МОНГОЛ УЛСЫН ЕРӨНХИЙ АУДИТОР БАТЛАН ХАМГААЛАХЫН САЙДАД САНХҮҮГИЙН САХИЛГА ХАРИУЦЛАГЫГ ДЭЭШЛҮҮЛЭХ ЧИГЛЭЛЭЭР ЗӨВЛӨМЖ ӨГЧ АЖИЛЛАЛАА

Монгол Улсын Ерөнхий аудиторын бодлогын хүрээнд 2017 оныг “Сахилга хариуцлагыг дээшлүүлэх жил” болгон зарласантай холбоотойгоор Үндэсний аудитын газраас анх удаа зөвлөмжийн биелэлтийг шалгах аяныг зохион байгуулсан.

Төсөв захирагчдын 2016 оны санхүүгийн тайлангийн аудитаар өгсөн акт, албан шаардлага, зөвлөмжийн хэрэгжилтийг үнэлэх зорилготой тус аяны үр дүнг Монгол Улсын Ерөнхий аудитор Д.Хүрэлбаатар шинээр томилогдсон төсвийн ерөнхийлөн захирагч нарт танилцуулж, зөвлөмж өгөх үйл ажиллагаа үргэлжилж байна.

Тус үйл ажиллагаа нь:

• Төсвийн ерөнхийлөн болон төвлөрүүлэн захирагчид, тэдгээрийн эрхлэх асуудлын хүрээний байгууллагуудын 2016 оны санхүүгийн тайлангийн аудитаар илэрсэн зөрчил дутагдал;
• Дээрх зөрчил дутагдлыг арилгах чиглэлээр өгсөн төлбөрийн акт, албан шаардлага, зөвлөмжийн хэрэгжилт /2017 оны эхний хагас жилийн байдлаар/;
• Шинээр томилогдсон Төсвийн ерөнхийлөн захирагч нарт дээрх зөрчил дутагдлыг засч, залруулахад анхаарах асуудлаар зөвлөмж өгөх зорилготой юм.

Энэхүү үйл ажиллагаанд Монгол Улсын Ерөнхий аудитор Д.Хүрэлбаатар, Монгол Улсын Ерөнхий аудиторын орлогч бөгөөд Тэргүүлэх аудитор С.Оюунбилэг, Үндэсний аудитын газрын Санхүүгийн аудитын газрын захирал бөгөөд Тэргүүлэх аудитор Ц.Наранчимэгээр удирдуулсан аудитын баг, Батлан хамгаалахын сайд Н.Энхболд, түүний эрхлэх асуудлын хүрээний байгууллагуудын удирдлагууд оролцлоо.

Батлан хамгаалахын сайдын эрхлэх асуудлын хүрээний байгууллагуудын 2016 оны санхүүгийн нэгтгэсэн тайланд хийсэн аудитаар “Зөрчилгүй” дүгнэлт өгсөн бөгөөд 86 байгуулллагын санхүүгийн тайланг нэгтгэгдсэнээс 48 тайланд аудитын дүгнэлт гаргасан. Үүнээс 46 нь “Зөрчилгүй”, 2 байгууллага “Хязгаарлалттай”  дүгнэлт авчээ.

“Хязгаарлалттай” дүгнэлт авсан байгууллага:

• “Батлан хамгаалах аж үйлдвэрийн нэгдэл” ТӨААТҮГ;
• Зэвсэгт хүчний 232 дугаар анги;

Аудитаар нийт 48.05 тэрбум төгрөгийн алдаа зөрчил илэрснээс 887.6 сая төгрөгийн алдааг аудитын явцад залруулж, 724.3 сая төгрөгийн алдааг арилгах 7 албан шаардлага, 46.4 тэрбум төгрөгийн алдааг залруулах 29 зөвлөмж өгсөн байна.  Үүнийг 2017 оны есдүгээр сарын 6-ны байдлаар үнэлэхэд 724.3 сая төгрөгийн албан шаардлагыг 51 хувь, 29 зөвлөмжийг 63.3 хувьтай хэрэгжүүлжээ.

Тиймээс цаашид:

– Аудитаар өгсөн акт, албан шаардлага, зөвлөмжийг тайлант онд багтаан хэрэгжүүлэх;

-Хэрэгжүүлээгүй ажилтанд хариуцлага тооцох;

-Төсвийг батлагдсан хэмжээнд зориулалтын дагуу зарцуулах, авлага, өглөгийг барагдуулах, тооцоо нийлж баталгаажуулах;

-Авлага, өглөгийг нэмэгдүүлэхгүй байх, олж бэлтгэсэн хөрөнгийг холбогдох байгууллагын шийдвэрийг үндэслэн данс бүртгэлд тусгах;

– Чанарын шаардлага хангаагүйгээс ашиглагдахгүй байгаа хөрөнгүүд, балансад бүртгэлтэй элэгдлээрээ зардлаа нөхсөн хөрөнгүүдийг данснаас хасах, цаашид ашиглах боломжтойг нь дахин үнэлгээ хийлгэх;

– Үндсэн хөрөнгө, бараа материалыг үнэн зөв бүртгэж, хөрөнгийн тооллогыг цаг хугацаанд нь чанартай хийж, үр дүнг тооцож ажиллах;

– Засгийн газрын тусгай сангийн хөрөнгийг бүрдүүлэх, зарцуулахад тавих хяналтыг сайжруулах

-Дотоод хяналтыг сайжруулах,

-Үйл ажиллагааг зөв зохион байгуулах зэрэг санхүүгийн зөрчил гаргахгүй байх зөвлөмжийг өглөө.

Батлан хамгаалахын сайд Н.Энхболд Үндэсний аудитын газраас зохион байгуулж байгаа тус үйл ажиллагаанд талархалтай байгаагаа илэрхийлээд, Төрийн аудитын байгууллагаас өгч байгаа зөвлөмжийг бүрэн хэрэгжүүлэх шаардлагатайг онцоллоо. Түүнчлэн 2016 оны санхүүгийн тайлангийн аудитаар илэрсэн зөрчил дутагдлыг арилгах, акт, албан шаардлага, зөвлөмжийн биелэлтийг тайлант онд багтаан бүрэн хэрэгжүүлэх талаар эрхлэх асуудлын хүрээний байгууллагын удирдлагуудад үүрэг чиглэл өглөө.