ТӨРИЙН АУДИТЫН БАЙГУУЛЛАГА АХМАД НАСТНУУДАА ХҮЛЭЭН АВЧ, ХҮНДЭТГЭЛ ҮЗҮҮЛЛЭЭ

17-р жарны  шороон нохой жилийн сар шинийн баярыг тохиолдуулан Үндэсний аудитын газрын удирдлагууд ахмадуудаа хүлээн авч хүндэтгэл үзүүллээ.  Монгол Улсын Ерөнхий аудитор Д.Хүрэлбаатар арга хэмжээг нээж хэлсэн үгэндээ “Өнөөдрийн бидний  ажил үйлс өөдрөг, амжилттай байгаа нь ахмадууд та нарын маань он удаан жилийн хөдөлмөр, хичээл зүтгэлийн үр дүн юм”   хэмээн онцлов.

Энэ арга хэмжээнд  Монгол Улсын Ерөнхий Аудиторын  орлогч   С.Оюунбилэг,  орлогч С.Бүрэнбат, Тамгын газрын дарга Ц.Ганболд нар байлцав.

Төрийн хяналтын байгууллагад нэгэн насны ажил амьдралаа зориулж өндөр насныхаа амралтыг эдэлж байгаа үе үеийн ахмадууд хүрэлцэн ирж оролцсон бөгөөд Ахмадын зөвлөлийн дарга Г.Бямбажав ахмадуудаа төлөөлөн үг хэлж, талархал илэрхийлэв.

Ахмад ажилтан Д.Мөнхжаргал өөрт хадгалагдаж байсан тухайн үеийн Төрийн хянан шалгах хорооны түүхэн ховор гэрэл зургийн цомгийг Үндэсний Аудитын Газрын архивт хадгалуулахаар Монгол Улсын Ерөнхий аудиторт гардуулав.

Арга хэмжээнд СТА Л.Банзрагч, СТА Б.Осгонбаяр нарын дуучид ая дууны мэндчилгээ өргөн барьсанд  ахмадууд  сэтгэгдэл өндөртэй байлаа.

ҮАГ-ын Удирдлага, хамт олны зүгээс нийт ахмадууддаа гарын бэлэг гардуулж, хүндэтгэлийн үйл ажиллагаа өндөрлөлөө.