МОНГОЛ УЛСЫН ЕРӨНХИЙ АУДИТОР ХӨДӨЛМӨР, НИЙГМИЙН ХАМГААЛЛЫН САЙДАД САНХҮҮГИЙН САХИЛГА ХАРИУЦЛАГЫГ ДЭЭШЛҮҮЛЭХ ЧИГЛЭЛЭЭР ЗӨВЛӨМЖ ӨГЧ АЖИЛЛАЛАА

Монгол Улсын Ерөнхий аудиторын бодлогын хүрээнд 2017 оныг “Сахилга хариуцлагыг дээшлүүлэх жил” болгон зарласантай холбоотойгоор Үндэсний аудитын газраас анх удаа зөвлөмжийн биелэлтийг шалгах аяныг зохион байгуулсан.

Төсөв захирагчдын 2016 оны санхүүгийн тайлангийн аудитаар өгсөн акт, албан шаардлага, зөвлөмжийн хэрэгжилтийг үнэлэх зорилготой тус аяны үр дүнг Монгол Улсын Ерөнхий аудитор Д.Хүрэлбаатар шинээр томилогдсон төсвийн ерөнхийлөн захирагч нарт танилцуулж, зөвлөмж өгөх үйл ажиллагаа үргэлжилж байна.

Тус үйл ажиллагаа нь:

• Төсвийн ерөнхийлөн болон төвлөрүүлэн захирагчид, тэдгээрийн эрхлэх асуудлын хүрээний байгууллагуудын 2016 оны санхүүгийн тайлангийн аудитаар илэрсэн зөрчил дутагдал;
• Дээрх зөрчил дутагдлыг арилгах чиглэлээр өгсөн төлбөрийн акт, албан шаардлага, зөвлөмжийн хэрэгжилт /2017 оны эхний хагас жилийн байдлаар/;
• Шинээр томилогдсон Төсвийн ерөнхийлөн захирагч нарт дээрх зөрчил дутагдлыг засч, залруулахад анхаарах асуудлаар зөвлөмж өгөх зорилготой юм.

Энэхүү үйл ажиллагаанд Монгол Улсын Ерөнхий аудитор Д.Хүрэлбаатар, Үндэсний аудитын газрын Санхүүгийн аудитын газрын захирал бөгөөд Тэргүүлэх аудитор Ц.Наранчимэгээр удирдуулсан аудитын баг, Хөдөлмөр, нийгмийн хамгааллын сайд С.Чинзориг, түүний эрхлэх асуудлын хүрээний байгууллагуудын удирдлагууд оролцлоо.

Хөдөлмөр, нийгмийн хамгааллын сайдын эрхлэх асуудлын хүрээний байгууллагуудын 2016 оны санхүүгийн тайлангийн аудитад 56 байгууллага хамрагдсан бөгөөд үүнээс 47 нь “Зөрчилгүй”, 9 нь “Хязгаарлалттай” дүгнэлт авчээ.

“Хязгаарлалттай дүгнэлт авсан байгууллага:

• Хөдөлмөр эрхлэлтийг дэмжих сан;
• Мэргэжлийн боловсрол, сургалтыг дэмжих сан;
• Сэргээн засалт, сургалт үйлдвэрлэлийн төв;
• Хөдөлмөрийн аюулгүй байдал, эрүүл мэндийн төв;
• Олон улсын хүүхдийн Найрамдал цогцолбор;
• Булган дахь Мэргэжлийн сургалт, үйлдвэрлэлийн төв;
• Говь-Алтай аймаг дахь Мэргэжлийн сургалт, үйлдвэрлэлийн төв;
• Говьсүмбэр дэр Политехникийн коллеж;
• Монгол-Солонгосын Политехникийн коллеж.

Аудитаар нийт 61 тэрбум төгрөгийн алдаа, зөрчил илэрсэн ба үүнээс 57.8 тэрбум төгрөгийн зөрчлийг аудитын явцад залруулж, 0.8 тэрбум төгрөгийн 25 төлбөрийн акт, 0.9 тэрбум төгрөгийн 25 албан шаардлага, 1.3 тэрбум төгрөгийн 193 зөвлөмж өгсөн байна. Энэхүү зөвлөмжийн хэрэгжилт 72 хувьтай байна гэж дүгнэлээ.

Тус төсвийн ерөнхийлөн захирагчийн эрхлэх асуудлын хүрээний байгууллагуудын 2016 оны санхүүгийн нэгтгэсэн тайланд дараах үндэслэлээр “Хязгаарлалттай” дүгнэлт өгчээ. Үүнд:

• Санхүүгийн тайланд нэгтгэгдсэн 22.3 тэрбум төгрөгийн авлага, 0.5 тэрбум төгрөгийн богино хугацаат өр төлбөрийг баталгаажуулаагүй;
• 2.8 тэрбум төгрөгийн бараа, ажил үйлчилгээг худалдан авахдаа холбогдох хууль журмыг зөрчсөн;
• 2.2 тэрбум төгрөгийн анхан шатны баримтын бүрдэлгүй ажил гүйлгээг санхүүгийн тайланд тусгасан.

Тиймээс цаашид:

-Аудитаар өгсөн акт, албан шаардлага, зөвлөмжийг тайлант онд багтаан хэрэгжүүлэх;

-Хэрэгжүүлээгүй ажилтанд хариуцлага тооцох;

-Төсвийг батлагдсан хэмжээнд зориулалтын дагуу зарцуулах, авлага, өглөгийг барагдуулах, тооцоо нийлж баталгаажуулах,

-Авлага, өглөгийг нэмэгдүүлэхгүй байх, олж бэлтгэсэн хөрөнгийг холбогдох байгууллагын шийдвэрийг үндэслэн данс бүртгэлд тусгах,

-Хөдөлмөр эрхлэлтийг дэмжих сан, Нийгмийн халамжийн сан, Мэргэжлийн боловсрол, сургалтыг дэмжих сангийн хөрөнгийг бүрдүүлэх, зарцуулах, хяналт тавих журмыг заалтыг баримталж ажиллах;

-Шилэн дансны тухай хуулийн хэрэгжилтийг бүрэн хангаж ажиллах;

-Дотоод хяналтыг сайжруулах,

-Үйл ажиллагааг зөв зохион байгуулах зэрэг санхүүгийн зөрчил гаргахгүй байх зөвлөмжийг өглөө.

Хөдөлмөр, нийгмийн хамгааллын сайд С.Чинзориг Үндэсний аудитын газраас зохион байгуулж байгаа тус үйл ажиллагаанд талархалтай байгаагаа илэрхийлээд, санхүүгийн тайлангийн аудитаар илэрсэн зөрчил дутагдлыг арилгах, акт, албан шаардлага, зөвлөмжийн биелэлтийг тайлант онд багтаан бүрэн хэрэгжүүлж, “Зөрчилгүй” төсөв захирагч нар болох талаар эрхлэх асуудлын хүрээний байгууллагын удирдлагуудад үүрэг чиглэл өглөө.