МОНГОЛ УЛСЫН ЕРӨНХИЙ АУДИТОР ХУУЛЬ ЗҮЙ, ДОТООД ХЭРГИЙН САЙДАД САНХҮҮГИЙН САХИЛГА ХАРИУЦЛАГЫГ ДЭЭШЛҮҮЛЭХ ЧИГЛЭЛЭЭР ЗӨВЛӨМЖ ӨГЧ АЖИЛЛАЛАА

Монгол Улсын Ерөнхий аудиторын бодлогын хүрээнд 2017 оныг “Сахилга хариуцлагыг дээшлүүлэх жил” болгон зарласантай холбоотойгоор Үндэсний аудитын газраас анх удаа зөвлөмжийн биелэлтийг шалгах аяныг зохион байгуулсан.

Төсөв захирагчдын 2016 оны санхүүгийн тайлангийн аудитаар өгсөн акт, албан шаардлага, зөвлөмжийн хэрэгжилтийг үнэлэх зорилготой тус аяны үр дүнг Монгол Улсын Ерөнхий аудитор Д.Хүрэлбаатар шинээр томилогдсон төсвийн ерөнхийлөн захирагч нарт танилцуулж, зөвлөмж өгөх үйл ажиллагаа үргэлжилж байна.

Тус үйл ажиллагаа нь:

• Төсвийн ерөнхийлөн болон төвлөрүүлэн захирагчид, тэдгээрийн эрхлэх асуудлын хүрээний байгууллагуудын 2016 оны санхүүгийн тайлангийн аудитаар илэрсэн зөрчил дутагдал;
• Дээрх зөрчил дутагдлыг арилгах чиглэлээр өгсөн төлбөрийн акт, албан шаардлага, зөвлөмжийн хэрэгжилт /2017 оны эхний хагас жилийн байдлаар/;
• Шинээр томилогдсон Төсвийн ерөнхийлөн захирагч нарт дээрх зөрчил дутагдлыг засч, залруулахад анхаарах асуудлаар зөвлөмж өгөх зорилготой юм.

Энэхүү үйл ажиллагаанд Монгол Улсын Ерөнхий аудитор Д.Хүрэлбаатар, Монгол Улсын Ерөнхий аудиторын орлогч бөгөөд Тэргүүлэх аудитор С.Оюунбилэг, Үндэсний аудитын газрын Санхүүгийн аудитын газрын захирал бөгөөд Тэргүүлэх аудитор Ц.Наранчимэгээр удирдуулсан аудитын баг, Хууль зүй, дотоод хэргийн сайд Ц.Нямдорж, түүний эрхлэх асуудлын хүрээний байгууллагуудын удирдлагууд оролцлоо.

2016 оны жилийн эцсийн санхүүгийн тайлангийн аудитаар Хууль зүй, дотоод хэргийн сайдын төсвийн санхүүгийн нэгтгэсэн тайлан болон эрхлэх асуудлын хүрээний 8 байгууллагад “Зөрчилгүй” дүгнэлт өгсөн байна. Аудитаар нийт 7.7 тэрбум төгрөгийн алдаа зөрчил илэрсэн бөгөөд төсөв захирагчдаар нь харуулбал:

-Төсвийн шууд захирагчдын санхүүгийн тайлангийн аудитаар нийт 168.9 сая төгрөгийн алдаа зөрчил илрүүлж 26 зөвлөмж,

-Төсвийн төвлөрүүлэн захирагчдын санхүүгийн тайлангийн аудитаар нийт 5.9 тэрбум төгрөгийн зөрчил илэрсний 90.7 сая төгрөгийн зөрчилд 24 төлбөрийн акт тогтоож, 681.6 сая төгрөгийн зөрчилд 62 албан шаардлага, 5.1 тэрбум төгрөгийн зөрчилд 238 зөвлөмж,

-Төрийн өмчит аж ахуйн нэгж байгууллагын санхүүгийн тайлангийн аудитаар нийт 1.6 тэрбум төгрөгийн зөрчил илэрсний 30.4 сая төгрөгийн зөрчилд 1 төлбөрийн акт тогтоож, 159.5 сая төгрөгийн зөрчилд 4 албан шаардлага, 1.5 тэрбум төгрөгийн зөрчилд зөвлөмж өгчээ.

Энэхүү зөрчил дутагдлаар илэрсэн төлбөрийн актын биелэлт нийт дүнгээрээ 100 хувь,  албан шаардлага 92 хувь, зөвлөмж 73 хувийн биелэлттэй байна.

Тиймээс цаашид:

-Аудитаар өгсөн акт, албан шаардлага, зөвлөмжийг тайлант онд багтаан хэрэгжүүлэх;

-Хэрэгжүүлээгүй ажилтанд хариуцлага тооцох;

-Төсвийг батлагдсан хэмжээнд зориулалтын дагуу зарцуулах, авлага, өглөгийг барагдуулах, тооцоо нийлж баталгаажуулах,

-Авлага, өглөгийг нэмэгдүүлэхгүй байх, олж бэлтгэсэн хөрөнгийг холбогдох байгууллагын шийдвэрийг үндэслэн данс бүртгэлд тусгах,

-Шилэн дансны тухай хуулийн хэрэгжилтийг бүрэн хангаж ажиллах;

-Дотоод хяналтыг сайжруулах,

-Үйл ажиллагааг зөв зохион байгуулах зэрэг санхүүгийн зөрчил гаргахгүй байх зөвлөмжийг өглөө.

Хууль зүй, дотоод хэргийн сайд Ц.Нямдорж Үндэсний аудитын газраас зохион байгуулж байгаа тус үйл ажиллагаанд талархалтай байгаагаа илэрхийлээд, санхүүгийн тайлангийн аудитаар илэрсэн зөрчил дутагдлыг арилгах, акт, албан шаардлага, зөвлөмжийн биелэлтийг бүрэн хэрэгжүүлж “Зөрчилгүй” төсөв захирагч нар болох талаар эрхлэх асуудлын хүрээний байгууллагын удирдлагуудад үүрэг чиглэл өглөө.