Дундговь: Сумдаар ажиллаа

Дундговь аймаг дахь Төрийн аудитын газраас аудитын менежер Х.Наранцацрал, ахлах аудитор Ч.Бэрхсайхан, Д.Ихбаяр нарын бүрэлдэхүүнтэйгээр 2018 оны 04 дүгээр сарын 11-ний өдрөөс 16-ны өдрийг хүртэл Луус, Хулд, Дэлгэрхангай, Цагаандэлгэр, Дэрэн, Дэлгэрцогт сумдад дараах 4 чиглэлээр ажиллаа. Үүнд:

1. “Улсын төсвийн хөрөнгө оруулалтын төлөвлөгөөний хэрэгжилт, үр дүн, үр ашиг”-т хийж буй гүйцэтгэлийн аудитын гүйцэтгэлийн үе шатны ажил;
2. “Орон нутгийн төсвийн хөрөнгө оруулалтын төлөвлөгөөний хэрэгжилт, үр дүн, үр ашиг”-т хийж буй гүйцэтгэлийн аудитын гүйцэтгэлийн үе шатны ажил;
3. “Аж ахуйн үйл ажиллагааны тусгай зөвшөөрлийн тухай хуулийн орон нутагт хамааралтай заалтын хэрэгжилт”-д хийж буй нийцлийн аудитын гүйцэтгэлийн үе шатны ажил;
4. Төсвийн шууд захирагч нарын 2017 оны санхүүгийн тайлангийн аудитаар тогтоосон төлбөрийн акт, өгсөн албан шаардлага, зөвлөмжийн хэрэгжилтийг шалгах.

1, 2. “Улсын төсвийн хөрөнгө оруулалтын төлөвлөгөөний хэрэгжилт, үр дүн, үр ашиг”, “Орон нутгийн төсвийн хөрөнгө оруулалтын төлөвлөгөөний хэрэгжилт, үр дүн, үр ашиг”-т хийж буй гүйцэтгэлийн аудитаар Хулд сумын сургууль, Дэлгэрхангай сумын ЗДТГ, Цагаандэлгэр сумын Цэцэрлэгт нийт 92.7 сая төгрөгийн хугацаатай албан шаардлагыг хүргүүллээ. Аудитаар дараах нийтлэг зөрчил илэрч байна. Үүнд:

• Барилгын засварын ажлыг санхүүгийн тайланд тайлагнаагүй, зөрүүтэй тайлагнасан;
• Хувийн хэрэг хөтлөөгүй;
• Гүйцэтгээгүй ажилд санхүүжилт олгосон зэрэг.

3.  “Аж ахуйн үйл ажиллагааны тусгай зөвшөөрлийн тухай хуулийн орон нутагт хамааралтай заалтын хэрэгжилт”-д хийж буй нийцлийн аудитаар Цагаандэлгэр, Луус, Хулд, Дэлгэрхангай, Дэлгэрцогт сумдад нийт 1.4 сая төгрөгийн зөрчил илэрч, 0.05 сая төгрөгийн зөрчлийг аудитын явцад залруулж, 1.4 сая төгрөгийн зөрчилд төлбөрийн акт тогтоож, албан тушаалтанд хариуцлага тооцуулах болон зөрчил арилгуулах албан шаардлагуудыг хүргүүлэн ажиллаа. Аудитаар дараах нийтлэг зөрчил илэрч байна. Үүнд:

• Тусгай зөвшөөрлийн тэмдэгтийн хураамж төлөөгүй байхад архи согтууруулах ундаа худалдах, түүгээр үйлчлэх зөвшөөрөл олгосон;
• Тамхи худалдах тусгай зөвшөөрөл аваагүй аж ахуй нэгж, байгууллага тамхи худалдан борлуулсан;
• Тусгай зөвшөөрөл хүсэгчийн баримтын бүрдэл дутуу байхад тусгай зөвшөөрөл олгосон;
• Тусгай зөвшөөрөл сунгах шийдвэр гарсан боловч тусгай зөвшөөрлийн гэрчилгээг олгоогүй.

4.  Санхүүгийн тайлангийн аудитаар тогтоосон төлбөрийн акт, өгсөн албан шаардлага, зөвлөмжийн хэрэгжилтийг газар дээр нь очиж шалгалаа. Байгууллагын дарга, нягтлан бодогч нарт аудитаар илэрсэн зөрчлийг арилгах төлөвлөгөө гаргаж, хэрэгжилтийн тайланг ирүүлж хэвших талаар зөвлөж, цаашид хамтарч ажиллахад анхаарах асуудлуудыг ярилцав.

Хэрэгжилтийг Төрийн аудитын газарт ирүүлэх хугацаа өнгөрсөн, маргаантай, шийдвэрлэх боломжгүй 5 асуудлыг хэрхэн шийдвэрлэх талаар байгууллагын удирдлага, нягтлан бодогч, холбогдох мэргэжилтэнтэй уулзалт хийн, тодорхой хугацаа өгч, хэрэгжилтийн талаарх хариуг төрийн аудитын байгууллагад хүргүүлэх талаар чиглэл өглөө.

ДУНДГОВЬ АЙМАГ ДАХЬ ТӨРИЙН АУДИТЫН ГАЗАР