МУ-ЫН ЕРӨНХИЙ АУДИТОР Д.ХҮРЭЛБААТАР УИХ-ЫН ГИШҮҮН, НИЙГМИЙН БОДЛОГО, БОЛОВСРОЛ, СОЁЛ, ШИНЖЛЭХ УХААНЫ БАЙНГЫН ХОРООНЫ ДАРГА Ё.БААТАРБИЛЭГТЭЙ УУЛЗАВ
Өнөөдөр буюу 2018 оны 4 дүгээр сарын 10-ны өдөр Монгол Улсын Ерөнхий аудитор Д.Хүрэлбаатар Улсын Их Хурлын гишүүн, Нийгмийн бодлого, боловсрол, соёл, шинжлэх ухааны байнгын хорооны дарга Ё.Баатарбилэгтэй уулзаж төрийн аудитын байгууллагын үйл ажиллагааны талаар танилцуулав.
Тус уулзалтад Монгол Улсын Ерөнхий аудиторын орлогч С.Оюунбилэг, Үндэсний аудитын газрын Стратегийн удирдлагын газрын захирал Д.Энхболд, Санхүүгийн аудитын газрын захирал Ц.Наранчимэг, Гүйцэтгэлийн аудитын газрын захирал М.Давааням, Нийцлийн аудитын газрын захирлын үүргийг түр орлон гүйцэтгэгч Х.Болдбаатар, ахлах шинжээч П.Цэнгүүн зэрэг албаны хүмүүс байлцав.
Уулзалтаар талууд төрийн аудитын байгууллагын үйл ажиллагаатай холбогдуулан аудит хийх сэдвүүд болон аудит хийх хугацааны талаар, мөн аудитын үр дүнг харъяалагдах Байнгын хороо бүрээр хэлэлцэж, холбогдох байгууллагуудад Байнгын хорооны дүгнэлт бүхий зөвлөмж өгч байх нь нийгэмд шударга ёсыг тогтооход томоохон нөлөө үзүүлэх талаар ярилцаж, харилцан санал солилцов.
Монгол Улсын Ерөнхий аудитор Д.Хүрэлбаатар Төрийн аудитын байгууллага “Төрийн аудитын тухай хууль” зэрэг хэд хэдэн хуулийн хүрээнд үйл ажиллагаа явуулдаг. Хуулиуд хоорондоо зөрчилтэй учир төрийн аудитын тогтолцооны хууль, эрх зүйн орчныг боловсронгуй болгож, сайжруулах зорилго тавьж ажиллаж байгаа бөгөөд “Төрийн аудитын талаар төрөөс баримтлах бодлого”, “Төрийн аудитын тухай хуулийн шинэчилсэн найруулга”-ыг боловсруулан УИХ-д өргөн барихаар ажиллаж байгаа болон Үндсэн хуулийн нэмэлт, өөрчлөлтийн төсөл хэлэлцэж байгаа энэ үед Төрийн аудитын байгууллагыг Үндсэн хуулиар баталгаажуулж, хараат бус байдлыг хангаж ажиллах шаардлагатай байгаа талаар танилцууллаа.
Мөн Төрийн аудитын байгууллагын төсөв, зардлыг нэмэгдүүлж, ажилтнуудын цалин, нийгмийн баталгааг хангах шаардлагатайг тэмдэглэсэн байна.
Улсын Их Хурлын гишүүн, Нийгмийн бодлого, боловсрол, соёл, шинжлэх ухааны байнгын хорооны дарга Ё.Баатарбилэг УИХ-д хяналтын чиг үүргээ хэрэгжүүлэх болон төсвийн хөрөнгийн арвилан хэмнэлт, үр ашиг, үр нөлөөтэй байдлыг хангахад дэмжлэг үзүүлж ажилладаг УИХ-ын харъяа байгууллагын хувьд төсөв, зардлыг нэмэгдүүлэх чиглэлээр шийдвэр гаргах бололцоотойг дурдав.
