,

-Авлага, өглөгийг нэмэгдүүлэхгүй байх, олж бэлтгэсэн хөрөнгийг холбогдох байгууллагын шийдвэрийг үндэслэн данс бүртгэлд тусгах,

-Шилэн дансны тухай хуулийн хэрэгжилтийг бүрэн хангаж ажиллах;

-Дотоод хяналтыг сайжруулах,

-Үйл ажиллагааг зөв зохион байгуулах зэрэг санхүүгийн зөрчил гаргахгүй байх зөвлөмжийг өглөө.

Барилга хот байгуулалтын сайд Х.Баделхан Үндэсний аудитын газраас зохион байгуулж байгаа тус үйл ажиллагаанд талархалтай байгаагаа илэрхийлээд, санхүүгийн тайлангийн аудитаар илэрсэн зөрчил дутагдлыг арилгах, акт, албан шаардлага, зөвлөмжийн биелэлтийг сайжруулах талаар эрхлэх асуудлын хүрээний байгууллагын удирдлагуудад үүрэг чиглэл өглөө.