Үндэсний Аудитын Газрын төлөөлөгчид ОХУ-ын Буриад Улсын Тооцооны танхимд айлчлал хийв.

Монгол Улсын Ерөнхий аудиторын орлогч С.Бүрэнбат ахлан ҮАГ-ын Тамгын газрын дарга Ц.Ганболд,  ҮАГ-ын Стратегийн удирдлагын газрын  сургалт хариуцсан менежер Ж.Эрдэнэ зэрэг ҮАГ-ын албаны төлөөлөгчид ОХУ-ын Буриад Улсын Тооцооны танхимын дарга Е.П. Пегасовын урилгаар Буриад Улсын Тооцооны танхимд 2018 оны 2 дугаар сарын 20-ны өдрөөс 2 дугаар сарын 23-ны өдрүүдэд ажлын айлчлал хийв.

/ОХУ-ын Буриад Улсын Тооцооны танхимын дарга Е.В. Пегасов хэлэлцээрт гарын үсэг зурав. Улаан-Үүд 2018 оны 02 сарын 21/

Энэхүү айлчлалын үеэр 2013 онд ОХУ-ын Москва хотод Монгол Улсын үндэсний аудитын газар болон ОХУ-ын Тооцооны танхимын хооронд байгуулсан хамтран ажиллах тухай хэлэлцээрийн гол зорилго, зарчмуудыг удирдлага болгон Буриад Улсын тооцооны танхим ҮАГ хооронд хамтран ажиллах тухай хэлэлцээрт Монгол Улсын Ерөнхий аудиторын орлогч С.Бүрэнбат, Буриад Улсын Тооцооны танхимын дарга Е.П. Пегасов нар Улаан-Үүд хотноо гарын үсэг зурав.

/Монгол Улсын Ерөнхий аудиторын орлогч С.Бүрэнбат хэлэлцээрт гарын үсэг зурав. Улаан-Үүд 2018 оны 02 сарын 21/

Хэлэлцээрийн хүрээнд төрийн хяналт шалгалт болон шинжлэн дүгнэх үйл ажиллагааны чиглэлээр харилцан ажлын туршлага солилцох, талуудын үйл ажиллагааны талаар арга зүйн мэдээлэл солилцох, талуудын нөхөрсөг харилцааг хөгжүүлэн, харилцан төлөөлөгч солилцох, хил орчмын болон хоёр талын санаачлагаар хамтарсан болон зэрэгцээ аудит хийх зэрэг чиглэлээр хамтран ажиллахаар тохиролцлоо.

/Хэлэлцээрийн дараа хүндэтгэлийн зураг авахуулав.2018.02.21 Буриад Улсын Тооцооны танхим/

Айлчлалын үеэр Буриад Улсын Ардын Хурлын дарга болон Ардын Хурлын төсөв, татвар, санхүүгийн Байнгын хорооны дарга нартай уулзалт хийж 2 улсын хамтын ажиллагааны талаар харилцан мэдээлэл солилцлоо.