МОНГОЛ УЛСЫН ЕРӨНХИЙ АУДИТОР ЗАМ, ТЭЭВРИЙН ХӨГЖЛИЙН САЙДАД САНХҮҮГИЙН САХИЛГА ХАРИУЦЛАГЫГ ДЭЭШЛҮҮЛЭХ ЧИГЛЭЛЭЭР ЗӨВЛӨМЖ ӨГЧ АЖИЛЛАЛАА

Монгол Улсын Ерөнхий аудиторын бодлогын хүрээнд 2017 оныг “Сахилга хариуцлагыг дээшлүүлэх жил” болгон зарласантай холбоотойгоор Үндэсний аудитын газраас анх удаа зөвлөмжийн биелэлтийг шалгах аяныг зохион байгуулсан.

Төсөв захирагчдын 2016 оны санхүүгийн тайлангийн аудитаар өгсөн акт, албан шаардлага, зөвлөмжийн хэрэгжилтийг үнэлэх зорилготой тус аяны үр дүнг Монгол Улсын Ерөнхий аудитор Д.Хүрэлбаатар шинээр томилогдсон төсвийн ерөнхийлөн захирагч нарт танилцуулж, зөвлөмж өгөх үйл ажиллагаа үргэлжилж байна.

Тус үйл ажиллагаа нь:

• Төсвийн ерөнхийлөн болон төвлөрүүлэн захирагчид, тэдгээрийн эрхлэх асуудлын хүрээний байгууллагуудын 2016 оны санхүүгийн тайлангийн аудитаар илэрсэн зөрчил дутагдал;
• Дээрх зөрчил дутагдлыг арилгах чиглэлээр өгсөн төлбөрийн акт, албан шаардлага, зөвлөмжийн хэрэгжилт /2017 оны эхний хагас жилийн байдлаар/;
• Шинээр томилогдсон Төсвийн ерөнхийлөн захирагч нарт дээрх зөрчил дутагдлыг засч, залруулахад анхаарах асуудлаар зөвлөмж өгөх зорилготой юм.

Энэхүү үйл ажиллагаанд Монгол Улсын Ерөнхий аудитор Д.Хүрэлбаатар, Монгол Улсын Ерөнхий аудиторын орлогч бөгөөд Тэргүүлэх аудитор С.Оюунбилэг, Үндэсний аудитын газрын Санхүүгийн аудитын газрын захирал бөгөөд Тэргүүлэх аудитор Ц.Наранчимэгээр удирдуулсан аудитын баг, Зам, тээврийн хөгжлийн сайд Ж.Бат-Эрдэнэ, түүний эрхлэх асуудлын хүрээний байгууллагуудын удирдлагууд оролцлоо.

Зам, тээврийн хөгжлийн сайдын эрхлэх асуудлын хүрээний байгууллагуудын 2016 оны санхүүгийн нэгтгэсэн тайланд хийсэн аудитаар “Хязгаарлалттай” дүгнэлт өгсөн бөгөөд 52 байгууллага хамрагдсанаас 47 нь “Зөрчилгүй”, 4 байгууллага “Хязгаарлалттай”, 1 байгууллага “Санал, дүгнэлт өгөхөөс татгалзсан” дүгнэлт авчээ.

“Хязгаарлалттай” дүгнэлт авсан байгууллага:

• Иргэний нисэхийн ерөнхий газар;
• Авто замын тоног төхөөрөмжийн түрээс;
• Эрдэнэсант АЗЗА;
• Багануур АЗЗА.

“Санал, дүгнэлт өгөхөөс татгалзсан” дүгнэлт авсан байгууллага:

• “Монголын төмөр зам” ХХК.

Аудитаар  нийт 1.3 тэрбум төгрөгийн албан шаардлага өгснийг 65 хувь, 22.1 сая төгрөгийн төлбөрийг барагдуулах акт өгснийг 37 хувь, 594.8 сая төгрөгийн зөвлөмжийг 78.4 хувьтай биелүүлжээ.

Тус төсвийн ерөнхийлөн захирагчийн эрхлэх асуудлын хүрээний байгууллагуудын 2016 оны санхүүгийн тайлангийн аудитаар дараах нийтлэг алдаа, зөрчлүүд илэрчээ. Үүнд:

• Өр төлбөр, авлагын үлдэгдлийг харилцагч байгууллагатай тооцоо нийлж баталгаажуулаагүй, авлага, өр төлбөр өмнөх оноос нэмэгдсэн;
• Гадаадын зээл, тусламжийн хөрөнгийн эх үүсвэрээр хэрэгжиж дууссан төслийн нэгжийн дансыг хааж, хөрөнгийг холбогдох байгууллагад шилжүүлээгүй, бүрэн ашиглалтад орсон барилга, байгууламжийг санхүүгийн тайланд дуусаагүй барилга дансанд бүртгэсэн, зарим төслийн санхүүгийн тайлан аудитад хамрагдаагүй;
• Төрийн өмчит аж ахуйн нэгж, байгууллага санхүүгийн тайланг хуулийн хугацааг хоцроож хүргүүлсэн, зөрүүтэй тайлагнасан.

Тиймээс цаашид:

-Төсөл хөтөлбөрүүдийн санхүүгийн тайланг аудитад бүрэн хамруулах;

Аудитаар өгсөн акт, албан шаардлага, зөвлөмжийг тайлант онд багтаан хэрэгжүүлэх;

-Хэрэгжүүлээгүй ажилтанд хариуцлага тооцох;

-Төсвийг батлагдсан хэмжээнд зориулалтын дагуу зарцуулах, авлага, өглөгийг барагдуулах, тооцоо нийлж баталгаажуулах;

-Авлага, өглөгийг нэмэгдүүлэхгүй байх, олж бэлтгэсэн хөрөнгийг холбогдох байгууллагын шийдвэрийг үндэслэн данс бүртгэлд тусгах;

– Дууссан төсөл хөтөлбөрүүдийн үр дүнд бий болсон зам гүүрийн барилга байгууламжийг үндсэн хөрөнгөд шилжүүлэн бүртгэж холбогдох стандарт, журмын дагуу элэгдэл тооцох;

– Хөрөнгө оруулалтын санхүүгийн тайланд бүртгэлтэй улсын чанартай зам гүүрийн барилга байгууламжийн нэгдсэн тооллого хийх, бүртгэлийг сайжруулах;

-Дотоод хяналтыг сайжруулах,

-Үйл ажиллагааг зөв зохион байгуулах зэрэг санхүүгийн зөрчил гаргахгүй байх зөвлөмжийг өглөө.

Зам, тээврийн хөгжлийн сайд Ж.Бат-Эрдэнэ Үндэсний аудитын газраас зохион байгуулж байгаа тус үйл ажиллагаанд талархалтай байгаагаа илэрхийлээд, хариуцлагын тогтолцоог бүх шатанд онцгой анхаарч ажиллахаа хэллээ. Түүнчлэн санхүүгийн тайлангийн аудитаар илэрсэн зөрчил дутагдлыг арилгах, акт, албан шаардлага, зөвлөмжийн биелэлтийг тайлант онд багтаан бүрэн хэрэгжүүлэх талаар эрхлэх асуудлын хүрээний байгууллагын удирдлагуудад үүрэг чиглэл өглөө.