ТӨРИЙН АУДИТЫН БАЙГУУЛЛАГЫН УДИРДАХ АЖИЛТНЫ ЗӨВЛӨГӨӨН БОЛЖ ӨНГӨРЛӨӨ.

Үндэсний Аудитын газар жил бүр удирдах ажилтны зөвлөгөөнийг зохион байгуулдаг бөгөөд энэхүү үйл ажиллагаанд  Монгол Улсын Ерөнхий  Аудитор Д.Хүрэлбаатар болон Төрийн Аудитын байгууллагын нийт удирдлагууд нийслэл, орон нутгаас ирж оролцлоо.  Тус зөвлөгөөн 2018 оны 3 дугаар сарын 19-нөөс 20-ны өдрүүдэд Төрийн ордонд болж, зөвлөгөөний үеэр 2017 онд хийсэн ажлын үр дүнг хэлэлцэн , 2018 оны бодлого, зорилт дэвшүүлэв. Өнгөрсөн жил төрийн аудитын байгууллагын хэмжээнд “Сахилга хариуцлагыг сайжруулах” жил болгон ажилласан ба 2018 онд “Аудитын чанар, үр өгөөжийг дээшлүүлэх” зорилт тавьж ажиллахаар боллоо.

Уг зөвлөгөөний үеэр “Удирдах ажилтны арга барил, идэвхижүүлэлт ба манлайлах ур чадвар”, “Байгууллагын соёл, удирдах ажилтны харилцааны ёс зүй”, “Байгууллагын хөгжилд удирдах ажилтны үүрэг оролцоо, өөрчлөлтийг удирдан чиглүүлэх арга хандлага” сэдвээр Удирдлагын академийн багш нарын  сургалт зохион байгуулагдаж, идэвхитэй оролцов.

Мөн  төрийн аудитын тухай хуулийн шинэчилсэн найруулгын төсөлд ажлын хэсгээс хэлэлцүүлэг зохион байгуулж,  удирдах ажилтнуудаас санал авсан.

Түүнчлэн  Төрийн аудитын байгууллагын “2017 оны шилдэг Төрөлжсөн аудитын газар”-аар Үндэсний аудитын газрын Санхүүгийн аудитын газрын хамт олон тэргүүлсэн бол шилдэг гурван аймгийн 1-рт Архангай аймаг дахь Төрийн аудитын газар, 2-рт Сүхбаатар аймаг дахь Төрийн аудитын газар,  3-рт Говьсүмбэр аймаг дахь Төрийн аудитын газар шалгарч өргөмжлөл, мөнгөн шагнал гардан авлаа.

Тус зөвлөгөөний үеэр төрийн аудитын албан хаагчийн тангараг өргөх ёслол болж, 4 аудитор төр түмнийхээ төлөө үнэнч шударгаар  ажиллахаа батлан илэрхийлэв.

Зөвлөгөөний төгсгөлд МУЕА-ын орон нутаг хариуцсан орлогч С.Бүрэнбат аймаг, орон нутгийн тэргүүлэх аудиторуудтай үр дүнгийн гэрээ байгууллаа.