Хэнтий аймаг- Аудитын иргэний танхимын нээлт боллоо.

Монгол Улсын Ерөнхий аудиторын 2017 оны 12 дугаар сарын 12-ны өдрийн А/228 дугаар тушаалаар Төрийн аудитын байгууллагын дэргэд Аудитын иргэний танхимыг байгуулж, иргэдийн бүлгийн үйл ажиллагааны дүрмийг баталсан бөгөөд Хэнтий аймаг дахь Төрийн аудитын газар  “Аудитын иргэний танхим” -ын нээлтийг хийлээ.

Аудитын “Иргэний танхим”-ын нээлтэд аймгийн Тэргүүлэх аудитор Ч.Эрдэнэбаатар, урилгаар Монгол Улсын Ерөнхий Аудитор Д.Хүрэлбаатар, Ерөнхий аудиторын орлогч С.Бүрэнбат, Үндэсний Аудитын Газрын Тамгын газрын дарга Ц.Ганболд, Гүйцэтгэлийн аудитын газрын захирал            М.Давааням, Нийслэлийн Аудитын газрын тамгын хэлтсийн дарга Г.Цагаанхүү болон  Аймгийн Иргэдийн Төлөөлөгчдийн хурлын дарга Л.Батсайхан, аймгийн ЗДТГ-ын дарга Ж.Ганбаатар, аудитын Иргэдийн бүлгийн гишүүн Б.Очирхуяг, Б.Цэрэнчимэд , Т.Эрдэнэбаатар зэрэг албаны бусад хүмүүс оролцлоо.

Энэхүү танхим нь Монгол Улсын Төрийн аудитын байгууллага болон иргэд олон нийт, төрийн бус байгууллагуудын хоорондын хамтын ажиллагааны тогтолцоог бий болгох, Төрийн аудитын чанар, үр дүнг дээшлүүлэх, иргэн олон нийтийн оролцоог Төрийн аудитын үйл ажиллагаанд татан оролцуулах, олон нийтийн анхааралд байгаа үнэн зөв хариу хүссэн аудитын сэдвийн талаар ард иргэдийн саналыг авах, хэлэлцүүлэг зохион байгуулах, саналыг нэгтгэн дүн шинжилгээ хийж, иргэд олон нийтэд ил тод нээлттэй, үнэн зөв мэдээллийг хүргэхэд чиглэнэ.

Өнөөдөр нээлтээ хийсэн Аудитын Иргэний танхимд ажиллах 5 хүний бүрэлдэхүүнтэй аудитын иргэдийн бүлэг нь орон нутгийн төсвийн байгууллагууд, иргэд, олон нийтийн хэрэгцээ шаардлагыг хангаж байгаа эсэхэд болон төсвийн зарцуулалтад тавих иргэдийн хяналтыг сайжруулах чиглэлээр дүгнэлт зөвлөмж боловсруулан ажиллах юм.